Abimelekh
9
1 Mpe di gom bu ne Abimelekh di Gideon nipmot tirimpoi pima ug cem kep nipmem nide bat nya di ibong ei Sikhem bisok nihyet ei yok dip, 2 bak tungwatu nya di ibong ei minu dima yahagom bipai biyok <<Ma jipai igbit jingon kanti bida tut no di ninyeng mitak kep je. Jijoi sut Gideon nipmot bat nya ibou ningot muhwindacan inyeng tak kep je e, he tungwagom ngat ninyeng tak je e? Ma jiyok ngon kep bipia dimbier kim je.>> 3 Lene nipmem nide bat nya kin mben Sikhem isimbot kep biyam tut leu api ikos tut bipia ma Abimelekh ninyeng tak kep yok lewo nimbier kim yok. 4 Lene yoni yuug yai mitiei perak nitig ningot muhwindacan leu ig di ipigig sut ei mem ide kwar di ikuk yok bak di Baal-Berit pima ba, igyai bak Abimelekh. Leu api noni ba mitiei dima bitri rindin bak yo di irom ndok nya nimpung gom ba, ibicom yam bit noni. 5 Lene yahagom yuug ei nicig nide biyati ei Ofra. Ei sirima lene noni kin yo di ibit noni igyai nimai bak Gideon nipmot bat nya ibou ningot muhwindacan ei tig di nindig gom ninjek dip. Noro Gideon nipmot nipumiap Yotam ku no nyahan biningwes ngun leu yok. 6 Lene mben Sikhem kin mben Bet-Milo yahagom ittei yam bingkwei hanyen ug ei biei nindig di ipigig sut ei Sikhem leu api ikon Abimelekh ninyeng nok nibou ndig mem yok.7 Tirigi Abimelekh ninghapti tibim ei Yotam nitingou nsi tu lene noni ug ba, kui ug ei Nungug Gerizim lene ba nihyet nindig pai biyok <<Je di mben Sikhem e, ma jingig jitingou mem dihyet leu binhyepo Allah mintu kep je. 8 Mpe di gom lene biei nya induk yam kwei ba, indo nibou ndig gom mem yonti. Lene ipai bak biei zaitun <Nita nani nok nibou ndig mem nye e?> 9 Noro biei zaitun buhup <Dani ne bi! Gino dinok nibou ndig mem je lene mibon nituti mem diyai ningat di tungwatu nya ipot mem igyai ningei ba, ibinggei sut ide kwar di ikuk yok bak nya kin ide yo di inyeng jei nya bi.> 10 Lene biei nya pima ipai bak biei ara <Akwei ba, nita nani nok nibou ndig mem nye.> 11 Noro biei ara buhup <Dani ne bi! Gino dinok nibou ndig mem je lene mibon nituti mem ningat di nyop kei ntun da him bu bi.> 12 Gima rino biei nya pima ipai bak ba anggur <Akwei ba, nita nani nok nibou ndig mem nye.> 13 Noro biei ba anggur cem buhup <Dani ne bi! Gino dinok nibou ndig mem je lene mibon nituti mem dingat ningat di bindei ba, tungwatu nya kin kwar di ikuk yok bak nya idut bipu yok bi.> 14 Gima rino biei nya yahagom ipai bak cibou nggwen <Akwei ba, nita nani nok nibou ndig mem nye.> 15 Lene cibou nggwen dima buhup <Gino jahagom jice tut yam bipia dinok nibou ndig mem je lene ma jinduk yam bijigwam coi da. Gi bi lene mbigom hum di cig-cai misror kwei leu ditde ninda-nda nya biyem baham bitut buom Libanon nya.> >>
16 Lene Yotam binut bu bipai <<Jiba jingon gom bindo Abimelekh nok nibou ndig e? Jiyai mun di igbit tirigi jibibon dicig Gideon nok gima ba, jibuhup binoni nok gi igbit tut gi po noni brim ningkek mem je pima tu e, he jingondut nide bat nya e? 17 Ma jiyok ngon kep bipia dicig nggok nimai eisi tut je tirigi po noni hwen mben Midian lene teu je bijingwes ngun leu yok pima. 18 Noro tini bu ne jibimangkrei Gideon nide bat nya tu. Jiyai nimai bak nipmot bat nya ibou ningot muhwindacan ei tig di nindig gom ninjek dip. Jibon mun di mbuk bijita Abimelekh nok nibou ndig drek dip gi po nipmem ne dicig de awak he rin bitig mbier tut je pima. 19 Gino jiba jingon gom bibibon Gideon kin nide bat nya njap di ammani lene ma Abimelekh kin jeni jingon kei sut yam. 20 Gi bi lene handei kon ba, Abimelekh bindei ba, hum di cig-cai sror kwei biyem mben Sikhem kin mben Bet-Milo bingwig. Handei kon ba, mben Sikhem kin mben Bet-Milo ibindei ba, hum di cig-cai sror kwei biyem Abimelekh cem bingwig.>> 21 Lene Yotam nang leu yok bibong ei Beer lewo noni ttin tut nikindig Abimelekh.
22 Abimelekh ninyeng tak kep mben Israel kikau ei nijam ari bingwam ningai. 23 Leu api TUHAN bindei ba, Abimelekh kin mben Sikhem iba nitok biyam. Apino mben Sikhem ihwen bit noni. 24 Mun dini cut igkep yoni nok nibuhup hanyen biyokti drek dip ide niyai mun kineisi tirigi ibidip huk Abimelekh po yai nimai bak Gideon nipmot bat nya ibou ningot muhwindacan nipou pima. 25 Mben Sikhem ikes ide tungwatu ba, ikos dik ei nungug dip mem gima igya ser Abimelekh kin nide tentara nya leu binhyepo ikat yok. Ba, bikwop yo di imbut njiriek mpia dima lene icut igkep yok bicat ide ndigban cem. Leu api bihi ipai sut igyai munti dima bak Abimelekh.
26 Mpe dima lene Gaal di Ebed nipmot kwei sut nikindig bat-nikinjoi bat nya ba, yahagom ibong ei Sikhem. Apino mben Sikhem iba ingon com noni. 27 Lene yahagom yuug puk ba anggur ngat ei ba anggur nghousi nya lene ibipot ba anggur ngei cem mem idut ba, ibibon pesta. Yoni igyem njita bidut ba anggur ngei cem ei mpia di ikuk yok bak ide kwar nya eisi ba, jei bi lene imbriom Abimelekh. 28 Lene Gaal pai sut <<Apo nyeni ne tou i? Leu dima ikuk nye bak Abimelekh i? Apo Abimelekh ne tou i? Noni ne Gideon nipmot rin ba, Zebul ya kui noni. Nggon rino ibit noni nihyet i? Ma ingon gom tut Hemor di nok pung di nyeni intun him!>> 29 Gino dinok nibou mem mben Sikhem dini lene Abimelekh niyaijo ngwig hon. Midipai binoni <<Yo, akiju ba, anjei sut ade tentara nya kwei ba, ikon pran bit yam hak ug.>>
30 Tirigi Zebul di nok nibou ei Sikhem miap Gaal nipaisi dima lene ningon sibui sut bibor. 31 Lene pinak tungwatu nyahan ndam Abimelekh ei Aruma leu binhyepo ipai Gaal ninghapti bak ba, ipai <<Gaal di Ebed nipmot kin nikindig bat-nikinjoi bat nya ikwei ei Sikhem ba, ikes ingon bak timiei minu ndig dini leu binhyepo yaham imbuk kep nani. 32 Gima rino ma aya tut ade tentara nya ba, jiba mmun bikwei ku je nyahan ei ngoi dumti nya. 33 Njap tekti di hyep tirigi mpia pri lene ma jicut kros igkep minu ndig dini ba, jihwen hak ug. Gino Gaal ya tut nide tentara nya ba, ihwou hwen jeni lene gima bon nituti di kei mem gima jihwen noni hak ug.>>
34 Lene Abimelekh ya tut nide tentara nya nimpung bitai ba, iba mmun bimbut. Leu api yuug ku yok nyahan ttai minu ndig Sikhem. 35 Tirigi Abimelekh kin nide tentara nya ingat lo, Gaal hei ba, ya ei dimbou pmem ei minu ndig dima nuhui lene yahagom ikiju ba, yehei leu mpia di iku yok eisi kwei. 36 Lene Gaal ngat yok bipai bak Zebul <<Angat i! Tungwatu nya no ijuk kwei leu nungug dip dima yok kwei a.>>
Lo, Zebul buhup <<Gima yo tungwatu bi noro mun ngwes di kilei-kilei nyen ei nungug dip he.>>
37 Leu api Gaal pai bu <<Jit, tungwatu nya no itti mboi hu kwei. Lene nimpung gom bu no ikes yo kak puig biei terpentin nghousi di nipigigsi ma kwei.>>
38 Lene Zebul pai bak Gaal <<Yo, nogindini ne arai po pri tut nanti pima ritou i? Nipou pini lene apai ikuk nye bak Abimelekh mem mindei i? Yo di angat dima ne yo di ahyet kinei sut yok pima ri. Yo, nogindini ne asu na ba, ahwen yok.>> 39 Lene Gaal hei sut tentara Sikhem ba, ihwen Abimelekh nya. 40 Noro Abimelekh nya ihwen noni kikau binang leu noho bei kep. Nimbiam krop kikau bipek kin dimbou pmem ei minu ndig dima nuhuigya. 41 Lene Abimelekh ngkwei hanyen kwei ei Aruma ba, bong kikau ei sirima. Leu api Zebul jji Gaal kin nide bat nya yahagom ba, yehei leu Sikhem. Apino bit bon ibong ei Sikhem bu kan bi.
42 Njapti kui lene timiei Sikhem yehei leu minu ndig dima ba, yuug ei ide ngoi dumti nya lo, bihi ipai sut gima nyahan bak Abimelekh. 43 Leu api Abimelekh nduk nide tentara ba, kwas yok ei nimpung bitaisi. Leu api injei biku yo nyahan ei ngoi dumti pima. Tirigi ngat lo, timiei Sikhem pima yuug ei ngoi dumti lene yehei leu iku yo eisi bihwen yok lene igyai nimai biyok. 44 Tirigi Abimelekh ya tut nide siceu ba, ibrim imig mem icoi ug ei dimbou pmem nuhui bigyati lene nide siceu nimpung can gi ter yuhuk yo di inang ug ei ngoi dumti nya bigyai nimai biyok. 45 Abimelekh kon pran bit yok kikau ei njap jei dima lene bindei timek minu ndig dima leu api yai biyati. Leu api yai nimai bak timiei minu ndig dima yahagom. Noni bindei sar minu ndig dima leu api ba nsim bibahap mpia dima.
46 Tirigi yo di ingat rin ei tentara nibousi di igya coi ngug tig di bikrop ttai Sikhem di iba ngug tig bicuon yok leu siceu nya imiap tut mun di buhun dima lene yahagom icoi ug ei dihyei mihyeti gom di itig ei ig kwar El-Berit nibehei ba, ibicuon igyaisi. 47 Noro bihi ipai sut bak Abimelekh bipia yo di iku yok ei tentara nibousi di igya coi ei ngug tig di bikrop ttai Sikhem pima no idem yam ei dihyei mihyeti dima. 48 Gima rino Abimelekh ya tut nide tentara nya ba, ikui ug ei Nungug Zalmon leu api ba oi birop biei ninda-nda nya ei nungug dima ba, kes ei ninghat dip lene bicuk yo di ibit nya <<Jiyai igbit diyaisi dini haninyai.>> 49 Lene bikwop tentara gom-gom rop biei nda nya lene ttei ba, bibit Abimelekh. Leu api inju biei nda dima yok keyam bikui sur mpia ser dihyei mihyeti di jo ig kwar nibehei dima nuhui dip a. Leu api indig biei nda ei mihyeti dima nuhui dip ser timiei Sikhem di ingat rin eisi apino yahagom imai ningwig ei sirima. Ba, yo di imai dima bitut pinai nya kin sop nya imangti ibou sribu gom.
50 Gima leu lene Abimelekh ug ei Tebes. Noni njei siceu bigyon ttai minu ndig dima lene bindei timek timiei nya leu api yai biyati. 51 Ig nut yam di jo-jo yam dip di ngkiem bibor gom jo ei minu ndig dima nahacan ngat. Apino timiei yahagom icoi bikui ug ei ig nut yam dima ninsi di nut yam leu api inggam mbou ser siceu nya lene ikui ug ei ig bou ninjek dip hu kwei. 52 Tirigi Abimelekh kwei ei sirima mem gima hwen ig nut yam dima lene noni ya kui dimbou hui bipi bindig, 53 noro sop gom njei tig huk gandum ba, cut bihwen Abimelekh nibou ngwak bibindei ba, nibou nggram him njum kimbo hacan hak. 54 Leu api Abimelekh jem pinai pilei di ttei kep nide minggwen haninyai kwei lene pai bak <<Akus ade simeda ba, abidat da bidimai hak ug. Dikou sut gima tungwatu ipai sut da bipia no di sop yai nimai bida a.>> Leu api pinai pilei dima dat noni rok him bu bimai. 55 Tirigi tentara Israel ingat lo, ide nibou ndig Abimelekh mai su lene yahagom ingkwei hanyen ug ei ide minu ndig nya.
56 Gima rino Allah buhup bak Abimelekh drek dip gi yai mun kinei sut nicig Gideon tug hon gi yai nimai bak nikindig bat-nikinjoi bat nya ibou ningot muhwindacan pima. 57 Nok gima cem Tuhan kes hukum ei mben Sikhem dip drek dip ide niyai mun kineisi. Mun dima dem igbit nisigion yokti di Yotam di Gideon nipmot ba neheng bikes ei yok dip pima.