Musa ngat nadi mem mben Israel
33
1 Nipou tirigi noni mai bigyo lene Musa di Allah pinak bak mben Israel ngat nadi tindei mun di kei mem yoni bipai,2 <<TUHAN tau kwei leu Nungug Sinai. Noni kiju leu minu Edom nok mpia di pri bipiga digai Nide limwa nya nok mpia di com kwei leu Paran cem. Nide malaikati nya ibou sribu simnai igya tut Noni lene hum di cig-cai ya kui ninda com.
3 Noni ningon ngakei Nide limwa nya biya srak ko hagau yo di ninyeng tak kep yok. Gima rino ikuk nye ei nimig him ba, ibit nicuk nyeti nya.
4 Nyeni ibit nicukti di Musa yai binye lewo nicukti dima bon ninyeng nindig bibor dor njiriek mun nindigsi di nyeni inyeng tut nya.
5 Tirigi mben Israel kin ide nibou nya imbus yam ei pima lene TUHAN ndo Nonti nok ide Nibou Ndig.>>
6 Lene Musa pai sut keret Ruben bipai,
<<Mbro nok gino keret Ruben imang bibor bi lo, yo di intun yok him mimai bingwig bi sren.>>
7 Lene noni pai sut keret Yehuda bipai <<TUHAN e, ma angig atingou mem ighyet tirigi yahara Nani. Abindei ba, inok gom kin isut bat keret nindigsi nya. TUHAN e, atti kin yok tirigi ikon pran ba, ampu yok tirigi ihwen ide siceu nya.>>
8 Lene noni pai sut keret Lewi bipai,
<<TUHAN e, ando igbit angon kanti binye tug hon Urim kin Tumimo di jo bak Ade awak keret Lewi di ingon gom nya. Abingon yok ei Masa lene awaisi yok ei minyei bousi Meriba.
9 Yoni ingon gom tut Nani nindig bibor leu gima ingon gom tut icig bat-ipmem bat nya kin ikindig bat-ikinjoi bat nya kin imunggwom bat nya yahagom. Yoni ibit acuk yokti nya ba, ingon gom tut mun po apreu ei mem yok pima.
10 Yoni mingginau Ade limwa nya leu binhyepo ibit Ade nicukti nya. Yoni mibui mindhe-ndhe nya bindig kep hum ei nimbar hum dokti.
11 TUHAN e, ampu keret dini leu binhyepo igyai nisindemti leu api ajoi sut ide midyai nya. Lene ma abindei ba, ide siceu nya yahagom imai bingwig leu api ikiju hanyen bi.>>
12 Lene noni pai sut keret Benyamin bipai,
<<TUHAN ningon ngakei keret Benyamin biya srak ko hagau yok bidem njap jei ba, Noni ningat rin bibong ei ikieti.>>p
13 Lene noni pai sut keret Yusuf bipai,
<<Handei kon ba, TUHAN mipinak bed di biang biget kwei kin minyei bousi di biam kwei leu dihyei jou mem yok.
14 Handei kon ba, bed di biang njita di ngat ningat mang bibor kin biei ngat ningat mang bibor ba, nggwop bidem biei ninyeng hagom mitau kep yok.
15 Handei kon ba, ide nungug tou nya di jo habiei ei nimbie him mimpung tut beisi di ngat ningat nindig bibor.
16 Handei kon ba, ide hanjop nsi mimpung tut mun nyeng di kei bibor hagom tug hon TUHAN po mbrap bit da tug hon biei mon di ninjeng cig-cai pima di ningon singat tut yok. Handei kon ba, mun di kei dini hagom mipek kep mem mben Yusuf lewo noni nok nibou ngwak mem nikindig bat nya.
17 Yusuf sindem nok sapi banteng nikre di tungwatu nya ipijuk kan bi ba, nibou nggai dem kep nok sapi nikre di niten-pos. Keret Manasye imangti ibou sribu-ribu lene keret Efraim imangti ibou sribu-ribu simnai ba, yahagom inok Yusuf de nibou nggai. Noni ba nibou nggai dima bidat ngkiai nya binjei yok bisar bingwig ug ei dihyei nohon keti.>>
18 Lene noni pai sut keret Zebulon kin keret Isakhar nya bipai,
<<Handei kon ba, keret Zebulon inyeng tut ndigban nindig bibor tirigi itri mun ibipek ndiyok ei muk ngwa dip. Handei kon ba, keret Isakhar inyeng tut mitiei nindig bibor tirigi igyai kep ide midyai nya ei ide ig bei.
19 Yoni ihig ngkiai di inyeng jei nya kwei ei ide nungug him ba, indig mindhe-ndhe nya ei nimbar hum dokti nok igbit bak TUHAN ei sirima. Muk ngeisi kin iggum di jo nipimat rinok nitriti mem ide ndigban kin ide mitiei.>>
20 Lene noni pai sut keret Gad bipai,
<<Jikwei ba, inggei sut Allah di pek hanjop nindig bibor bak yoni. Keret Gad gwam nyahan nok mindhe singa bibet ningon mem gima ham mindhe ninda kin nibou ngkek nok mikwau.
21 Keret Gad ima dihyei hanjop nsi di kei bibor mem yonti. Igyai hanjop nsi nok gi dem mem nibou ndig. Yoni ibit TUHAN nicuk yokti nya tirigi nibou mben Israel idem yam ei.>>
22 Lene noni pai sut keret Dan bipai,
<<Keret Dan nok mindhe singa di nehen pap di pri-pri nyen kwei leu minu Basan.>>
23 Lene noni pai sut keret Naftali bipai,
<<TUHAN ningon singat tut keret Naftali biyai mun di kei mang bibor biyoni. Ide dihyei hanjop nsi ninyanti ug bipek Igpong Galilea kikau ug bipek mpia nibiho.>>
24 Lene noni pai sut keret Asyer bipai,
<<Keret Asyer yai gi kei nindig bibor dor njiriek mben nindigsi nya. Handei kon ba, ikindig bat-ikinjoi bat nya yahagom ingon nggriu sut yoni ba, ide biei zaitun ngat ningat nindig bibor ei ide hanjop nsi cem.
25 Iba ngkimom nitu bibon dimbou di itu ei ngug tig di bikrop ttai ide minu nya hagom cem. Leu binhyepo mun di kinei micut igkep yok bi ba, ibong kei igwam kei kikau.>>
26 <<Je di mben Israel e, kwar di jikuk je bak hi noyam kin jide Allah bi. Lewo Allah ya bidem mpia-bbed him ba, ttau bumbuhuiti kwei leu binhyepo kwei bimpu je.
27 Jiya coi Noni dem kep nok jiya coi tring behei ninno tu lene ninda di sindem hati tut je bijo ninno bijo kikau. Tirigi jimbut-mbut nyen pima lene Noni njei jide siceu nya sindam ei joho bei bicuk je bipia suar jihwen yahagom bingwig ug.
28 Gima rino Yakub de nintun him yamti di bram yam nya ibong kei igwam kei ei dihyei hanjop nsi di mpung tut gandum kin ba anggur ningei. Ide dihyei ninjek dip hagom nnum bibor tug hon nggou di cut kwei leu mpia-bbed him.
29 Je di mben Israel e, ma jingon llei bibor! TUHAN teu je tu. Mben nindigsi ei dihyeisi dini hi noyam kin jeni bi. Lewo TUHAN Nongkom rinok jide simeda kin jide mun di jibipukep ser tibor ninggwenti nya. Noni miya srak ko hagau je leu api jide siceu nya micut bije. Yoni mikwei kuk yok ei jimig him ba, miyahara ser je noro mijico kep yok bingwig hak ug.>>