Nibon midut njita nibipai sigyo bak Allahti
2
1 Gino tungwagom ba nide njita hi nok gandum ngat bikuk no bak TUHAN lene ma noni kes gandum dima ei tig gilingti bibon nok tepun. Lene ma noni ttin ampou tut mini zaitun bikiber hi eisi leu api ba biei nggrai di ui-gwang kei poi mien bigimahap nidip. 2 Lene ma noni yai hagom kwei bak imam di ntun Harun him gom. Lene ma imam dima kam tepun dima bitut mini zaitun kin biei nggrai di ui-gwang kei ei ninda bia bei gom bindig kep hum ei nimbar hum dokti nok mun di bindo bipia no dima yai hagom bak TUHAN. Lene TUHAN mijoi sut ninghap di ngge kei dima. 3 Lene njita dima niken mijo mem imam nya igyem kep. Njita dima kwes-kwau lewo imam dima pigig sut ei mem TUHAN.4 Gino tungwagom ba roti di noni kang ei komforti bikuk no bak TUHAN lene ma roti ninjep srig tepunti au. Gino noni ba roti nindak bikuk no bak lene ma mini zaitun srigsi. Gino noni ba roti dile bikuk no bak lene ma noni ba mini zaitun bibijos nidip.
5 Gino noni ba roti di noni kang ei komfor ninjek dip bikuk no bak lene ma mini zaitun srig tepunti noro ma roti ninjep srigsi au. 6 Tirigi noni ba roti dima bikuk no bak lene ma noni ki hagom kukiau bittin ampou tut mini zaitun bikiber hi kin bu ei dip.
7 Gino noni ba nide roti di noni kang ei yengkuongti bikuk no bak lene ma mini zaitun srig tepunti noro ma roti ninjep srigsi au. 8 Suar noni pwoi roti dima kwei bikes ei imam nindati nok mun di noni bikuk no bak TUHAN. Leu api imam dima mikon roti dima ei nimbar hum dok nijoti. 9 Ma imam dima yai roti dima ndrim hi bindig kep hum ei nimbar hum dokti nok mun di bindo bipia no dima yai hagom bak TUHAN. Lene TUHAN mijoi sut ninghap di ngge kei dima. 10 Lene roti niken mijo mem imam nya bigyem. Njita dima kwes-kwau lewo imam pigig sut ei mem TUHAN.
11 Tut roti nyeng hagom di igyai bak TUHAN lene ma roti ninjep kin ahwei lon ngei srig tepunti au. Lewo Noni sindui sut gima indig roti ninjep kin ahwei lon ngei srig tepunti kep hum bak Noni bi. 12 Tirigi njita sindi ngat ningat lene suar iba njita dima ndrim hi bikuk yok bak TUHAN. Noro ma indig njita dima kep hum ei nimbar hum dokti au. 13 Suar inden nsim ba, igimahap bidem ei roti ninyeng hagom di ibikuk yok bak dip lewo nsim rinok mun di bindo tut mun po TUHAN preu ei mem yok pima. Suar inden nsim ba, igimahap bidem ei mun nyeng di ibikuk yok bak hagom. 14 Tirigi iba gandum di sindi ngat ningat ndrim hi bibikuk yok bak TUHAN lene ma ittei gandum di yoho ei hukti bindung kin gi ikang ei komforti cem. 15 Lene ma isiber mini zaitun ei dip ba, ibigimahap biei nggrai di ui-gwang kei poi mien ei nidip. 16 Lene ma imam gom kam gandum kin mini zaitun bitut biei nggrai di ui-gwang kei ei ninda bia bei gom bindig kep hum nok mun di bindo bipia no dima yai hagom bak TUHAN.