Mben Israel ibit Allah nicuk yokti bi
9
1 <<Je di mben Israel e, njap di ammani mijisigon Minyei Yordan leu binhyepo jicoi ug ei minu di ngkiai nya ide ug ri. Ide mben nindig bibor ba, isindem bibor cem. Ide minu di iwin nya nindig krop lene ngug tig di jei bibor sur mpia-bbed him bikrop ttai hagom. 2 Timiei minu dima intig bou jei anjan ba, isindem bibor. Lene jimiap tut gi tungwatu nya ipui kep inghapti bipia bit bon mben hi hwen yok bingwig kan bi. 3 Noro mijingat bou jiyai him bipia TUHAN di nok jide Allah miya bibie joho njap di ammani ba, Noni minok hum di cig-cai. Noni mihwen yok bingwig sindam tirigi jikieng kep ide minu. Apino mijijji yok ba, mijihwen yok bingwig haninyai bit leu nok Noni preu ei mem je tu.4 Niabiati TUHAN di nok jide Allah hwen mben dima bingwig leu je lene ma jikan bipia TUHAN buwak nye kwei ba, nikieng kep minu dini drek dip nyende nikwes-kwausi e? Nok bi! Noni mihwen yok bingwig leu je drek dip ide nisibut biborti. 5 TUHAN misindui sut jeni bijiyai ide minu bijiyati tug hon jide nikwes-kwausi kin gi jibit Nonti ningon kanti nya bi. Noni mihwen yok bingwig leu je drek dip ide nisibut biborti ba, Noni yai igbit mun po Noni preu ei mem jidigup bat-jidigai bat di Abraham kin Ishak kin Yakub nya cem. 6 Ma jiyok ngon kep bipia TUHAN di nok jide Allah yai minu di nnum bibor dima bije drek dip jide nikwes-kwausi bi. Nok bi! Lewo jinok mben di ingkek ndok.
7 Ma jiyok ngon kep notou jibindei ba, TUHAN di nok jide Allah ningon sibui sut je ei iggum ndigsi pima. Habiei tirigi jingwes ngun leu minu Mesir kikau kwei bipek njap dino jikwei krau mpia dini lene jahagom jiyai munti hwen bit Noni. 8 Nok gima ei Nungug Sinai cem. Jibindei ba, ningon sibui sut je ei mpia dima apino Noni bungwam mem gima bindei sar jahagom. 9 Mpe dima ne dikui ug ei mbigdip dima leu binhyepo duug yai tig mma can po Noni pas kep mun di Noni preu ei mem jeni eisi pima. Lene dibong ei mbigdip mem mmun-njap nyatungwacan lo, diyem njita ba, didut minyei bi. 10 Lene Noni yai tig mma can po Noni pas kep nicuk nyeti nya eisi pima bida. Noni pas kep mun di Noni cuk je tut tirigi po nihyet tibim kwei leu hum ninggimau mpe di po jidem yam ei nungug nikiou pima. 11 Jit, Niabiati dibong mmun-njap nyatungwacan pima bingwig lene Noni yai tig mma can po pas kep mun di Noni preu ei mem je eisi pima bida.
12 Lene Noni pai bida <Abipbur ba, ajuk hanyen ndam ade limwa nya di abuwak yok kwei leu minu Mesir ug lewo icut ei sisarti ba, ingon rom tu. Yoni ikriek leu puig di dindo biyok ba, ibibon kwar bikuk yok bak tu.>
13 Lene Noni pai bu bida <Dikan tut bipia mben dima ingkek ndok bibor. 14 Ma abigen ser dingon kanti gom dini au. Mbigom midicok tut yahagom bingwig ug rin leu binhyepo tungwatu dihyeisi dini mibbwe ser yok bihigom. Lene midibindei ba, nani kin yo di intun nani him jahagom mijinok mben nindig bibor ba, sindem bibor cem bijiya luei yohoti.>
15 Gima rino dikiek da bidingkwei hanyen ba, dijuk leu mbigdip di hum njeng cig-cai dima bidittei tig mma can di Allah pas kep mun di Noni preu ei mem je eisi. 16 Lene dingat bou diyai him bipia jipigau nicukti po TUHAN di nok jide Allah tri tut bije pima ba, jibon sisar tut Noni tug hon gi jiba mas bibon kwar di nok sapi bijikuk je bak. 17 Gima rino diba tig mma can dima bihwen mpia apino hacem ki kukiau. 18 Lene dikuk da bidiba dingwak bikik dihyei ei TUHAN Noho bei mem mmun-njap nyatungwacan bu bidiyem njita ba, didut minyei cem bi. Diyai nok gima lewo jibon sisar tut TUHAN bijibindei ba, ningon sibui sut je. 19 Lewo didigit tut Nide ningon di sibui sut jeti di cig-cai nok hum di mibindei ba, Noni mihwen je bijingwig cem. Noro mpe dima ne Noni miap dihyet mbigom bu. 20 Mpe dima ne ningon sibui sut Harun cem ba, kos tut bipia mikes hukum nimai ei noni dip. Gima rino dingat nadi mem Harun cem. 21 Lene duug yai kwar di jiba mas bibon noyam kin sapi nikre pima ba, dindig kep hum ba, jet. Lene didram hagom kukiau ba, ndung leu api dicom nindung dima ei minyei di biam kwei leu nungug dimati.
22 Nok gima cem jibindei ba, TUHAN ningon sibui sut je tirigi jibong ei Tabera kin Masa kin Kibrot-Taawa. 23 Tirigi po Noni cuk je bipia ma jijo leu Kades-Barnea leu binhyepo jimbut bijicoi ug ei minu di Noni miyai bije pima lene jaham jimbuk kep Noni. Lene jiba jingon com Noni ba, jibit nihyet bi. 24 Habiei tirigi po dittau kep je ei minu Mesir kikau kwei bipek ammani kep lene jikiek jimig jou tut TUHAN.
25 Gima rino dikuk da bidiba dingwak bikik dihyei ei TUHAN Noho bei mem mmun-njap nyatungwacan pima lewo dikan tut bipia Noni bungwam mem gima mihwen je bijingwig. 26 Lene dingat nadi tindei je bidipai <<TUHAN Di Ninyeng Jei Bibor e, ma acok tut Ade limwa nya po ateu yok bingwes ngun ba, abuwak yok kwei leu minu Mesir tug hon Ade nisindemti di nindig bibor pima au. 27 Ma ayok ngon kep Ade awak di Abraham kin Ishak kin Yakub lene ma ayok ngon kep yo dini ide ningkek ndokti kin ide nisibut biborti kin ide sisar au. 28 Gi bi lene mben Mesir misimbot kep biyam bipia asindem mem gima abuwak Ade limwa nya kikau ug ei minu di apreu ei mem yok nipou su bi. Yoni misimbot kep biyam bipia abuwak Ade limwa nya ug ei iggum ndigsi leu binhyepo acok tut yok bingwig lewo angon mpo tut yok. 29 TUHAN e, ma ayok ngon kep bipia yo dini ne mben gom di adimig ei binok Ade limwa nya leu api aba Ade nisindemti di nindig bibor bibuwak yok kwei leu minu Mesir ri.>>