Idimig munggwom pinai mighumbou nya ei mem TUHAN
13
1 Lene TUHAN pai bak Musa, 2 <<Ma adimig munggwom pinai mighumbou nya yahagom ei mem Da lewo dinyeng tak kep mben Israel ide munggwom pinai mighumbou nya kin ide mindhe-ndhe nipmot bou nya yahagom.>>Njap Ndig Roti Di Dwoi Bi
3 Lene Musa pai bak mben Israel <<Ma jiyok ngon kep njap di ammani nok njap dino jimbut bijingwes ngun leu mben Mesir nya di yuubon je nok awak. Lewo njap di ammani ne TUHAN buwak je leu minu dima tug hon Nide nisindemti di nindig bibor. Gima rino ma jiyem roti di dwoi mem njap dini au. 4 Njap di ammani ne njap gi nigom mem jide bed gi nigom Abib rin ba, mijimbut leu minu Mesir mem njap di ammani. 5 TUHAN ba neheng bipreu ei mem jidigup bat-jidigai bat nya bipia Noni mindo minu di mben Kanaan kin mben Het kin mben Amori kin mben Hewi kin mben Yebus yoni ibong ser dima bije binok jide hanjop nsi. Tirigi TUHAN buwak je ug ei minu dibon ninnumti di kei bibor kei dima lene jiyok ngon kep nibon midut roti di dwoi bi mem bed gi nigom rino bed Abib bikwop ari bingwam hagom. 6 Suar jiyem kep roti di dwoi bi kikau ei njap nitindur muhwindacan ba, hon kep njap gi nimuhwindacan kui lene jibon pesta di binggei sut TUHAN. 7 Ma jiyem kep roti di dwoi ei njap nitindur muhwindacan dima au. Ma roti ninjep kin roti di dwoi nikenti jo ei jide minu dima au.
8 Tirigi sindi jikinyon ei gi jibon pesta dimati lene ma jimbot kep tut pesta dima bak jipmot bat nya bipia nibon midut dini ndo tut mun di TUHAN bibon mem je tirigi jimbut leu minu Mesir. 9 Nibon midut dima mipingok jingonti dem kep nok mun di bindo di jingot kin jinda kin jingwak. Lene nibon midut dima mipus jingonti leu binhyepo jindat kep TUHAN niggai serti nya ei juhui him ba, jiku hagom ei jingonti cem lewo TUHAN buwak je bijingwes ngun leu minu Mesir tug hon Nide nisindemti di nindig bibor. 10 Ma jibon pesta kep nibon midut dini dem igbit tto bou bikwop ari bingwam hagom.>>
Nicukti tut munggwom pinai mighumbou nya
11 Lene Musa pai bak mben Israel bu <<TUHAN mibuwak je ug ei minu Kanaan bit leu nok Noni ba neheng bipreu ei mem jeni kin jidigup bat-jidigai bat nya. Tirigi jinyeng tak kep minu dima lene, 12 suar jidimig jipmot mighumbou nya yahagom ei mem Allah. Nok gima tut jide mindhe-ndhe nipmot bou nya cem bak. TUHAN ninyeng tak kep hagom.
13 Noro ma jiyai domba nehen pap ningut gom biluei jide keledai nipmot bou di jidimig ei mem TUHAN. Gi bi lene jibui keledai dima ninggibi dip bimai hak ug. Suar jiyai domba nehen pap bak TUHAN biluei jipmot mighumbou nya bu. 14 Gino jipmot bat nya ingon kiowi tut nibon midut dini bihig ser je tut ei nidipti bu lene jibuhup biyok bipia TUHAN buwak nye bingwes ngun leu minu Mesir tug hon Nide nisindemti di nindig bibor lewo mben Mesir yuubon nye nok awak ei sirima nipou su. 15 Tirigi po Firaun ningkek ndok bisindui sut nyeni bimbut leu minu Mesir bi lene TUHAN tot munggwom pinai mighumbou nya ei minu Mesir yahagom bimai bitut mindhe-ndhe nipmot bou nya cem. Gima rino nyeni ibui ide mindhe-ndhe nipmot bou nya hagom ba, indig kep hum bak TUHAN noro igyai domba nehen pap biNoni biluei nyeni ipmot mighumbou nya. 16 Lene nibon midut dini mipingok jingonti dem kep nok mun di bindo di jingot kin jinda kin jingwak bipingok jingonti tut gi po TUHAN buwak je bijingwes ngun leu minu Mesir tug hon Nide nisindemti di nindig bibor.>>
Cou bumbuhui kin cou huma
17 Niabiati Firaun kes mben Israel bimbut tu lene Allah buwak yok ba, ikak puig di bikwam ndam mben Filistin ide minu bi. Mbro nok gino puig dima jei bi lo, Allah kan <<Gino mben Israel inso yonti tut gima suar ikon pran bit timiei minu Kanaan nya lene mpaba iluei ingonti bingkwei hanyen ug ei minu Mesir e? Lene gima dem tut bi.>> 18 Gima rino Noni buwak yok bimbut kak puig di dwei-dwei nyen ei iggum ndigsi di bie ug ei Muk Lipig.f Tirigi po mben Israel ijo leu minu Mesir pima lene ittei ide minggwen dem kep nok igya pranti.
19 Lene Musa cuk nide limwa nya bikon brua tut Yusuf ningut bittei bit leu nok Yusuf ba neheng bicuk yok nipou su. Mpe di pima ne noni pai <<Tirigi Allah teu je bijingwes ngun leu lene jiket dingut ba, juug sut leu minu dini.>>
20 Lene mben Israel ijo leu Sukot ba, yohok ide prak meng yati bu ei Etam ei iggum ndigsi ninghas him. 21 Lene TUHAN bie tut yok tug hon cou bumbuhui mem njap lene tug hon cou hum mem mmun bipiga digai puig mem yok. Gima rino dem mem imbut mem njap kin mmun cem. 22 Cou bumbuhui dima bie tut yok mem njap ba, cou hum dima bie tut yok mem mmun. Lene nok gima bikwop mmun-njap kikau.