Nibon midut kep njap ndig nya
23
1 Lene TUHAN pai ningon kanti bak Musa, 2 tut njap tto bou mem gima ibon midut njap ndig nya di bon nituti mem mben Israel induk yam ei bikuk yok ei TUHAN Noho bei. 3 Ma jiyai kep jide midyai nya ei njap nitindur muhwindagom. Lene ma jiyok ngon kep bipia njap gi nimuhwindacan ne Njap Nigwam Kep Ninghuisi mem gima jigwam kep jinghuisi ri. Harin dima jiyai kep jide midyai nya mem njap dima a. Noro ma jinduk yam ei bijikuk je ei Doho bei. Njap gi nimuhwindacan nok Ditde njap mem je ei jibong kepti nya hagom. 4 Gini ne njap tto bou mem nibon midut nya di dindo bije ri. Ma jitri tut hagom bak mben Israel.Nibon midut Njap Ndig Paskah kin Njap Ndig Roti Di Dwoi Bi
(Bil. 28:16-25)
5 Ug ei bed gi nigom ba, njap gi nisimnaibrimigtai lene ma jikinyon ei nibon midut Njap Ndig Paskah mem mpia nikimbasti leu binhyepo jibikon dinyenga. 6 Lene ug ei njap gi nisimnaimuhwidip lene ma jikinyon ei nibon midut Njap Ndig Roti Di Dwoi Biti. Mpe dima lene ma jiyem kep roti di dwoi kikau mem mmun-njap muhwindacan au. 7 Ma jinduk yam ei bijikuk je bak Da di TUHAN ei njap gi nigom leu njap nitindur muhwindacan pima lene ma jiyai kep jide midyai di buhun nya au. 8 Ma jibon midut njita nibipai sigyo bak Allahti kikau bikwop njap nitindur muhwindacan. Lene ma jinduk yam hanyen ei bijikuk je biDa mem njap gi nimuhwindacan noro ma jiyai kep jide midyai di buhun nya bikwop njap dima cem au.
9-10 Gino mben Israel yuug krau minu di dindo biyok tu ba, ike ide gandum barli nintam keyam lene ma ikon barli nintam ningot gom bigyai bak no di imam. 11 Lene ma imam dima kon gandum nintam dima bijo nai ei Doho bei mem las gom tirigi Njap Nigwam Kep Ninghuisi kimbas leu su nok mun di bon ninyeng mem Da. Leu api midijoi sut yok. 12 Njap dino jikon gandum nintam dima bijo nai ei Doho bei lene ma jibui domba nikre di nehen pap di nide njap ug ei ari bingwam gom he di bok-ba bi mem nibon midut nindig mindhe titut kep humti cem. 13 Bitut tepun di nibuhunti kilo can di mini zaitun srigsi cem. Lene midijoi sut ninghap di ngge kei dima. Mpe dima cem ma jitau ba anggur ningei ampou nuut gom kwei biDa. 14 Ma jiyem kep jide gandum nijep-jau nipou tirigi jikwas mun pini yok hagom tut Da bigyo au. Nok gandum di ngun kin gi jibam kin gi jinon nok roti cem au. Suar dicuk jeti dini jo kikau mem jide nintun him yamti di bram yam nya cem leu binhyepo ibit gini bijo ninno bijo kikau.
Nibon midut Njap Ndig Nike Gandum Nintama
(Bil. 28:26-31)
15 Lene las gom po jikon gandum nintam ningot gom kwei bijo nai ei Doho bei pima ngwig leu su lene ma jikwop ug ei ari nitindur muhwindacan bu. 16 Tirigi Njap Nigwam Kep Ninghuisi nimuhwindacan pima ngwig leu ba, njap dihyep tau bu ne njap dima gi ningot muhwi ri. Lene ma jikon jide gandum nintam ningot gom di nijep bu kwei bijo nai ei Doho bei. 17 Lene ma bikwop ig ceu gom-gom kon roti nindak can kwei bijo nai ei Doho bei nok mun di bon ninyeng mem Da. Ma iba tepun kilo can di roti ninjep srigsi binon roti nindak gom lene nok. Gini ne mun di ikwas leu ide gandum nintam di ike bibie tut Da di TUHAN ri. 18 Lene ma mben Israel ijem domba nehen pap di ide njap ug ei ari bingwam gom ningut muhwindacan kin sapi nikre ningut gom kin domba nikre ningut can di bok-ba bi kwei kin roti pima. Gini hagom mem nibon midut nindig mindhe titut kep hum ei Doho bei ri. Lene ma ibon midut njita nibipai sigyo bak Allahti ba, ibon midut ba anggur ngei nibipai sigyo bak Allahti cem. Lene midijoi sut ninghap di ngge kei dima. 19 Gima cem ma jibui kambir nikre ningut gom mem nibon midut nibikos ser sisarti kin domba nikre ningut can di ide njap ug ei ari bingwam gom mem nibon midut nibiyai ningon kwes kin Allahti. 20 Lene ma imam gom kon roti kin domba ningut can bijo nai nok mun di bon ninyeng mem Da. Lene ma jipigig ser gima yok hagom ei nok mun di dia-diau mem imam nya yongkom igyem kep. 21 Harin dima jiyai kep jide midyai di buhun nya mem njap dima a. Noro ma jinduk yam ei bijikuk je biDa. Suar dicuk jeti dini jo kikau mem jide nintun him yamti di bram yam nya cem leu binhyepo ibit ei ibong kepti nya hagom bijo ninno bijo kikau.
22 Tirigi jike jide gandum barli nintam kin yam ei beisi lene ma johom nintam nikenti di jo ninghas him au. Lene ma jingkwei hanyen bijike barli nintam dima mbican bram yam au. Noro ma jibet niken dima hagom ei mem yo di yuhui mbum nya kin ngkiai nya. Dani ne TUHAN bidinok jide Allah ri.
Nibon midut Ari Bingwam Nijep
(Bil. 29:1-6)
23-24 Ug ei njap gi nigom ei bed gi nimuhwindacan lene ma jibet njap dima ei bijigwam kep jinghuisi. Tirigi jimiap pun mbrei nisu bong lene ma jinduk yam ei bijikuk je biDa. 25 Njap dima ne ma jibon midut njita nibipai sigyo bak Allahti noro ma jinda jo kep jide midyai di buhun au.
Nibon midut Njap Ndig Nibikos Ser Sisarti
(Bil. 29:7-11)
26-27 Ug ei njap gi nisimnai ei bed gi nimuhwindacan lene tto bou midem mem gima ibon midut nibikos ser mben Israel yahagom ide sisar bikwop ari bingwam hagom. Suar jisindui njita kikau mem njap dima lene ma jinduk yam ei bijikuk je biDa di TUHAN leu api mijibon midut njita nibipai sigyo bak Allahti. 28 Harin dima jinda jo kep jide midyai di buhun nya a. Lewo jipigig ser njap dima mem nibon midut nibikos ser sisarti eisi leu binhyepo jiyai gi kos ser sisar ei TUHAN di nok jide Allah Noho bei. 29 Tungwa tou rino yem njita mem njap dima minok Ditde limwa bu bi. 30 Tungwa tou rino ninda jo kep nide midyai mem njap dima mitug ndei hukum nimai leu TUHAN Nonti. 31 Dicuk jeti dini mem jide nintun him yamti di bram yam nya bidem ei jibong kepti nya hagom. 32 Tirigi mpia kimbasti mem njap gi nimuhwindatai kikau mpia kimbasti mem njap gi nisimnai lene ma jiyok ngon kep njap dima nok Njap Nigwam Kep Ninghuisi leu binhyepo jigwam kep jinghuisi ba, jisindui njita mem njap dima cem.
Nibon midut Njap Ndig Ig Jibei Mpam Meng
(Bil. 29:12-40)
33-34 Ug ei njap gi nisimnaimuhwidip ei bed gi nimuhwindacan lene ma jikinyon ei nibon midut Njap Ndig Ig Jibei Mpam Meng di mbut kikau mem njap nitindur muhwindacan. 35 Ma jinduk yam kwei bijikuk je biDa mem njap gi nigom lene ma hi ninda jo kep nide midyai di buhun nya au. 36 Ma jibon midut njita nibipai sigyo bak Allahti bikwop njap kikau mem njap nitindur muhwindacan. Ug ei njap gi nimuhwindaningai lene ma jinduk yam ei bijikuk je biDa ba, jibon midut njita nibipai sigyo bak Allahti mbigom kin bu cem. Njap dima cem ma jinda jo kep jide midyai di buhun nya au.
37 Njap dini yok ne njap ndig mem gima jibikuk je biDa di TUHAN tirigi jinduk yam ei bijibon midut njita nibipai sigyo bak Allahti kin jindig mindhe titut kep hum kin midut nibikos ser sisarti ba, jibui jide mindhe-ndhe nya ba, jibon midut ba anggur ningei cem bit leu nok dicuk jeti tu bikwop njap-njap ri. 38 Njap ndig dini yok ter leu jide Njap Nigwam Kep Ninghuisi nya. Nibon midut dini yok ter leu mindhe-ndhe nya di jibui biDa bikwop njap-njap kin mun di jipreu ei mem Da tug hon neheng kin mun di jiyai biDa mikuisi.
39 Gima rino tirigi jike jide gandum nintam bingwig leu su lene ug ei njap gi nisimnaimuhwidip ei bed gi nimuhwindacan ma jibon njap ndig gom kin bu kikau mem mmun-njap muhwindacan. Njap gi nigom kin njap gi nimuhwindaningai lene suar jigwam kep jinghuisi. 40 Njap gi nigom lene ma jipuk biei ngat di kei bibor kei leu api ma jitot dui meng kin biei nda di nimeng nggrou nindigsi nya hagom kwei leu binhyepo jibinggei sut Da di TUHAN lewo dinok jide Allah. 41 Njap ndig dini mbut mem mmun-njap muhwindacan. Suar jide nintun him yamti di bram yam nya igyok ngon kep dicuk jeti dini bijo ninno bijo kikau. 42 Suar mben Israel yahagom yohok ig jibei nya bibong ser ei mmun-njap muhwindacan. 43 Leu binhyepo jide nintun him yamti di bram yam nya mikan kep bipia Da di TUHAN dikuk mben Israel bibong ser ig jibei nya tirigi po dibie tut yok kwei leu minu Mesir. Dani ne TUHAN bidinok jide Allah ri.
44 Gima rino Musa kes TUHAN nihyet bak mben Israel leu binhyepo igyai nibon midut njap ndig nya hagom kan ba, ibinggei sut TUHAN.