SRAT RUT
Elimelekh nya yuug bong ingkiaisi ei minu Moab
1
1 Habiei mimbrek tu nipou tirigi nibou ndig hi ninyeng tak kep mben Israel bigyo lene ninggum nindig bibor kieng kep minu Kanaan. Gima rino timiei gom leu hanjop keret Yehuda di bong ei Betlehem kin nitnem kin nipmot bat nya ibou can yahagom yuug bong ingkiaisi ei minu Moab. 2 No dima ninyeng Elimelekh lene nitnem ninyeng Naomi ba, nipmot bat cin inyeng rino Mahlon kin Kilyon. Yoni itig mbier tut mben Efrata. Ibong ei minu Moab wer mimbrek tu lene, 3 Elimelekh mai leu nitnem. Apino nitnem kin nipmot bat cin ibong biyongkom. 4 Nipmot bat cin yahacem iwak sop mben Moab ibou can ba, hi ninyeng Orpa lene hi ninyeng Rut. Lo bi lene ari bingwam simnai gi niabiati bu lene, 5 Naomi nipmot bat cin pima cem yahacem imai hak. Apino Naomi gwam binongkom lewo nijjep kin nipmot bat cin yahagom imai leu noni tu.Naomi kin Rut ingkwei hanyen ug ei Betlehem
6 Mpe hi bu tirigi Naomi bong ningkiaisi ei minu Moab lene noni miap tut mben Israel inghapti bipia TUHAN ngondut yok bibindei ba, ide njita ei beisi yai ningat nindig bibor hanyen bu. Gima rino noni kin nignyot bat cin itin ei mem ingkwei hanyen leu minu Moab. 7 Lene yahagom ittei yam ba, ingkwei hanyen ug ei Yehuda. 8 Noro tirigi yuug ei puig sinon lene Naomi pai bak nignyot bat cin <<Ma jingkwei hanyen bijibong bit jipmem bat nya. Handei kon ba, TUHAN misingat tut je dem kep nok gi po jisingat tut da kin yo po imai su pima. 9 Handei kon ba, TUHAN mibon nituti mem gima jiwak jijjep hi bu leu api mijiyai jimunggwom bat nya.>>
Lene Naomi mei yahacem bipigo yok. Noro Orpa kin Rut ipim ba, igyai nggwei kibor. 10 Lene isrep bipai <<E bi! Nibit na kikau ug ei atimieisi.>>
11 Noro Naomi buhup <<Dignyot bat jen e, nok ne bi. Nnaba jingkwei hanyen ug ei jitimieisi. Nggon rino jibit da i? Bit bon diyai dipmot hi kin bu mem gima jiwak yok nok jijjep bua kan bi. 12 Ma jingkwei hanyen ug ei jitimieisi hak ug. Lewo diwer sindig-ndau tu. Mbro nok gino dingon cut leu bi ba, TUHAN sindem mem gima bindei ba, diwak dijjep hi bu mem himmun di ariman apino diyai dipmot bat nya ibou can bu lo, 13 bit bon joom jingut kanti kikau bibou yoni indig ug e kan bi. Gino joom jingut kanti nok gima mibindei ba, mibon nituti mem hiter iwak je kan bi. Dipmisop bat jen, gini hagom nggruk bibor! Dingon buhun bibor tut mun di cut igkep je drek dip gi po TUHAN singat tut da bi pima.>>
14 Lene sop cin dima ipim bu ba, igyai nggwei kibor. Leu api Orpa mei Naomi bipigo lene ngkwei hanyen. Noro Rut kou sut gima kes nignyot ei bingkwei hanyen leu a. 15 Leu api Naomi pai binoni <<Rut e, asut ngkwei hanyen ndam nide bat nya kin nide kwar hanyen tu. Suar nani cem angkwei hanyen bit noni.>>
16 Noro Rut buhup <<Amei e, ma acuk da bidingkwei hanyen au. Asindui sut da bidibit na kikau. Midibit na kikau bidem ambutti ba, midibong bit na bidem abongti ba, miditig mbier tut ade bat nya bidikuk da bak Allah di akuk na bak cem. 17 Ayaijo ngwig hon ei tirigi tou lene dani cem diyaijo ngwig hon ei tirigima leu api handei kon ba, tungwatu nya itig dingut ei atimieisi. Gino disindui sut mun nyeng hi mbres da leu na nipou tirigi dimai bigyo lene ma TUHAN sigion da hak ug. Nimai ningkom he rima mbres sa leu yam a.>>
18 Tirigi Naomi ngat lo, Rut mpig bou kep gima bit noni kikau lene noni kes nihyet hon.
19 Lo bi lene yahacem imbut kikau ba, yuug krau Betlehem. Tirigi icoi ug ei minu dima lene timiei nya yahagom itri tut biyam. Lene sop timiei nya ihig yam <<No dima ne Naomi nijit rin e?>>
20 Leu api Naomi buhup <<Ma jindat kep dinyeng Naomi bu au (gi ndo bipia no di ningon llei). Noro ma jindat kep dinyeng Mara (gi ndo bipia no di ningon mpo). Dipai nok lewo Allah Di Sindem Bibor bibon da kinei. 21 Tirigi po dimbut leu ditimieisi dini mimbrek tu pima lene dibon dijjep kin dipmot bat nya. Noro TUHAN buwak da hanyen kwei kin gi dehei he. Leu gima rino ma jindat kep dinyeng Naomi bu au. Lewo TUHAN Di Sindem Bibor kes hukum ei da dip bibindei ba, mun di buhun bibor cut igkep da.>>
22 Nipui mun dini ne nibohon tut Naomi tirigi noni kwei hanyen leu minu Moab bibuwak nignyot Rut di timiei minu Moab bibit noni ri. Yoni ikwei krau Betlehem hammi tirigi timiei minu dima ikinyon ei gima ikos gandum-barlib kwei leu beisi nya.