Musa tri tut munggwom pinai mighumbou mben Mesir nya yahagom imaisi
11
1 Lene TUHAN pai bak Musa <<Midikes hukum gom kin bu ei Firaun kin nide limwa nya dip. Gima ngwig lene noni mikes je leu binhyepo jimbut bijingwes ngun. Nok gima he bi lewo noni mijji je bihigom leu minu Mesir. 2 Gima rino ma apai bak mben Israel bipia suar yahagom yahara isut bat mben Mesir nya tut mas kin perak di indei nya.>> 3 Lo bi lene mpe dima TUHAN bindei ba, mben Mesir ingon kei sut mben Israel. Gima he bi noro nibou nya kin ide limwa nya yahagom iba ingon srip huk Musa di ninyeng jei bibor.4 Lene Musa ug pai bak Firaun <<TUHAN pai bina bipia ariman mmun mau lene Noni miya bidem minu Mesir nisurti-nipekti hagom. 5 Leu api Noni miyai nimai bak munggwom pinai mighumbou nya bidem jide ig bei hagom ug ri. Noni miyai nimai bina di Firaun apmot mighumbou bibie leu api binut kikau ug bipek awak sop di sibui tig huk mbrei nipmot mighumbou ba, yahagom mimai ug ri. Bitut mindhe-ndhe nipmot bou nya hagom mimai ug ri. 6 Mben Mesir yahagom mipim kui jei sut hukum dini ba, ighyet kui yam dor njiriek mun di tungwatu nya imiap ei itingou nsi habiei ei nimbie him kikau ug bipek njap ningwig honti. 7 Noro nimai mingget mben Israel kin ide mindhe-ndhe nya bi. Mpe dima lene mijo nibreisi mem je bipia TUHAN bindei ba, Nide limwa di mben Israel kin ade limwa di mben Mesir ter leu yam.>> 8 Lene Musa mbrap gi ningwigsi bipai <<Mpe dima lene yo di igya kui na di Andigpoi yahagom mikwei kuk yok ei dimig him ba, ibidip huk da leu binhyepo dibuwak ditde limwa nya yahagom ba, nimbut bihigom leu je. Gima leu lene dimbut ug.>> Leu api Musa ningon sibui sut Firaun nindig bibor bimbut leu noho bei.
9 TUHAN pai bak Musa bipai <<Gi po Firaun ningkek ndok tut ahyet kikau pima mibon nituti mem gima dibon mindur nya hi kin bu ei minu Mesir.>> 10 Gima rino Musa kin Harun ibon mindur dima yok hagom ei Firaun noho bei noro TUHAN bindei ba, ningkek ndok ser apino noni sindui sut mben Israel ba, kes yok bimbut leu minu Mesir bi.