Allah hig Musa hanyen bu
6
1 Lene TUHAN binut bu bipai bak Musa <<Dani ne TUHAN ri. 2 Dindo Danti bak Abraham kin Ishak kin Yakub nok Allah Di Sindem Bibor ei mpe di po dindo Danti biyok pima. Noro dindo Danti nok TUHANd biyok bi. 3 Mpe dima lene dipreu ei mem yok bipia ei nidipti bu lene mporo midiyai minu Kanaan po nipou yo igyaijo eisi nok ingkiaisi pima biyok nok ide minu ninda rom. 4 Dimiap kep mben Israel ighyet tirigi ilua biDa drek dip mben Mesir di iba isibut bico kep yok leu api diyok ngon kep mun di dipreu ei mem yok tu. 5 Gima rino disok dihyet ei nani dip bak mben Israel bipia Dani ne TUHAN ri. Miditeu yok bingwes ngun leu mben Mesir di iba isibut bico kep yok. Midindo Ditde nisindemti di mindur bibor ba, dibiteu yok leu lene midikes hukum di buhun bibor ei mben Mesir dip ug ri. 6 Midibindei ba, mijinok Ditde limwa nya leu api mijikuk je biDa. Mijo nibreisi mem je bipia Dani ne TUHAN bidinok jide Allah di teu je bijingwes ngun leu mben Mesir di iba isibut bico kep je ri. 7 Midibuwak je ug ei minu po dipreu ei mem Abraham kin Ishak kin Yakub yoni tug hon neheng pima leu api midindo dihyei dima bije leu binhyepo jinyeng tak kep hagom lewo Dani ne TUHAN ri.>> 8 Lene Musa ndat kep TUHAN nihyet dini hagom bak mben Israel noro imiap ba, ibit nihyet bi. Lewo mben Mesir ide niba nisibut bico kep yokti pima bindei ba, ingon cut leu su.9 Lene TUHAN pai hanyen bak Musa, 10 <<Aug pai bak Firaun bipia suar noni sindui sut mben Israel bimbut leu nide minu.>>
11 Noro Musa buhup <<Gino mben Israel ikou sut gi ibit dihyet lene bit bon Firaun ngig nitingou mem dihyet kan bi lewo diji buhun bibor.>>
12 Nok gima lene TUHAN sok nihyet ei Musa kin Harun dip bak Firaun kin mben Israel bipai <<Dicuk yo cin dini leu binhyepo iteu mben Israel biyehei leu minu Mesir.>>
Musa kin Harun idigup bat-idigai bat nya
13 Ayat dini yok pui sut Musa kin Harun idigup bat-idigai bat nya. Yakub nipmot mighumbou Ruben yai nipmot bat nya ibou bitai di inyeng rino Henokh kin Palu kin Hezron kin Karmi. Yoni ne pung di ide keret nya intun him ri. 14 Lene Simeon di wak sop Kanaan nok nitnem yai nipmot bat nya ibou muhwindagom di inyeng rino Yemuel kin Yamin kin Ohad kin Yakhin kin Zohar kin Saul. Yoni ne pung di ide keret nya intun him ri. 15 Lene Lewi yai nipmot bat nya ibou ningai di inyeng rino Gerson kin Kehat kin Merari. Yoni ne pung di ide keret nya intun him ri. Lene Lewi de njap ug ei ari bingwam sratus gom ningot ningai ba, muhwindacan ug api noni mai. 16 Lene Gerson bon nipmot ibou can di inyeng rino Libni kin Simei. Lene yo cin dini idigek kep mpia. 17 Lene Kehat yai nipmot bat nya ibou bitai di inyeng rino Amram kin Yizhar kin Hebron kin Uziel. Leu api Kehat de njap ug ei ari bingwam sratus gom ningot ningai ba, ningai ug api noni mai. 18 Lene Merari yai nipmot ibou can di inyeng rino Mahli kin Musi. Lene yo dini yahagom inok nibou ig bei nsi nya di intun Lewi him kin yo di intun yok him bu.
19 Lene Amram wak nicig nikwohop Yokhebed nok nitnem leu api ibon ipmot ibou can di inyeng rino Harun kin Musa. Leu api Amram de njap ug ei ari bingwam sratus gom ningot ningai ba, muhwindacan ug api noni mai.
20 Lene Yizhar yai nipmot bat nya ibou ningai di inyeng rino Korah kin Nefeg kin Zikhri. 21 Lene Uziel yai nipmot bat nya ibou ningai di inyeng rino Misael kin Elsafan kin Sitri.
22 Lene Harun wak nitnem Eliseba di nicig ninyeng Aminadab. Eliseba bon nikijam Nahason. Eliseba yai nipmot bat nya ibou bitai di inyeng rino Nadab kin Abihu kin Eleazar kin Itamar. 23 Lene Korah yai nipmot bat nya ibou ningai di inyeng rino Asir kin Elkana kin Abiasaf. Yo dini ne pung di Korah de keret nya intun him ri. 24 Harun nipmot Eleazar wak Putiel nipmisop leu api ibon ipmot Pinehas. Lene yo dini yahagom intun Lewi him tug hon ide nibou ig bei nsi nya kin ide nibou keret nya cem.
25 Lene TUHAN dimig Musa kin Harun yongkom bicuk yok <<Ma jiteu mben Israel ba, ingwes ngun leu minu Mesir.>> 26 Yo cin dini igya ei nibou ndig mben Mesir noho bei bibicuk noni leu binhyepo kes mben Israel leu awaga.
TUHAN cuk Musa kin Harun hanyen bu
27 Tirigi po TUHAN mbrap bit Musa ei minu Mesir pima lene, 28 pai binoni <<Dani ne TUHAN ri. Suar atri tut mun di disok ei nani dip hagom hanyen bak Firaun.>>
29 Noro Musa buhup <<TUHAN e, ningat ne diji buhun bibor lene bit bon Firaun ngig nitingou mem dihyet kan bi.>>