Nicukti tut bras di yem tungwatu ingkekti
13
1 Lene TUHAN sok nihyet bak Musa kin Harun bipai, 2 <<Gino tungwagom ningkekti bok ba, buhwei com cem bon nitigwapti di bindei dino bras mbrei yem noni lene suar jibuwak noni ug ndam imam di ntun Harun him gom. 3 Lene ma imam dima ngig niyai kep no dima nibokti. Gino ninta-nta di joti nya tiei kei ba, nibokti yem ningkek bimui lai-lai de cem lene bras mbrei yem no dima tu. Lene ma imam dima simbot dat bipia map kui no dimati. 4 Ne gino nibokti tiei kei lo, yem ningkek bimui lai-lai de ba, ninta-nta di joti nya tiei kei bi cem lene suar no dima bong ei prak meng gomti binongkom ei minu ting leu nindigsi nya mem mmun-njap muhwindacan. 5 Ug ei njap gi nimuhwindacan lene suar imam dima ngig niyai kep noni hanyen bu. Gino imam kan bipia nibokti noyam kin gi nipou ba, ullen bi cem lene suar no dima bong ei prak mengti binongkom ei minu ting leu nindigsi nya mem mmun-njap muhwindacan bu. 6 Ug ei njap gi nimuhwindacan bu lene suar imam dima ngig niyai kep no dima hanyen bu. Gino nibokti sindi jut hanyen ba, ullen bi cem lene ma imam simbot dat bipia map kui no dimati bu bi. Lewo nibokti dima buhun bi. Lene ma no dima ba minyei bitot nide sinsun nok mun di bindo bipia noni kei hanyen tu. 7 Lene gino nibokti ullen ei niabiati tirigi imam dima simbot dat bipia map kui no dimati bu bi lene suar no dima kwei ndo nonti hanyen bak imam gom. 8 Gino imam dima ngig niyai kep no dima hanyen bingat lo, nibokti ullen lene ma noni simbot dat bipia map kui no dimati lewo bras mbrei yem noni tu.9 Gino bras mbrei yem tungwagom lene ma tungwatu ibuwak noni kwei ei imam gom noho bei. 10 Lene ma imam dima ngig niyai kep no dima. Gino noni tugndei nibok-bati di tiei di bindei di ninta-nta di jo nibokti dima cem tiei ba, nuwom ut eisi, 11 lene gima bindo pia mporo bras mbrei dima jut hanyen kan bi. Ma imam dima simbot dat bipia map kui no dimati. Gima rino ma ikes no dima bibong binongkom bu au lewo jo nibreisi bipia map kui no dimati tu. 12 Ne gino nibokti nya ullen bingwig ei no dima ningkek dip ei nibou nggram him kikau ug bipek nimig jou, 13 lene ma imam dima ngig niyai kep no dima hanyen bu. Gino nibokti nya ngwig ei ningkek dip hagom lene ma imam dima simbot dat bipia map kui no dimati bi. Leu gino ningkek dip hagom tiei kei su lene map kui no dimati bi. 14 Noro hammi tirigi nibokti ullen hanyen lene map kui noti. 15 Lene ma imam dima ngig niyai kep noni hanyen. Gino ngat nibokti di ullen lene ma noni simbot dat bipia map kui no dimati hanyen. Lewo nibokti di ullen dima ndo bipia bras mbrei yem no dima hanyen ba, map kui noti drek dip. 16 Ne gino nibokti jut hanyen lene ma noni ug ngat imam hanyen. 17 Gino imam dima ngig niyai kep noni bingat lo, nibokti tiei kei hanyen tu lene ma imam dima simbot dat bipia map kui noti bi.
18 Gino buhwei com tungwagom lo, jut hanyen, 19 noro nimuhweiti dwoi ba, nitieisi srig ningwoiti ei niabiati bu lene ma no dima ug ngat imam gom. 20 Lene ma imam dima ngig niyai kep nibokti. Gino ninta-nta di joti nya tiei kei ba, buhwei dima yem ningkek bimui lai-lai de cem lene ma imam dima simbot dat bipia map kui no dimati. Lewo buhwei dima bindei ba, bras mbrei sindi yem noni. 21 Ne gino imam dima ngig niyai kep noni bingat lo, ninta-nta di joti nya tiei kei ba, buhwei dima yem ningkek bimui lai-lai de bi cem lene suar no dima bong ei prak meng gomti binongkom ei minu ting leu nindigsi nya mem mmun-njap muhwindacan. 22 Gino buhwei dima ullen bu lene ma imam dima simbot dat bipia map kui noti ba, bras mbrei yem noni. 23 Ne gino buhwei dima jo nijoti ba, ullen bi lene gima ne nimuhweisi rin leu api ma imam dima simbot dat bipia map kui no dimati bi.
24 Gino hum yem tungwagom ningkek dip apino nibokti dima tiei kei ba, nitieisi srig ningwoiti cem lene, 25 ma imam gom ngig niyai kep noni. Gino ninta-nta di joti nya tiei kei ba, nibokti yem ningkek bimui lai-lai de cem lene hum di yem noni pima bindei ba, bras mbrei sindi yem noni. Lene ma imam dima simbot dat bipia map kui no dimati tu. 26 Ne gino ninta-nta di joti nya tiei kei ba, nibokti yem ningkek bimui lai-lai de ba, nibokti tiei kei bi cem lene suar no dima bong ei prak meng gomti binongkom ei minu ting leu nindigsi nya mem mmun-njap muhwindacan. 27 Ug ei njap gi nimuhwindacan lene suar imam dima ngig niyai kep no dima hanyen bu. Gino nibokti ullen lene bras mbrei yem no dima tu. Lene suar imam dima simbot dat bipia map kui noti tu. 28 Ne gino nibokti jo nijoti ba, ullen bi ba, tiei kei hanyen cem lene bras mbrei yem noni bi. Lene suar imam dima simbot dat bipia map kui noti bi lewo gima ne hum po yem ningkek pima nimuhweisi he ri.
29 Gino no di pinai e, he no di sop nibou ngkek kin niji ngkek bok, 30 lene ma imam gom ngig niyai kep. Gino nibokti yem ningkekti bimui lai-lai de ba, ninta-nta di joti nya dem kep nok ngoi cem llet-llet nyen cem lene bras mbrei yem no dima tu. Lene suar imam dima simbot dat bipia map kui no dimati tu. 31 Gino imam dima ngat lo, nibokti yem ningkek bimui lai-lai de bi lo, ninta-nta di joti nya hagom llet leu su lene suar no dima bong ei prak meng gomti binongkom ei minu ting leu nindigsi nya mem mmun-njap muhwindacan. 32 Ug ei njap gi nimuhwindacan lene ma imam dima ngig niyai kep nibokti dima hanyen. Gino ullen ba, ninta-nta di nipuk joti cem yem ningkek bimui lai-lai de bi, 33 lene ma no dima kak nibou nta titut leu lo, bet nibou nta gi simiak nibokti pima bijo hak. Lene ma noni ug bong ei prak meng gomti binongkom ei minu ting leu nindigsi nya mem mmun-njap muhwindacan. 34 Ug ei njap gi nimuhwindacan lene ma imam dima ngig niyai kep nibokti dima hanyen. Gino ullen ba, yem ningkek bimui lai-lai de bi lene ma noni simbot dat bipia map kui no dimati bi. Suar no dima ba minyei bitot nide sinsun nok mun di bindo bipia map kui noti bi. 35 Ne gino nibokti ullen ei niabiati tirigi imam pima simbot dat bipia map kui noni bu bi pima lene, 36 ma imam dima ngig niyai kep noni hanyen bu. Gino nibokti ullen lene ma noni nggok ser ninta-nta di nipuk di joti nya bu au lewo map kui no dimati tu. 37 Ne gino imam dima kan bipia nibokti ullen bi ba, ninta-nta ntun him lene jut hanyen tu apino imam dima misimbot dat bipia map kui no dimati bi.
38 Gino no di pinai e, he no di sop ningkek tiei llikti, 39 lene ma imam gom ngig niyai kep no dima. Gino nillikti nya pimber ba, tiei-tiau bi lene gima ne anjig he riyem noni ba, map kui no dimati bi.
40 Gino no di pinai nibou llet leu nibou nggram him lene gima bindei ba, map kui noti bi. 41 Gino no di pinai nibou llet leu ningwak kin nijap cem lene gima bindei ba, map kui noti bi. 42 Ne gino nibokti dima nitiei srig ningwoiti ba, ullen ei nibou ngkekti lene bras mbrei yem noni tu. 43 Ma imam gom ngig niyai kep noni. Gino noni ngat nibokti dima nitiei srig ningwoiti lene, 44 ma imam dima simbot dat bipia map kui no dimati drek dip bras mbrei di yem nibou ngkekti.
45 Suar yo di bras mbrei yem yok ijuk sinsun di rik-ta ba, ibou jo hak cem iba sinsun nghas binggai kep ser ihwap kin yuhui cem yahara kikau bipia <<Map kui dati o! Map kui dati o!>> lene nok. 46 Ba, map mikui noni kikau bibou bras mbrei dima pren leu noni ug e. Gima rino ma noni bong binongkom ei mben Israel ide prak meng yati dima nisai ei minu ting leu nindigsi nya.
Nicukti tut sinsun di sgwa nut
47 Gino sinsun di iba minyahas wol kin minyahas linen bibon, 48 kin mindhe-ndhe ngkek kin mun di iba ndia ngkek dima bibon sgwa nut ba, 49 gino nisgwati dima wer nimahai kin ningwoi lene nisgwati dima ninyeng sgwa nut. Ma tungwatu indo nisgwati dima bak imam. 50 Ma imam dima ngig niyai kep mun di sgwa nut dima leu api ku mun dima nyahan ei mem mmun-njap muhwindacan. 51 Ug ei njap gi nimuhwindacan lene ma noni ngig niyai kep hanyen. Gino noni ngat lo, nisgwati dima mbut nut bu lene map kui mun dimati. 52 Suar noni ndig mun dima kep hum lewo nisgwati mbut nut tu. Gima rino suar hum yem bingwig ug.
53 Ne gino noni ngig niyai kep mun dima bingat lo, nisgwati dima mbut nut bu bi, 54 lene ma noni cuk niceu bipia ba minyei bitot leu api ku nyahan ei mem mmun-njap muhwindacan bu. 55 Lene ma imam dima ngig niyai kep mun pima hanyen bu. Gino noni ngat nisgwati dima niwer nimahaisi kin ningwoisi jo nijoti ba, mbut nut bi lene jo nok ba, map kuisi kikau. Mbro nok gino nisgwati dima yem mun pima bei noho he bei ninghim he lo, ma jindig kep hum ug. 56 Ne gino noni ngig niyai kep mun pima mbigom kin bu bingat lo, nisgwati pima pimber leu lene ma noni rik tut nisgwati dima he leu. 57 Gino nisgwati dima mbut nut ei nidipti bu lene suar niceu ndig titut yam kep hum. 58 Ne gino noni ba minyei bitot mun pima leu api nisgwati dima pror hak leu bou niyai him lene ma noni ba minyei bitot mbigom kin bu leu binhyepo bindei ba, nipuig kwes.
59 Gima rino nicukti tut sinsun di iba minyahas wol kin minyahas linen bibon kin mindhe-ndhe ngkek kin mun di iba ndia ngkek dima bibon cem nisgwati mbut nutti cem ri.