Nicukti tut nibou nya ide munkwas
7
1 Mpe dino Musa ngot TUHAN De Prak Meng biput tu lene ipiga Prak Meng dima ei bitut nimbumbati nya hagom tug hon mini nibon midut di ibidip hagom. Igyai nok gima cem tut nimbar hum dok kin nimbumbati nya. 2 Leu api nibou mem nide bat nya di intun keret mben Israel him po ibuhup tut gi ipas kep limwa nya imangti pima, 3 ittei ide munkwas pijum bak TUHAN. Ba ikri kroba nindig ningat muhwindagom kin sapi ningut simnaibrimigcan ug ei TUHAN Noho bei ba, kroba nindig ningat gom mem bikwop nibou nya ibou can ba, sapi ningut gom mem bibikwop nibou gom-gom lene nok. Tirigi ikwas mun dima yok leu su, 4 lene TUHAN pai bak Musa, 5 <<Ma ayai munkwas dima yok hagom leu yok ba, ayai bak Lewi nya mem ibiyai midyai nittei Ditde Prak Meng di dindo biyok tu.>> 6 Lene Musa kes kroba bitut sapi dima yok hagom bak Lewi nya. 7 Noni yai kroba nindig ningat can kin sapi ningut bitai bak Gerson nide bat nya ba, 8 kroba nindig ningat bitai kin sapi ningut muhwindaningai bak Merari nide bat nya bit leu midyai di igyai kep nya ba, Imam Harun nipmot Itamar ne mindor di bie tut yok ri. 9 Noro Kehat nide bat nya igyai kroba nindig kin sapi leu Musa bi lewo suar yoni ikon ndigban di kwes-kwau di yahati tut nya ei inghat dip bimbut tut.10 Nibou pima yok ittei munkwas cem mem nibon midut nipiga nimbar hum dokti. Tirigi itin ei mem gima ittei ide munkwas bigya tut kui nimbar hum dok nuhui, 11 lene TUHAN pai bak Musa <<Apai biyok bipia suar bikwop ibou simnaibrimigcan dima hi dimig nide munkwas pijum ei mem nibon midut nipiga nimbar hum dok sindam ei nijam njap simnaibrimigcan dima.>>
12-17 Bikwop ide munkwas nya nimangti noyam ba, nidem yamti rinok gini. Den di iba perak bibon di nibuhunti kilo gom biniken ningat gom kin bokor di iba perak bibon di nibuhunti kilo niken bit leu nok nibok di ikrau kep ei TUHAN De Prak Meng nsi. Lene itau tepun di iba mini bisrigsi ba, ut hak ei mun nyeng can dimati mem nibon midut njita nibipai sigyo bak Allahti. Lene munkwas hi kin bu ne den di iba mas bibon di nibuhunti kilo gom biniken kin biei nggrai di ui-gwang kei ut eisi kin sapi nikre nipmot bo ningut gom kin domba nikre ningut gom kin domba pmot di nide njap dem ari bingwam gom ningut gom ba, hagom mem nibon midut nindig mindhe titut kep humti kin kambir nikre ningut gom mem nibon midut nibiyai nikos ser sisarti kin sapi nikre ningut can kin domba nikre ningut muhwi kin domba di nide njap dem ari bingwam gom ningut muhwi ba, hagom mem nibon midut nibiyai ningon kwes kin TUHANti ri.
Nahason di Aminadab nipmot di ntun keret Yehuda him ttei nide munkwas pima kwei ei njap gi nigom. 18-23 Lene Nataneel di Zuar nipmot di ntun keret Isakhar him ttei nide munkwas pima kwei ei njap gi nican. 24-29 Lene Eliab di Helon nipmot di ntun keret Zebulon him ttei nide munkwas pima kwei ei njap gi niningai. 30-35 Lene Elizur di Syedeur nipmot di ntun keret Ruben him ttei nide munkwas pima kwei ei njap gi nibitai. 36-41 Lene Selumiel di Zurisyadai nipmot di ntun keret Simeon him ttei nide munkwas pima kwei mem njap gi nimuhwi. 42-47 Lene Elyasaf di Rehuel nipmot di ntun keret Gad him ttei nide munkwas pima kwei mem njap gi nimuhwindagom. 48-53 Lene Elisama di Amihud nipmot di ntun keret Efraim him ttei nide munkwas pima kwei mem njap gi nimuhwindacan. 54-59 Lene Gamaliel di Pedazur nipmot di ntun keret Manasye him ttei nide munkwas pima kwei mem njap gi nimuhwindaningai. 60-65 Lene Abidan di Gideoni nipmot di ntun keret Benyamin him ttei nide munkwas pima kwei mem njap gi nimuhwindatai. 66-71 Lene Ahiezer di Amisyadai nipmot di ntun keret Dan him ttei nide munkwas pima kwei mem njap gi nisimnai. 72-77 Lene Pagiel di Okhran nipmot di ntun keret Asyer him ttei nide munkwas pima kwei mem njap gi nisimnaibrimiggom. 78-83 Lene Ahira di Enan nipmot di ntun keret Naftali him ttei nide munkwas kwei mem njap gi nisimnaibrimigcan.
84 Munkwas di ibou simnaibrimigcan dima ittei kwei ba, idimig pijum ei mem TUHAN mem ibipiga nimbar hum dok nimangti hagom sok yam ei rinok gini. Den di iba perak bibon ningat simnaibrimigcan kin bokor di iba perak bibon ningat simnaibrimigcan kin den di iba mas bibon ningat simnaibrimigcan. 85 Bikwop den di iba perak bibon nibuhunti kilo gom biniken lene bikwop bokor di iba perak bibon nibuhunti kilo niken. Ba, den kin bokor hagom nibuhunti sok yam kilo ningot can ba, muhwindacan biniken bit leu nok nibuhunti di ikrau kep ei TUHAN De Prak Meng nsi. 86 Bikwop den di iba mas bibon bitut biei nggrai di ui-gwang kei di joti nibuhunti kilo niken ba, den dima hagom nibuhunti sok yam kilo gom biniken bit leu nok nibuhunti di ikrau kep ei TUHAN De Prak Meng nsi. 87 Sapi nikre nya ningut simnaibrimigcan kin domba nikre nya ningut simnaibrimigcan kin domba pmot di ide njap dem ari bingwam gom nya ningut simnaibrimican di ijem kwei mem nibon midut nindig mindhe titut kep humti nimangti ningut ningot ningai ba, muhwindagom bitut gandum ngan mem nibon midut njita nibipai sigyo bak Allahti. Lene iba kambir nikre ningut simnaibrimigcan bibon midut nibiyai nikos ser sisarti. 88 Sapi nikre nya ningut ningot can ba, bitai kin domba nikre nya ningut ningot muhwindagom kin kambir nikre nya ningut ningot muhwindagom kin domba pmot di ide njap dem ari bingwam gom di ijem kwei mem nibon midut nibiyai ningon kwes kin TUHANti nya ningut ningot muhwindagom. Iba mindhe-ndhe dini yok hagom bipiga nimbar hum dok ei niabiati iba mini nibon midut biprok nimbar dima tu.
89 Bikwop mpe di Musa coi ug ei TUHAN De Prak Meng nsi bimbrap bit TUHAN lene noni miap TUHAN nihyet di tibim kwei leu Brua Gi Preu nibeng dip ei keruba cin ikieti.