TUHAN yai manna kin ha dumti nok njita bak Nide limwa nya
16
1 Lene mben Israel yahagom ijo leu Elim ba, yuug krau iggum ndigsi Sin mem bed gi nican ba, njap gi nisimnaimuhwidip niabiati ingwes ngun leu minu Mesir. Iggum ndigsi Sin dima jo ei Elim kin Sinai ikieti. 2 Mpe dima lene yahagom inso-nso nyen bak Musa kin Harun ei iggum ndigsi, 3 bipai <<Gino TUHAN kes hukum nimai ei nye dip tirigi po nibong ei minu Mesir pima lene dem. Lewo mpe di po ningat rin ei minu dima lene niyem kep mikwau kin njita nindig bibor di bindei nye. Noro jibuwak nye kwei ei iggum ndigsi dini apino nahagom minimai ninggum ug ri.>>4 Lene TUHAN pai bak Musa <<Nogindini midibindei ba, njita nindig bibor micut hwou ndam jahagom leu mpia-bbed him. Ma tungwatu nya ikam njita dima bikwop njap ba, ikam nok gi dem mem njap gom ndia. Gima rino midibingon yok leu binhyepo dikan tut bipia ibit Ditde nicuk yokti nya.>> 5 Lene ikam njita dima nok gi dem mem yok mbican bram yam mem njap gi nimuhwindagom.
6 Gima rino Musa kin Harun itri tut bak mben Israel yahagom <<Ariman mmunti lene mijo nibreisi mem je bipia TUHAN rino buwak je kwei leu minu Mesir. 7 Njap di hyep bu lene mijingat TUHAN de nikei-kau-keisi bou jiyai him. Noni miap jihyet tirigi po jinso-nso nyen pima. Ningat ne jingon sibui sut Noni lewo Harun nyeni ninok Nide awak nya binibit Nide nicuk nyeti nya he. 8 TUHAN Nonti rino miyai mikwau bije mem mmunti lene miyai roti bije mem njap bigyokti leu gi po jinso-nso nyen bak Noni pima tibim ei nitingou nsi tu. Tirigi jinso-nso nyen bak Harun nyeni lene gima dem kep nok jinso-nso nyen bak TUHAN.>>
9 Lene Musa pai bak Harun <<Ma acuk tungwatu nya yahagom bipia ikwei ya ei TUHAN Noho bei leu gi po inso-nso nyen pima tibim ei nitingou nsi tu.>> 10 Tirigi Harun mbrap bit mben Israel lene yahagom ikiek yoho ndam iggum ndigsi bingat lo, TUHAN de nikei-kau-keisi piga kros ei bumbuhuiti kwei. 11 Lene TUHAN pai bak Musa, 12 <<Dimiap tut mben Israel ide ninso-nso nyenti pima tu. Apai biyok bipia midibindei ba, mmunti lene mibui mikwau lene njap bigyokti migyem kep roti bindei yok ug ri. Leu binhyepo mijo nibreisi mem yok bipia Dani ne TUHAN bidinok ide Allah ri.>>
13 Mmunti leu api ha dumti imang bibor idwop juk bigyem mpia ei dihyei ninjek dip. Nok gima cem njap bigyokti lene nggou ut ei dihyeisi ttai ide prak meng yati bu. 14 Tirigi nggou dima nimihip kui su lene ingat lo, mun di dile bibor yem mpia ei dihyei ninjek dip di iggum ndigsi dima ba, dem kep nok njita emping. 15 Tirigi mben Israel ingat tu lene ingon kiowi tut bihig yam <<Mindei rini i?>>
Lene Musa buhup <<Gini ne njita di TUHAN yai bije ri.
16 Noni cuk je leu binhyepo jikam njita bit leu nok jijoi sutti ba, bikwop tungwagom-gom mikam njita nibuhunti dem liter can mem nonti kin liter can bu mem bikwop nide bat nya kin nide ig bei nsi nya cem.>>
17 Lene tungwatu nya yahagom igyai bit leu nok Musa nicuk yoti. Bihi ikam njita dima nibuhunti njiriek liter can lene bihi ikam bidem liter can bi. 18 Tirigi ibakilo njita dima lene jo nibreisi mem yok bipia yo di ikam njita nindig bibor lene nikenti jo bi ba, yo di ikam nimien lene ide dem mem yok. Gima rino yahagom ikam njita dem igbit nimangti di isuar. 19 Lene Musa pai biyok <<Ma jikon jide njita niken ei mem njap di hyep au.>> 20 Noro ibou poi ibit Musa nicuk yokti bi ba, ikon niken ei mem njap di hyep bu. Tirigi ikiju mem njap bigyokti lene ingat lo, njingwoi bipio hagom bimpiei bibor. Gima rino Musa ningon sibui sut yok. 21 Bikwop tungwagom-gom ug kam njita nok gi dem mem nonti mem njap bigyokti lo, tirigi mpia wam tu lene niken di jo ei dihyei ninjek dip jet bingwig.
22 Lene bikwop tungwagom-gom kam njita mbican bram yam mem njap gi nimuhwindagom ba, liter bitai bibikwop yahagom. Lene nibou nya yahagom idem yam ei Musa noho bei bipui sut binoni. 23 Lene noni pai biyok <<Suar jipiga njap di hyep binok njap di kwes-kwau bit leu nok TUHAN nicuk jeti tu. Njap di ammani ne ma jikang njita ba, jikwen hi bit leu jingon kanti. Lene jibet nindigsi ei mem njap di hyep bu.>>
24 Lene yahagom ibet niken ei mem njap di hyep bu bit leu nok Musa nicuk yokti lo, hi kroi ba, wer njingwoi bipio cem bi.
25 Lene Musa pai biyok <<Gini ne jide njita mem njap di ammani rin lewo njap di ammani ne jide Njap Nigwam Kep Ninghuisi ri. Njap di ammani ne ma jigwam kep jinghuisi mem gima jinggei sut TUHAN. Gino juug ei nisai bijinggok njita mem njap di ammani lene mijingat hi bi. 26 Jikam njita ei ninsi njap muhwindagom noro ug ei njap gi nimuhwindacan lene jigwam kep jinghuisi lewo njita micut kwei leu mpia-bbed him mem njap dima bi.>>
27 Lo bi lene ibou poi yuug nggok njita mem njap gi nimuhwindacan noro ingat hi bi. 28 Gima rino TUHAN hig ser Musa <<Yo dima ingkek ndok tut Ditde nicukti mem njap pig bu i? 29 Ma je di mben Israel jiyok ngon kep bipia Da di TUHAN dindo njap gom mem gima jigwam kep jinghuisi. Gima rino midiyai njita bije nok gi dem mem njap nitindur can ei njap gi nimuhwindagom. Suar jahagom jigwam hak ei jide prak meng yati hak mem njap gi nimuhwindacan ba, juug ei nisai au.>> 30 Gima rino mben Israel igyai kep midyai nya mem njap gi nimuhwindacan bi sren.
31 Mben Israel ijem njita dima ninyeng manna. Manna ninjek dip kep-kau ba, tirigi igyem lene ui-gwang kei dem kep nok roti di ahwei lon ngei srigsi.
32 Lene Musa pai <<TUHAN cuk nye bipia suar igyai manna nibuhunti dem liter can ba, igyok ei mem gima indo bak ide nintun him yamti di bram yam nya leu binhyepo ingat njita di Noni yai binye ei iggum ndigsi tirigi po Noni buwak nye leu minu Mesir pima bou igyai him.>> 33 Gima rino Musa pai bak Harun <<Ma ayai yeng gom kwei ba, akam manna nibuhunti dem liter can eisi ba, akon ei TUHAN Noho bei lene jo ei sirima mem ide nintun him yamti di bram yam nya ingat bou igyai him.>> 34 Lene Harun kes yeng dima bijo ei Brua Gi Preu nihui leu binhyepo jo nyahan ei sirima bit leu nok TUHAN nicuk Musati. 35 Mben Israel igyem kep manna kikau mem ari bingwam ningot bitai bibou yuug krau Kanaan ug e. Leu api iwin ide minu jep nya ei sirima. ( 36 Tungwatu nya ei nijam dima ikrau kep ide kilo di nide nisindemti dem liter ningot can.)