Tola
10
1 Tirigi Abimelekh mai leu lene mben Israel idimig Tola di Pua nipmot ei nok nibou di mikwek yoni leu siceu inda nsi. Noni ne Dodo di ntun keret Isakhar nignyon him rin ba, bong ei Semir ei nungug him Efraim. 2 Tola nok nibou mem mben Israel ba, bie tut yok kikau mem nijam ari bingwam nyatungwagom ba, ningai. Leu api mai ba, itig ei Semir.Yair
3 Tirigi Tola mai leu su lene mben Israel idimig Yair ei nok nibou mem yok leu api noni bie tut yok kikau mem nijam ari bingwam nyatungwagom. Yair nitimieisi leu Gilead. 4 Noni yai nipmot bat nya ibou ningot ningai. Ide keledai di ikui bigwam dip ningut ningot ningai lene ide minu mien di inyeng tak kep nya cem ningot ningai ei Gilead. Tungwatu nya ijem kep minu mien dima yok Minu mien Yair de kikau kwei bipek ammani kep. 5 Yair cem mai lene itig ei Kamon.
Mben Israel ingon gom tut TUHAN bu bi
6 Jei bi lene mben Israel ibon sisar tut TUHAN hanyen bu. Iba inghim bak TUHAN nihyet lene ikuk yok bak bu bi. Noro ikuk yok bak kwar Baal kin Asytoret kin kwar di mben Siria kin Sidon kin Moab kin Amon kin Filistin ikuk yok bak nya. 7 Igyaisi dima bindei ba, TUHAN gga yok apino sindui sut mben Filistin kin mben Amon di inyeng tak kep yoni. 8 Mben cin dini ico kep mben Israel di ibong ei Gilead ei mben Amori ide dihyei hanjop nsi ei Minyei Yordan nite bei mpia nipriti kikau mem nijam ari bingwam simnaimuhwidip brimigtehiningai. Iba isibut bico kep yok. 9 Mben Amon ne ingon cun ba, isigon Minyei Yordan biyuug dihip ei nite hi ba, yuug kon pran bit tentara keret Yehuda kin Benyamin kin Efraim ug. Apino mben Israel iwer tungwatu bi bibor hak.
10 Leu api yahara TUHAN bipai <<Nyende TUHAN Allah e, nibon sisar tut Nani tu. Lewo niba ninghim bak ahyet ba, nikuk nye bak kwar Baal nya tu.>>
11-12 Lene TUHAN buhup <<Nipou yo lene mben Mesir kin Amori kin Amon kin Filistin kin Sidon kin Amalek kin Maon inyeng tak kep je. Leu api jahara Da mem nijam dima leu binhyepo dimpu je. Ma jiyok ngon kep bipia diteu-teu nyen je leu inda nsi ba, jingwes ngun. 13 Mbro nok gino diteu je bijingwes ngun tu lo, no jiba jingha bak Dani kikau ba, jiba joho rok kwar nya yo. Gima rino gi mbun dikwek je bijingwes ngun hanyen leu yo dima inda nsi kan bi. 14 Ma juug hak ndam jide kwar nya di jidimig di jikuk je bak nya. Jahara kwar dima yok leu binhyepo impu je ei mpe di juum mun di buhun tak je a.>>
15 Noro mben Israel ipai bak <<TUHAN e, nyeni nibon sisar tu. Ba, abon igbit angon kanti mem nyeni hak ug lo, ma ampu nye mem nijam dini!>> 16 Leu api icom kwar nya hagom. Leu lene ikuk yok bak Allah hanyen bu. Apino Allah ngig niyai kep yok bingat mun di buhun tak yoni lene ngondut yok.
17 Mpe dima lene tentara Amon injei siceu mem gima ikon pran bit mben Israel ba, yohok ide prak meng yati ei Gilead. Lene tentara Israel cem injei siceu bidem yam ei lene yohok ide prak meng yati ei Gilead. 18 Lene limwa mben Israel kin nibou di ibie tut keret mben Israel ihig ser yam nyen ei sirima <<Tou leu nyeni ikieti rima mibrim ningkek bikon minggwen mem gima igya kep bihwen mben Amon i? Nna ba idimig no dima ei nok nibou di mibie tut nye di idem yam ei Gilead tu yahagom.>>