Nibon midut nibiyai ningon kwes kin Allahti
3
1 Tirigi tungwagom ba sapi ningut gom bikuk no bak tug hon nibon midut nibiyai ningon kwes kin Allahti lene ma noni jem nikre e, he niwek di bok-ba bi e, kwei. 2 Lene ma no dima kes ninda ei sapi nibou dip leu api bui sapi dima ei bei dimbou hui ei TUHAN De Prak Meng nuhuigya. Lene ma imam nya yehek ninggrom bibiprok nimbar hum dok nitta bitaisi. 3 Lene ma no dima digo sapi ninghui nok mun di imam nya indig kep hum mem nibon midut nibiyai ningon kwes kin Allahti kwei bak TUHAN nok gini. Ninggwo hagom, 4 kin nikimbu hacem bitut nimmau di joti nya kin nisingau igdo hi di kei bibor. 5 Lene ma imam nya indig ninghui dini hagom kep hum bitut mun di nindigsi nya ei nimbar hum dokti. Lene TUHAN mijoi sut ninghap di ngge kei dima.6 Gino tungwagom ba domba e, he kambir ningut gom e, bikuk no bak tug hon nibon midut nibiyai ningon kwes kin Allahti lene ma mindhe dima bok-ba au. 7 Gino tungwagom ba domba ningut gom bikuk no bak lene ma noni jem domba dima kwei biya tut kui TUHAN De Prak Meng. 8 Lene ma noni kes ninda ei domba dima nibou dip bibui hammi Prak Meng nuhui. Lene ma imam nya yehek ninggrom bibiprok nimbar hum dok nitta bitaisi. 9 Lene ma no dima digo domba ninghui nok mun di imam nya indig kep hum mem nibon midut nibiyai ningon kwes kin Allahti kwei bak TUHAN nok gini. Nimmau kin nipu di nimmau ndok titut di noni digo hammi nipu triti kin ninggwo, 10 kin nikimbu hacem bitut nimmau di joti nya kin nisingau igdo hi di kei bibor. 11 Lene ma imam dima ndig ninghui dini hagom kep hum ei nimbar hum dokti nok nibon midut nibiyai ningon kwes kin Allahti di no dima bon mem TUHAN.
12 Gino tungwagom ba kambir ningut gom bikuk no bak lene ma noni jem kambir dima kwei biya tut kui TUHAN De Prak Meng. 13 Lene ma noni kes ninda ei kambir dima nibou dip bibui hammi Prak Meng nuhui. Lene ma imam nya yehek ninggrom bibiprok nimbar hum dok nitta bitaisi. 14 Lene ma no dima digo kambir ninghui nok mun di imam nya indig kep hum mem nibon midut nibiyai ningon kwes kin Allahti kwei bak TUHAN nok gini. Ninggwo hagom, 15 kin nikimbu hacem bitut nimmau di joti nya kin nisingau igdo hi di kei bibor. 16 Lene ma imam dima ndig ninghui dima hagom kep hum ei nimbar hum dokti nok nibon midut nibiyai ningon kwes kin Allahti di no dima bon mem TUHAN. Lewo mindhe dima nimmau hagom rinok TUHAN de. 17 Harin dima mben Israel igyem kep mindhe dima nimmau kin ninggrom a. Suar yoni kin yo di intun yok him ibit dicuk yokti dini bidem ibongti igwamti bijo ninno bijo kikau.