Bezaleel bon nimbar hum dok
(Kel. 27:1-8)
38
1 Lene Bezaleel ba biei meng dia nisra bibon nimbar hum dok di nijeisi kin ninyanti meter can biniken ba, hacem noyam. Ba, nanaisi meter gom biniken. 2 Lene noni bon ninggai hammi nuhuisi bitai ndam nidip ba, nimbar hum dok kin ninggai nya hagom rap yam nok gom. Lene noni ba ngkimom-tembaga di dile binggai kep titut yam. 3 Lene noni ba ngkimom-tembaga bibon bokor kin sikop kin mok kin hot nggram kin srier mem hum mbom nya hagom. 4 Lene noni ba ngkimom-tembaga bibon kawanggai di sindem bibor lene kes bijo hacan ei nimbar hum dok ninsi ba, bisrou kin nitta bitai ninsi sur yam. 5 Lene noni bibon srak ningat bitai ba, cim ei nuhuisi nya mem gima isu ug nya eisi. 6 Lene noni ba biei meng dia bibon ug nya dima ibikon nimbar hum dok lene ba ngkimom-tembaga di dile binggai kep. 7 Lene noni su ug nya ei srak di noni bicim kin nitta hacemti. Noni ba biei sra bibon nimbar hum dok ba, bon nijou kin nibeng di joti nya bi.Bezaleel bon bokor minyei
(Kel. 30:18)
8 Lene Bezaleel ba kisina ngkimom-tembaga bibon bokor minyei bitut nidihim cem ba, ninyeng rino Bokor Ngkimom-tembaga. Sop di igyai midyai hammi dimbou TUHAN De Prak Meng nuhui nya ikwas ide kisina hagom tut Allah leu binhyepo Bezaleel bibon bokor dima.
Bezaleel bon sar di bikrop ttai mpia di jo bas hak mem TUHAN De Prak Meng
(Kel. 27:9-19)
9 Lene Bezaleel ba minyahas linen di dia-diau kei bisar ttai ninsi di jo bas hak mem TUHAN De Prak Meng yati. Noni ba linen dima binap minyahas nititut yam gom di nijeisi meter ningot bitai ba, bitai mem sar di jo nite bei mpia nibiho. 10 Lene noni ba ngkimom-tembaga bibon cou ningat ningot can kin nikiou nya cem. Lene noni ba perak bibon nikoisi nya kin mun di buhum kin yam leu binhyepo ibuhum minyahas nititut yam dima kin cou nya kin yam. 11 Lene noni bibon nok gima mem sar di jo nite bei mpia nijjai cem bu. 12 Lene noni nap minyahas nititut yam gom di nijeisi meter ningot can ba, can lene bon cou simnai kin nikiou nya simnai bu lene ba perak bibon nikoisi nya kin bot nya mem nite bei mpia nikimbasti cem. 13 Lene sar di jo nite bei mpia nipriti bon dimbou hui ba, sar dima cem nijeisi meter ningot can ba, can. 14 Lene noni nap minyahas nititut yam gom di nijeisi meter muhwindagom biniken ba, bon cou ningai di noni ta ei nikiou ningaisi mem dimbou hui nite hi cem nitehi cem. 15 Lene noni nap minyahas nititut yam di nok gima gom kin bu kin cou ningai kin nikiou ningai mem nite hi bu. 16 Lene noni ba linen di dia-diau kei binap minghas sar di bikrop ttai ninsi di jo bas dima hagom. 17 Lene noni ba ngkimom-tembaga bibon nikiou nya mem cou hagom. Lene ba perak bibon nikoisi nya kin bot nya kin mun di binggai kep cou ninggrupti nya. Lene ba perak bibon biei njiti di bikrau ninggrupti nya kin yam bidem sar ninggrupti nya hagom. 18 Lene noni ba minyahas linen di dia-diau kei binap ninghas mem gima ndun ser dimbou hui ba, noni bien mong wol di nimmun kin nghei nta kin gi ningwoi eisi. Ninghas dini nijeisi meter muhwindatai lene nanaisi meter can ba, noyam kin sar nanaisi. 19 Lene noni kes ninghas dini bindun cou bitai di noni ta ei nikiou bitaisi di noni ba ngkimom-tembaga bibon him. Lene noni ba perak bibon nikoisi nya kin mun di binggai kep cou ninggrupti nya kin biei njiti nya cem. 20 Lene noni ba ngkimom-tembaga bibon keu di sren nya mem ig hyei kin sar dima cem.
Ngkimom mem TUHAN De Prak Meng nibuhunti
21 Gini ne daptar ngkimom mem TUHAN De Prak Meng nibuhunti ri. Ba, tig mma can po Allah pas kep Nicukti Simnai eisi pima jo ei mpia dima. Keret Lewi nya ipas kep daptar dini bit leu nok Musa nicuk yokti ba, Itamar di Imam Harun nipmot bie tut yok. 22 Bezaleel di Uri nipmot ba, Hur nignyon di nimbier kim keret Yehuda bibon hagom bit leu nok TUHAN nicukti. 23 Lene Oholiab di Ahisamakh nipmot di nimbier kim keret Dan mpu noni ba, noni kilis mun ba, pas gambar kin bien minyahas linen di dia-diau kei kin minyahas wol di nimmun kin nghei nta kin gi ningwoi cem. 24 Mas di mben Israel ikwas tut TUHAN mem Nide Prak Meng nibuhunti kilo sribu gom ba, ibakilo hagom bit leu nok nibuhunti di ice tut mem TUHAN De Prak Meng. 25 Perak di igyai tug hon daptar di tibim tut mben Israel imangti hagom nibuhunti kilo sribu ningai sratus bitai ningot ningai ba, ibakilo hagom bit leu nok nibuhunti di ice tut mem TUHAN De Prak Meng. 26 Nibuhunti dima noyam kin mun di yo di inyeng coi ei daptar pimati igo tut. Bikwop tungwagom-gom go nibok bit leu nok Allah nicuk yokti ba, ibakilo hagom bit leu nok nibuhunti di ice tut mem Allah De Prak Meng. Pinai nya di ide njap ug ei ari bingwam ningot can nima kui di inyeng coi ei daptar pimati imangti ibou sribu sratus muhwindagom ningai lene sratus muhwi ba, ningot muhwi. 27 Tukan nya iba perak nibuhunti kilo sribu ningai ba, sratus bitai bibon nikiou nya mem cou ningat sratus gom mem TUHAN De Prak Meng kin ninghas di ipindur ser cou nya ei dimbou hui cem. Iba kilo ningot ningai ba, bitai bibon nikiou gom bibikwop nikiou nya hagom. 28 Lene Bezaleel ba perak niken kilo ningot ningai bibon biei njiti nya kin nikoisi mem cou nya kin binggai kep cou ninggrupti nya cem. 29 Lene ngkimom-tembaga di ikwas tut TUHAN nibuhunti hagom kilo sribu can sratus bitai ba, ningot can bimuhwi. 30 Bezaleel ba ngkimom-tembaga dima bibon nikiou nya mem dimbou TUHAN De Prak Meng nuhui cem nimbar hum dok bitut nide kawanggai cem nimbumbati nya, 31 kin nikiou nya mem sar di bikrop ttai ninsi di jo bas hak dima bitut dimbou hui cem keu di sren mem Prak Meng mem sar pima cem hagom.