Nicukti tut yo di inggre kin nimpung nazir
6
1 TUHAN cuk Musa, 2 biyai nicukti dini yok bak mben Israel. Bikwop no di pinai kin no di sop di preu ei tug hon neheng bipia dimig niyaijoti pijum ei mem TUHAN tug hon gi nggre kin nimpung nazir, 3 lene ma no dima dut ba anggur ngei kin pes di ten di iba ba anggur ngat kin biei ngat nindigsi nya bibon au. Ma noni yem ba anggur ngat di ngun kin gi ngak cem au. Lene ma yem mun nyeng hagom di iba ba anggur ngat bibon, 4 kin mun nyeng hagom di ntun ba anggur him au. Bitut ba anggur ninjep kin ningkek cem lene ma yem au.5 Tirigi noni nggre kin nimpung nazir tug hon neheng pima lene ma kos nibou nta leu ba, kak nibou nta cem au. Ma noni bet nibou nta kin nuhui nta ei mem nijam dima ba, jei ug. Lewo neheng pima ngot kep noni kikau bibou nijam di dimig niyaijoti pijum ei mem TUHAN ngwig ug e. 6 Ma no dima dideu nimai ngut mem nijam di dimig niyaijoti pijum ei mem TUHAN au. 7 Nok gino nicig ningut kin nipmem ningut kin nide adig-ajoi nya ingut rin lo, ma dideu ba, bindei map kui noti au. Lewo nibou nta ne mun di bindo bipia noni dimig niyaijoti pijum ei bak Allah ri. 8 TUHAN ninyeng tak kep no dima niyaijoti pijum mem nijam titut di noni nggre kin nimpung nazir pima.
9 Gino no di preu ei tug hon neheng bipia dimig niyaijoti pijum ei mem TUHAN pima bindei ba, map kui nibou nta drek dip gi ningat rin dideu no di mai di cut bitot hak kros lene ma gwam kikau ei njap muhwindacan. Gima leu api kak nibou nta kin nuhui nta leu. Tug hon nisinati dima lene noni pwoi hanyen. 10 Ei njap gi nimuhwindaningai lene suar noni krau hakimoi mbrei ningut can e, he ha tekukur ningut can e, buug sut biya kui dimbou ei TUHAN De Prak Meng nuhui biyai bak imam. 11 Suar imam dima bui ha dima ningut gom bindig kep hum nok mun di ibui bibam mem nibon midut nibiyai nikos ser sisarti. Lene noni bui bibam gi hi dima mem nibon midut nindig ha titut kep hum. Tug hon nisinati dima lene imam bon midut nipiap no dima bipwoi hanyen. Ei njap dima cem suar bet nibou nta pijum ei mem TUHAN hanyen. 12 Lene ma no dima dimig nonti pijum hanyen ei mem TUHAN nok no di nggre kin nimpung nazir hanyen bu. Lene ikwop nijam nazir di njiriek leu su pima bu bi lewo map di kui noni bidip tut tu. Suar noni jem domba pmot ningut gom di nide njap dem ari bingwam gom tu mem nibon midut nibikum TUHAN de ningwam.
13 Gino nijam di no dima nggre kin nimpung nazir pima ngwig leu su lene suar ibon midut dini jug gau noni. Suar ibuwak noni biya kui dimbou ei TUHAN De Prak Meng nuhui. 14 Lene bijem mindhe nihyen kep di kinei bi ningut ningai bak TUHAN. Domba pmot nikre di nide njap ug ei ari bingwam gom ningut gom mem nibon midut nindig mindhe titut kep humti kin domba pmot niwek di nide njap ug ei ari bingwam gom ningut gom mem nibon midut nibiyai nikos ser sisarti kin domba nikre ningut gom mem nibon midut nibiyai ningon kwes kin TUHANti. 15 Suar noni ba tepun kin mini zaitun di roti ninjep srigsi bi bikang roti di kimor kin roti di dile di ba mini zaitun bidip leu api yok hagom ei bansi gomti kwei. Bitut gima lene ma noni pwoi mun di imam suar mem nibon midut njita nibipai sigyo bak Allahti kin nibon midut nisiber mini zaitun ei TUHAN Noho bei cem kwei.
16 Suar imam ttei mun dima yok hagom ei TUHAN Noho bei leu api bon midut nibiyai nikos ser sisarti kin nibon midut nindig mindhe titut kep humti. 17 Ma imam bui domba nikre ningut gom pima mem nibon midut nibiyai ningon kwes kin TUHAN bikrau roti bansi gom pima bisu bak Noni. Lene ma imam bon midut njita nibipai sigyo bak Allahti kin nibon midut nisiber mini zaitun ei TUHAN Noho bei cem.
18 Lene suar no di nggre kin nimpung nazir kak nibou nta di bet ei pima leu ei dimbou TUHAN De Prak Meng nuhui dima bicom ei hum di yem kikep mindhe di ibui bindig kep hum.
19 Gima leu lene gino ingei domba nikre pima binem-nnai tu lene ma imam yai ninda pang gom kin roti nindak gom kin kue di dile gom leu bansi pima bikes ei no di nggre kin nimpung nazir pima nindati. 20 Leu api imam su njita dima nok mun di ipigig sut pijum ei bak TUHAN. Gi hi dima ne mun di kwes-kwau di imam ma bou no nok nide. Ba, gini kum ei domba nikre ningget kin nindimuhum di imam ma bou no nok nide bit leu nicukti nindoti. Gima leu ug api isindui sut ba, no di nggre kin nimpung nazir pima midut ba anggur ngei hanyen.
21 Gini ne nicukti mem no di nggre kin nimpung nazir ri. Noro gino no di preu ei tug hon neheng dima dimig mun di dor njiriek nicukti dima ei lene suar noni yai igbit neheng tutti dima hagom biput.
Imam nya ingat nadi tindei mun di kei mem mben Israel
22 Lene TUHAN pai bak Musa, 23 <<Ma ambrap bit Harun kin nipmot bat nya leu binhyepo tirigi ingat nadi tindei mun di kei mem mben Israel lene ma indat kep,
24 Handei kon ba, TUHAN njei mun di kei bak jeni binyohou je.
25 Handei kon ba, TUHAN ningon nggriu sut jeni bisingat tut je.
26 Handei kon ba, TUHAN ngondut jeni bibindei ba, jingon jo nyahan.>>
27 Lene TUHAN binut bu bipai <<Gino imam nya indat kep dinyeng gau mben Israel tirigi ingat nadi tindei mun di kei mem yok lene midinjei mun di kei bak yoni.>>