Musa ug yai Nicukti Simnai gi nimbican bu
(Kel. 34:1-10)
10
1 <<Lene TUHAN cuk da bipai <Ma abon tig mma di noyam kin tig mma timiei can pima ba, abon brua gom mem gima ayok tig hacem eisi cem. Lene ma akui nungug kwei ba, aya ei Doho bei ei mbigdip dini. 2 Lene midipas kep nicukti pima ei tig mma dimati noyam kin nicukti po jo ei tig mma timiei po abindei ba, ki kukiau pima. Lene ma akes tig hacem bijo ei brua pimati.>3 Lene diba biei meng dia bibon brua ningat gom cem dibon tig mma di noyam kin tig mma can di nipou pima bidittei ba, duug sut ei mbigdip dima. 4 Lene TUHAN pas kep Nide nicukti Simnai ei tig mma can dimati bit leu nok Noni pas kep nipou pima. Nicukti dima noyam kin nicukti di Noni tri tut bije tirigi po nihyet tibim kwei leu hum di cig-cai mem njap po jinduk yam ei nungug kiou pima. Lene Noni kes tig mma can dima ei dindati. 5 Ba, dikiek da lene dijuk leu nungug dip kwei. Lene diyok tig mma hacem ei brua nsi di dibon pima bit leu nok TUHAN nicuk dati. Tig dima hacem jo ei brua nsi kikau kwei bipek ammani kep.
( 6 Mpe dima ne mben Israel ijo leu timiei Yaakan ide minyei bousi nya ba, yuug bong ei Mosera. Lene Harun niyaijo ngwig hon ei sirima ba, itig lene nipmot Eleazar ya luei nohoti nok imam bu. 7 Lene ijo leu minu dima ba, yuug ei Gudgod ba, imbut kikau biyuug ei Yotbata di nok mpia di bon minyei bousi nya mang bibor. 8 Ei nungug dima lene TUHAN dimig pinai nya leu keret Lewi ba, ta yok nok yo di inyohou Brua Gi Preu ba, igyai midyai nok imam nya ba, ingat nadi tindei mun di kei mem TUHAN de limwa nya tug hon ninyeng cem. Yo dima igyai kep midyai dima kikau kwei bipek ammani kep. 9 Gima rino keret Lewi iba yokep dihyei hanjop nsi dem kep nok keret nindigsi iba yokep ei minu dima bi. Lewo yongkom he rino itug ndei nituti mem igyai midyai pijum nok imam mem TUHAN bit leu nok TUHAN di nok jide Allah preu ei mem yok tu.)
10 Lene dibong ei mbigdip dima mem mmun-njap nyatungwacan bit leu nok gi nipou pima ba, TUHAN ngig nitingou mem dihyet mbigom kin bu bice tut bipia Noni micok tut je bi. 11 Lene Noni cuk da bipia suar dibie tut je leu binhyepo jicoi ug ei minu di Noni preu ei mem jidigup bat-jidigai bat nya ba, jiyai bijiyati.>>
Mun di TUHAN joi sut leu nide limwa nya
12 <<Je di mben Israel e, nogindini ma jingig jitingou mem mun di TUHAN di nok jide Allah joi sut leu je. Ma jiba jibou coi mem Noni ba, jibit nicuk jeti nya ba, jingon ngakei Noni ba, jiba jingon titut biyai kep Nide midyai nya cem. 13 Ma jibit Nide nicukti nya di ditri tut bije njap di ammani leu binhyepo bahati tut jenti. 14 TUHAN di nok jide Allah nyeng tut mpia-bbed him di jo anai kin dihyeisi dini bitut mun di joti nya hagom. 15 Noro ningon ngakei jidigup bat-jidigai bat nya nindig bibor ba, dimig je leu mben nindigsi nya hagom ba, jinok Nide limwa nya kikau kwei bipek ammani kep. 16 Gima rino hon kep ammani kui ma jibit TUHAN nihyet. Lene ma jingkek ndok bu au. 17 TUHAN di nok jide Allah ninyeng jei dor njiriek kwar di tungwatu nya ikuk yok bak nya kin nisindemti nya hagom. Ma tungwatu nya ibit nihyet lewo ninyeng jei ba, Noni sindem bibor cem. Noni mbus nggok tungwatu nya ba, ce tut hi ba mitiei bingot kep Noni bi. 18 Noni hati tut moibihi nya kin sop kibom nya bibindei ba, tungwatu nya ibibon yok nok igbit. Ningon ngakei ngkiai nya di ibong srig jikieti bikwas njita kin sinsun tut yok. 19 Gima rino ma jingon ngakei ngkiai dima yok lewo jeni cem jibong jingkiaisi ei minu Mesir nipou su. 20 Ma jiba jibou coi mem TUHAN di nok jide Allah bijikuk je bak Noni Nongkom. Ma jingon gom tut Noni ba, jipreu ei kin neheng tug hon Nongkom ninyeng cem. 21 Ma jinggei sut Noni lewo Noni ne TUHAN di nok jide Allah ri. Noni bibon mun di mindur nindig bibor kin mun di bindei ba, jinga leu Noni tut mem je bou jiyai him tu. 22 Tirigi po jidigup bat-jidigai bat nya yuug ei minu Mesir nipou pima lene imangti ibou ningot muhwindacan he. Noro nogindini TUHAN di nok jide Allah bindei ba, jimangti dem kep nok ham mpia-bbed him nimangti tu.>>