Nisinati tut ninyohou mini njeng nidihimti
(Kel. 27:20-21)
24
1 Lene TUHAN cuk Musa, 2 bipai sut nicukti dini yok bak mben Israel. Ma jittei mini zaitun di pimbai bibor kwei mem mini njeng nidihim di jo ei TUHAN De Prak Mengti leu binhyepo jibitin mini binjeng bikwop mmun. 3 Suar Harun tin mini njeng dima mem mmunti kikau ug bipek njap tekti ei TUHAN Noho bei ei sinsun mbrawin di binggai ser Brua Gi Preu ei Ninsi Di Kwes-Kwau bei nisai. Suar jibit nicukti dima bijo ninno bijo kikau. 4 Suar Harun nyohou mini njeng nya di njeng ei nidihim di iba mas di kwes bibonti leu binhyepo njeng bikwop mmun ei TUHAN De Prak Mengti.Roti di ipigig sut ei mem TUHAN
5 Ma jiba tepun di kei bibor kilo simnaibrimigcan bibon roti nindak simnaibrimigcan ba, nindak gom nibuhunti kilo gom ngat bibikwop nok. 6 Ma jikes roti dima ei nipuig canti ba, bikwop nipuig can dima bon nide roti nindak muhwindagom di jo simiak yam ei meja dip di jiba mas di kwes binggai ei TUHAN De Prak Mengti. 7 Ma jikes biei nggrai di ui-gwang kei ei roti nipuig can pima dip nok mun di bindo tut bipia roti dima ndrim hi leu nibon midut njita nibipai sigyo bak Allahti bou TUHAN niyai him. 8 Ma jidis roti dima ei TUHAN Noho bei ei Nide Prak Mengti bikwop Njap Nigwam Kep Ninghuisi. Suar je di mben Israel jibon kep niyai munti dini bijo ninno bijo kikau. 9 Roti dima mem Harun kin nide nintun him yamti di bram yam nya. Suar yoni igyem roti dima ei mpia di kwes lewo roti dima ne roti poi di kwes-kwau leu nibon midut njita nibipai sigyo bak Allahti bou TUHAN niyai him pima rin ba, imam nya yongkom he igyem kep roti dima.
Hukum Mem Yo Di Isigion Allah kin yo di ibuhup ningon sibui sut yamti
10 Mpe dima lene pinai gom di ningat rin bit mben Israel ei prak meng yati nicig ne mben Mesir lo, nipmem Selomit ne mben Israel di bon nicig ninyeng Dibri di ntun keret Dan him ri. 11 Ei njap gom lene pinai dima srep huk tungwagom leu Israel ei ide prak meng yati dima. Hammi tirigi isrep huk yam nok rino pinai dima sigion Allah. Gima rino mben Israel ibou poi ibuwak noni ug ei Musa noho bei. 12 Lene ikat noni ei sirima ba, ibimem kep ser TUHAN nikos tutti tut notou iba hukum noni.
13 Lene TUHAN pai bak Musa, 14 <<Ma abuwak no dima ug ei prak meng yati nisai lene suar bikwop yo di imiap nisigionti pima yahagom ikes inda ei no dima nibou nggram him dip nok bindo di bindo bipia no dima bon mun tunggwei su. Leu api suar limwa nya yahagom iba tig bihwen noni bimai hak. 15 Gima leu ug api atri tut dikos tutti dini bak mben Israel. Tungwa tou rino sigion Allah lene suar biang nisigionti dima nibuhunti ba, 16 tug ndei hukum nimai. Bikwop tungwa tou rino sigion TUHAN lene suar limwa Israel yahagom iba tig bihwen bimai hak. Hukum dima micut igkep mben Israel kin ngkiai nya di ibong timiei ei Israel yahagom drek dip ide nisigion TUHANti.
17 Tungwa tou rino kimukep hiter lene suar jikes hukum nimai ei noni dip hak ug. 18 Tungwa tou rino bisinggre bibui hiter nide mindhe lene suar tug mindhe hanyen bak niceu. Nicukti di bigo mem gima ne ninnei luei ninnei ri.
19 No di bindei ba, hiter bok-ba lene suar jibindei bok-ba no dima hanyen drek dip niyai munti dima hak ug. 20 Gino noni bindei dahat hiter ninjum lene suar jidahat ninjum de cem drek dip. Gino bindei tu hiter niyai igdo hi lene suar jibindei tu noni cem niyai nite hi tan. Gino bui hiter bibindei ba, nikwai mbo lene suar jibindei mbo nikwai de cem. Mun mindei rino tungwagom bon bak yo di hiter di bindei kinei ingut nimbumbati hi lene suar jibon bak noni cem drek dip nibon munti dima ba, jibitak kep. 21 Tungwa tou rino bisinggre bibui mindhe lene suar tug mindhe hanyen bak niceu. Noro tungwa tou rino kimukep hiter lene suar jikes hukum nimai ei noni dip hak ug. 22 Hukum dima dem mem jahagom. Bitut je di mben Israel kin ngkiai nya di ibong timiei ei jikieti cem jahagom. Lewo Dani ne TUHAN ba, jide Allah ri.>>
23 Lene tirigi Musa tri tut nihyet dima bak mben Israel leu su lene yoni ibuwak no di sigion Allah pima ug ei prak meng yati nisai leu api iba tig bihwen noni bimai. Tug hon nisinati dima lene mben Israel ibit TUHAN nicuk Musati tu.