Nibon midut mem sop di isrek tut imunggwom bat nya
12
1 Lene TUHAN sok nihyet ei Musa dip, 2 bak mben Israel bipai <<Gino niabiati sop hi srek tut nipinai lene map mikui noti kikau mem mmun-njap muhwindacan bit leu nok ninggwen bed. 3 Ei njap gi nimuhwindaningai lene suar ningwoi-ngwoi dima yai nibon midut sunat. 4 Lene map mikui sop dimati mem mmun-njap ningot ningai ba, ningai bu drek dip ninggrom. Ma noni ngget mun di kwes-kwau ba, coi ug ei TUHAN De Prak Meng cem au bibou nijam di bindei dino map kui noti bu bi ngwig ug e.5 Nok gima cem tut sop di srek tut munggwom nisop. Gino srek tut munggwom nisop lene map mikui noti kikau mem mmun-njap simnaibrimigtai bit leu nok ninggwen bed. Lene map mikui noti kikau mem mmun-njap ningot muhwindagom ba, muhwindagom bu drek dip ninggrom. 6 Tirigi nijam di bindei dino map kui noti bu bi dima ngwig leu su ba, gino srek tut nipinai kin nisop cem lene ma noni jem domba pmot di nide njap ug ei ari bingwam gom kwei bak imam ei dimbou heisi ei TUHAN De Prak Meng nijoti mem nibon midut nindig mindhe titut kep hum bikrau gom leu ha tekukur e, he hakimoi mbrei gom e, kwei mem nibon midut nibiyai nikos ser sisarti cem. 7 Lene ma imam dima bui domba pmot dima ei TUHAN Noho bei leu api ba hakimoi can dima bibon midut di bindei ciu ser map di kui sop dimati. Lene sop dima ninghuisi mikwes hanyen. Gima rino suar sop nya igyai nibon midut dini ei niabiati isrek tut imunggwom leu su.
8 Lene gino sop dima nyeng tut domba pmot hi bi lene ma noni krau ha tekukur e, he hakimoi mbrei ningut can e, kwei. Bihi mem nibon midut nindig mindhe titut kep hum lene bihi mem nibon midut nibiyai nikos ser sisarti. Lene suar imam dima bon midut di bindei ciu ser map di kui sop dimati leu binhyepo noni kei hanyen.>>