Munkwas mem TUHAN De Prak Meng
(Kel. 35:4-9)
25
1 Mpe dima lene TUHAN pai bak Musa, 2 <<Ma acuk mben Israel bipia ittei mun di ikwas tut Da kwei. Tungwa tou rino ningon huk niti lene noni ttei mun di noni kwas tut Da kwei. 3 Ba, ikwas ide mas kin perak kin ngkimom-tembaga, 4 kin minyahas linen di dia-diau kei kin minyahas nimmun kin gi nok nghei nta kin wol gi ningwoi kin minyahas di iba kambir ninta binap, 5 kin domba nikre ningkek di ihwen bingwoi kei kin mindhe-ndhe nindigsi ningkek di kei bibor kei kin biei meng dia, 6 kin mini mem mini njeng nidihim kin mun di ui-gwang nya mem mini nibon midut kin biei nggrai di ui-gwang kei cem, 7 kin tig permata ninyeng mang bibor mem gima ibinap kin Imam Nibou Ndig de sinsun minai kin nide sinsun efodj di noni juk ser ningget hagom tut Da. 8 Ma ade limwa nya yohok prak meng gom di ipiga ei mem gima dibong ei ikieti. 9 Ma anap prak meng dima ba, abon nimbumbati nya hagom bit leu nok dindo brei bina.>>Brua Gi Preu
(Kel. 37:1-9)
10 <<Ma aba biei meng dia nisra bibon brua ningat gom di nijeisi senti sratus gom ba, simnai lene ninyanti kin nanaisi hacem senti ningot muhwindagom ba, muhwindagom. 11 Ma aba mas binggai kep bei ninsi kin bei nisai. Lene aba mas hi kin bu bimau ninghas him nya. 12 Ma aba mas bibon srak ningat bitai leu api acim srak nya ei brua nuhuisi leu binhyepo abikon. Srak can jo nite hi lene srak can kin bu jo nite hi bu. 13 Ma aba biei meng dia bibon ug ningat can lene aba mas binggai kep. 14 Ma asu ug dima hacem kak srak pima ninsi ba, gom ei nite hi lene gom ei nite hi bu. 15 Lene ug dima hacem jo nyahan kak srak ninsi bijo ninno bijo kikau. 16 Lene midiyai tig mma po Ditde nicukti nya joti pima can bina leu binhyepo akes hacem bijo ei Brua Gi Preu dimati.
17 Ma aba mas bibon nibeng ba, nijeisi senti sratus gom ba, simnai lene ninyanti senti ningot muhwindagom ba, muhwindagom. 18 Ma aba mas di itug bidile bibon kerub.k 19 Lene kerub nya hacem rap nibeng bingkiem bibor ba, hi ei niyenti nite hi lene hi ei niyenti nite hi bu. 20 Ma akiek kerub nya hacem ba, abirok kik yam ba, ikieng inyehei gau brua nibenga. 21 Lene akes tig mma can pima ei Brua Gi Preuti ba, akibou kep hanyen. 22 Midiya um na hammi Brua dima nibeng lene midimbot kep tut Ditde niggai serti nya mem mben Israel bina tirigi dingat rin ei nai Brua dima nibeng dip ei kerub nya ikieti.>>
Meja mem roti nidimig ei mem Allahti
(Kel. 37:10-16)
23 <<Ma aba biei meng dia nisra bibon meja gom di nijeisi senti ningot muhwindaningai ba, muhwindaningai lene ninyanti senti ningot bitai ba, bitai lene nanaisi senti ningot muhwindagom ba, muhwindagom. 24 Ma aba mas binggai kep hagom lene aba mas hi kin bu bimau ninghas him nya. 25 Ma abon biei njiti di nanaisi senti muhwindacan biniken bijo sir meja ninghas him nya leu api aba mas hi kin bu bimau biei njiti dima ninghas him nya. 26 Ma aba mas bibon srak ningat bitai leu api abicim meja nuhuisi bitai hammi nimig nicimti nya. 27 Srak dima yok rimem gima asu ug nya eisi leu binhyepo abikon. 28 Ma aba biei meng dia nisra bibon ug ningat can leu api aba mas binggai kep. 29 Ma aba mas bibon den kin mok kin ampou kin bokor nya mem gima akwas ba anggur ngei tut Da di Allah eisi. 30 Ma akon meja dini ei Brua Gi Preu nuhuia. Lene akes roti di adimig ei mem imam nya ibikuk yok biDa eisi bijo kikau.>>
Mini njeng nidihim
(Kel. 37:17-24)
31 <<Ma aba mas di atug bibon mini njeng nidihim nikiou kin nikrausi. Lene aheu mas dima binok bunggan nya bitut nitou kin nimar di bimau ba, hagom cim nikiou kin nikrausi nok gi gom. 32 Ma abon ninda muhwindagom ba, ningai ntun nidihim nite hi him lene ningai ntun nidihim nite hi him bu. 33 Ma aheu bunggan badam ningat ningai bitut nimpung kin nimar ba, abimau bikwop ninda-nda hagom noyam. 34 Ma aheu bunggan badam pima ningat bitai bitut nimpung kin nimar ba, abimau nidihim cem. 35 Ma aba nimpung gom bimau bikwop ninda di ntun him hagom nibehei. 36 Gima rino ma aba mas di atug ninggop gom bibon mini njeng nidihim dima bitut nimpung nya kin ninda nya hagom. 37 Ma abon mini njeng ningat muhwindacan ba, akes hagom bijo ei ninda ninggrupti nya leu binhyepo piga digai bei nibiho. 38 Ma aba mas bibon mun di abicok mini njeng nipu kin mun di bindei mu ninjeng nya. 39 Gino abibon mini njeng nidihim dima biput tu lene nide mas hagom nibuhunti dem kilo ningot ningai ba, muhwi. 40 Lene angon sok kep nanti tirigi abon mini njeng dima leu binhyepo hagom bit leu nok Ditde nicuk nati ei mbigdip dini.>>