Allah hig Musa
3
1 Mpe di gom bu tirigi Musa hyen kep nipmang Yitro di nok imam mem mben Midian pima nide domba nya kin kambir nya lene noni jem yok ug ei iggum ndigsi bikwei krau Nungug Sinai di kwes-kwau. 2 Ei sirima lene TUHAN de malaikati ndo nonti bak Musa tug hon hum njeng di sror ei warti. Musa tou kep hum di ninjeng sror lene nggap leu tut lewo hum yem war dima bi. 3 Lene noni kan <<Mbenjen! Gini ne mindur ri! Nggon rino hum yem war dima bi i? Suug ngat bisingig siyai kep mbigom ug e.>>4 Tirigi TUHAN ngat lo, Musa sindi su no dideu mpia dima lene TUHAN nihyet tibim kwei ndam noni leu warti bijem noni bipai <<Musa e? Musa e?>>
Lene Musa miap bipai <<We? Da rini.>>
5 Lene Allah pai <<Aya ayati hak. Akwei dideu Da au. Akwek ade srop leu amig jou lewo mpia di ayati dima kwes-kwau. 6 Dani ne adigup bat-adigai bat di Abraham kin Ishak kin Yakub ide Allah ri.>> Gima rino Musa nggai kep ser niimaisi lewo ningwes mien tut gima ngat Allah ningat bou niyai him a.
7 Lene TUHAN pai binoni <<Dingat bou diyai him bipia mben Mesir iba isibut co kep Ditde limwa nya. Lene dimiap Ditde limwa nya ighyet tirigi yahara Da leu binhyepo diteu yok bingwes ngun leu yo di ico kep yok dima. Dikan mungkun tut mun di buhun tak yok nya. 8 Gima rino dijuk kwei leu binhyepo diteu yok bingwes ngun leu mben Mesir inda nsi leu api midibuwak yok leu minu Mesir ndam minu jep di bon nibresti nindig bibor. Minu jep dima ne ninnumti di kei bibor kei rin lo, nogindini mben Kanaan kin mben Het kin mben Amori kin mben Feris kin mben Hewi kin mben Yebus yahagom ibong ser yo. 9 Dimiap Ditde limwa nya ighyet tirigi yahara Da tu ba, dingat bou diyai him bipia mben Mesir iba isibut bico kep yok. 10 Nogindini midipinak nani ba, aug ya ei Firaun noho bei leu binhyepo ateu Ditde limwa nya bingwes ngun leu minu Mesir hak ug.>>
11 Noro Musa buhup <<Dani dem mem gima bi. Bit bon duug ya ei Firaun noho bei biditeu mben Israel bingwes ngun leu minu Mesir kan bi.>>
12 Lene Allah buhup <<Midingat rin bit na leu api tirigi ateu yok bingwes ngun leu minu Mesir lene mijikuk je biDa ei nungug dini. Mun dima rinok mun di bindo tut bipia dipinak na.>>
13 Noro Musa buhup <<Gino duug ngat mben Israel biditri tut biyok bipia idigup bat-idigai bat nya ide Allah pinak da kwei ndam yok lene mbigom yoni mihig ser da tut Na di Allah anyenga. Gi nok lene notou midibuhup ighyet hanyen i?>>
14 Lene Allah pai <<DANI NE NO DI NINGAT RI.b Apai biyok bipia No di ninyeng DANI NE NO DI NINGAT RIN pinak na ug ndam yok. 15 Ma apai bak mben Israel bipia Dani ne TUHAN di idigup bat-idigai bat di Abraham kin Ishak kin Yakub yoni ide Allah pima rin ba, dipinak na ug ndam yok tu. Dani ne TUHAN ba, gima ne dinyeng di bijo ninno bijo kikau ri. Suar mben Israel ide nintun him yamti di bram yam nya igyok ngon kep dinyeng dima kikau buug hon nohonti bi. 16 Aug ba, anduk nibou mben Israel yahagom ei gom ba, atri tut biyok bipia Da di TUHAN di nok idigup bat-idigai bat di Abraham kin Ishak kin Yakub yoni ide Allah ba, dindo Danti bina tu. Atri tut biyok bipia dikwei yok diyai kep yok bidikan tut notou mben Mesir ibimangkrei yok tu. 17 Dikos tut bipia midibuwak yok leu minu Mesir lewo mben Mesir iba isibut bico kep yok. Leu api midibie tut yok ug ei minu jep di bon ninnumti di kei bibor lo, nogindini mben Kanaan kin mben Het kin mben Amori kin mben Feris kin mben Hewi kin mben Yebus yahagom ibong ser yo.
18 Ditde limwa nya mingig itingou mem ahyet. Lene abuwak nibou mben Israel ba, juug ngat Firaun leu api apai binoni bipia TUHAN di nok mben Ibrani ide Allah ndo Nonti bina tu. Suar Firaun sindui sut je bijimbut jimig mem mmun-njap ningai ug ei iggum ndigsi leu binhyepo jibon midut nindig mindhe-ndhe ei humti bak TUHAN di nok jide Allah.>> 19 Lene Allah binut bu bipai <<Dikan tut bipia gino dikes mun di buhun bibor ei noni dip drek dip je bi lene noni misindui sut je bijimbut kan bi. 20 Noro midiba Ditde nisindemti bikes hukum ei mben Mesir dip tug hon mun di buhun bibor di micut igkep yok. Apino Firaun misindui sut je bijimbut hak.
21 Midibindei ba, mben Mesir mingondut je leu binhyepo tirigi Ditde limwa nya imbut bingwes ngun lene miyehei he bi. 22 Noro bikwop sop mben Israel miyahara timiei minu Mesir di bong dideu kin nisut sop minu Mesir di bit bong leu binhyepo igyai sinsun kin mimau di iba mas bibon kin perak di indei biyok mikuisi. Lene mben Israel mijuk mun dini yok hagom ei imunggwom bat nipinai nya kin nisop nyati ba, ingwes ngun tut. Tug hon nisinati dima lene mijipos mben Mesir ide ndigban hagom bingwig leu yok.>>