SRAT NEHEI LEUSI
1. Allah kwek mben Ibrani leu awak leu api yahagom yuug ei Nungug Sinai.2. Allah preu ei mem Nide limwa nya ei Nungug Sinai leu api yai Nide Nicukti Simnai kin nicukti tut ide nibuhup biyamti kin ide nibon midutti nya biyok.3. Yoni ingot TUHAN De Prak Meng mem gima ikuk yok biNoni eisi ba, ibon mun di joti nya kin nimbumbati nya kin nicukti tut imam nya ide niyai munti nya kin nisinati mem gima ikuk yok bak Allah hagom.
Ningat ne srat dini pui sut Allah niyai munti nya tirigi Noni kwek Nide limwa nya leu awak bibindei ba, inok mben gom di ingon ya mem mun di Noni mibon mem yok ei nidipti bu.
No di ninyeng jei ei srat dini rino Musa lewo Allah dimig noni ei mem gima bie tut Nide limwa nya kwei leu minu Mesir. Hanjop nsi di jo nibreisi mem tungwatu nya yahagom rino Allah de Nicukti Simnai di jo ei Pasar ningot canti.
Nirop Ninda Ndigsi
Mben Israel ingwes ngun leu minu Mesir 1:1--15:21
a. Inok awak ei minu Mesir 1:1-22
b. Musa nisrekti ug bipek nibong ei Midianti 2:1--4:31
c. Musa kin Harun igya ei Firaun noho bei 5:1--11:10
d. Njap Ndig Paskah ngwig leu api ijo leu minu Mesir 12:1--15:21
Imbut leu Muk Lipig kikau ug bipek kin Nungug Sinai 15:22--18:27
Allah de Nicukti nya kin mun di Noni preu ei mem yok 19:1--24:18
TUHAN De Prak Meng kin nicuk yokti nya tut nibon midut nya 25:1--40:38
Mben Mesir ico kep mben Israel
1
1 Yakub di ijem ninyeng hi Israel kin nipmot bat nya di ibit noni ug ei minu Mesir kin itnem bat imunggwom bat nya inyeng rino,2 Ruben kin Simeon kin Lewi kin Yehuda,
3 kin Isakhar kin Zebulon kin Benyamin,
4 kin Dan kin Naftali kin Gad kin Asyer.
5 Yo di intun Yakub him dima yahagom imangti ibou ningot muhwindacan. Noro nipmot Yusuf bie buug ei minu Mesir nipou su. 6 Mimbrek-mimbrek bu lene Yusuf kin nikindig bat nya kin nikinjoi kin nide bat nya di ikui sur noni yahagom imai bingwig. 7 Noro yo di intun yoni him inyeng rino mben Israel ba, idigek kep mpia bibon imunggwom bat nya imang ndig ba, ide nintun him yamti di bram yam nya ikieng kep minu Mesir nisurti-nipekti hagom.
8 Mpe dima lene Firaun di nijep bu ya luei Firaun nitimiei nohoti ei minu Mesir noro noni kan tut Yusuf niyai munti nya bi. 9 Lene noni pai bak nide limwa nya <<Buhun bibor mem nye tut mben Israel. Lewo imang bibor ba, isindem bibor dor njiriek nye cem. 10 Leu ma nyeni ide siceu nya mikon pran bit nye lene hi rino mben Israel minjei siceu bit yo dima bikon pran bit nye leu api minang leua ide minu dini e? Jikwei ba, inggok puig di kei mem leu binhyepo yoni idigek kep mpia bu bi.>> 11 Gima rino yo di igya kui Firaun ita mindor nya di iba imbuk co kep mben Israel bikes midyai di buhun bibor ei inghat dip. Suar mben Israel ingot ig gudan bousi nindig bibor ei minu ndig Pitom kin Raamses cem leu binhyepo Firaun minju ndigban ninyeng hagom eisi. 12 Mbro nok gino mben Mesir ico kep mben Israel nindig bibor bikum eisi bu lo, mben Israel imangti kum eisi kikau bikieng kep minu Mesir nisurti-nipekti hagom dor njiriek bu. Gima rino mben Mesir ittin tut yok. 13 Lene iba imbuk co kep yok bihwen bit yok nindig bibor. 14 Apino mben Israel igyaijoti buhun bibor. Suar igyai midyai dino ingot ig proyek nya ba, igyai miai nya cem lo, mben Mesir ingondut yok kan bi.
15 Lene Firaun kes nihyet bak Sifra kin Pua. Sop cin dini impu sop Ibrani nya mpe dino igwam tut munggwom. 16 Noni pai biyok <<Gino jimpu sop mben Ibrani ba, tirigi igwam tut munggwom pinai lene suar jikos hak ug. Ne gino igwam tut munggwom sop lene jisindui sut yok ba, igyaijo.>> 17 Noro sop cin dini ne sop di ikuk yok bak Allah bibit nihyet ri. Gima rino ibit Firaun nihyet bi ba, isindui sut munggwom pinai nya cem ba, igyaisi jo. 18 Gima rino Firaun hig sop cin pima kwei bihig ser yok <<Nggon rino jisindui sut munggwom pinai nya di igyaijo i?>>
19 Lene ibuhup <<Sop mben Ibrani kin sop mben Mesir noyam bi. Lewo tirigi sop mben Ibrani inghim dut jei bi lene igwam tut munggwom haninyai nipou tirigi nyeni nuug mpu yok bigyo.>> 20 Gima rino Allah joi sut sop cin dima leu api mben Israel idigek bibor ba, imangti kum eisi bu. 21 Lene Allah bindei ba, sop cin dima ibon imunggwom bat nya lewo yahacem ikuk yok biNoni bibit nihyet. 22 Nok gima kikau bibou Firaun kes nihyet bak nide limwa nya yahagom bipai biyok <<Suar jicom mben Ibrani imunggwom bat nya ningwoi-ngwoi nipinai nya tut igyaijo ug ei Minyei Nil bimai ug. Noro ma jisindui sut munggwom ngwoi-ngwoi nisop nya ba, igyaijo.>>