Kappe Qhawthittepa Moonto Qhawthitto
21
Xaysa tupettay kappe qhawthittepa moontho qhawthitto an hiʼi,
kappessi paayyotattepa moonthossi paayotatte ippate,
pasokka xaynu koruy ye qaghni.
2 Kathamassi kʼulkʼullawwi Iyyerusaalame qhawthittessi qhamo xaante akkampakko hiisinu siratti kulakki sirattipa isi moonthonu Haallikkito kaanta odhdhanna hiʼa,
3 Holuppa ikkitto uuma qhaskadha ho hasa paya iqakkattessi kaanastattena lighana apaqha:
“Haadhi manne Haallikko korito kittatte,
usundhe qale qaakni,
usundhekka waarsho Huusu kodhdhine,
Usokka na qali kodhdhini,
Waako huusundhikka kodhdhuy,
4 ilmaamesikka inna ooshna,
xaysa tupettay farte takki asane takki ooye takki qootʼo ye kodhdhamanni,
moʼo maallay payni qaako paʼakossi illighghi.”
5 Hossi qakkatte kaanastattena qakkadha hasi iyyi:
“Ano olho kaasasi qhawthitto an konni” nakalakka iyyela payi:
“Oli an qalli ho dhukkaysathamipa dhuke qhooti kodhdhi maallay tooxa.”
6 Hasakka yela payu:
“Idhdhikkatti,
Payyotepa Dhikkatte Ano;
qhawho dheepodhinuy qandhe qelhossi qaghitonakki an xortho male nu teexni,
7 ho puti oli kaasasikki tayni,
Ano Waako annu kodhdhini,
usukka miʼaye haayyu kodhdhini.
8 Naqharray he ghaapa,
heye dhukkaysadhe,
he lokmadhe he napsadhdhe paaxa,
he mammaasa,
bhasanolawhe,
he killankonu sakata pana aayyolawhe kaasanna faroote thuusundhi paso haththetepa ho tiinattesa kʼurame ikkodhdhinti,
hussakka farte laanakay.”
Iyyerusaalame Qhawthittessi
9 Erkampattessi thaxxan mahxatto quktatte taxxan miira Haallikkito dhikkattatte na hoqhqhi ghapadhenna tootte iʼokaytipa hasa yela payi:
“Okay!
Xaante xiskatto Orposinna kodhdhinaasikki anho hiʼasniye.”
10 Nasso Haallikkitottay karo ghupo uuma damma kula ye akkippa kathamassi Iyyerusalame kʼulkʼullawwi ho moonthonuy Haallikkito kaanta oodhdhasi ye hiʼaasi.
11 Kathamissakka kaanaste Haallikkitottakki hxusi,
xeesno hammakussana qhamo awrukkossi uuma shoosha iyyaspidhe ana payipa qhamo eemadhakkito warari.
12 Ohinte uuma sikapappa the dhammay aʼawrigheete kodhdhi the mankaxe 12 sheeghakki na qagha,
mankaxadhdhissasa makaxxe kaffessi Israʼelate 12 nakki ana tooxipa erkampatte 12 isi na shikaara.
13 Karo oqhaye lighattay mankaxxe isex,
karo hakututtay mankaxxe isex,
karo hakaluttay mankaxxe isex,
karo oqhaye xullattay mankaxxe isexki na qagha.
14 Ohinte kathamassana kiriththo 12 sheeghti,
kiriththussasa makaxxe erkampawhessi Orpito 12 nakki ana tooxi.
15 Erkampattessi yema qalladhay sipilho awarkʼatte kodhdhi ikkathamapa mankaxepa ohintettay bhatʼintikki sheeghti.
16 Kathamissana sikapuntepa ghandhdhaqqunte thuusu ille kito,
karo salaxtakka ho ille ligha.
Isekka kathamissaasi sipilhossi awarkʼatte kodhdhittay bhatʼoy,
sikapunte thuusu kilo metire 2,400 ghanaquntepa haqqilakko sikaape thuusukka qhamussa kula.
17 Holuppa ohintesikka bhatʼoy,
bhat’ampakkossi arama erkampatte bhat’ittay kartannute thiisi metire 66ki hxafti.
18 Ohintissakka awrughessi ana payi iyyasptettakki aʼohini,
kathamisakka warkʼkʼe dhukatte the qhamo eemadhito wararatakki aghupadhi.
19 Kiriththo ohinte kathamissana awurughghessi kaanasame kaasatakki asiri,
awurughghessana makaxxe huusundhikka ho payyotattena iyyaspite,
ho lankanna sanpere,
ho isxanna kelkʼedhoone,
ho salxanna merkite,
20 ho hxupnanna serdhonike,
ho thapponna sertiyoone,
ho thaxxantonna kiristiloope,
ho setentonna pirille,
ho kollantonna worawure,
ho hudhdhantonna krispiraase,
hudhdhanpa toʼontonna yakinte,
hudhdhanpa lankanna ametestʼinoose an payi.
21 Mankaxxadhissa 12 awurughessi shoosha 12 tookko tookkito akkodhdhi,
mankaxxadhissa 12 awurughessi shoosha 12.
Onkessi dhamma kathamisana qaghakka warkʼessi dhukatte qhamo eemadhito hamakko na lighghi kula.
22 Haallikko Pogholhossi Olho Kaasay Alkasapa Orpussi qhooti Manne Kʼulkʼulawhe kaththamisana kodhdhe maallay Manne Kʼulkʼulawhe pile anu hiʼu.
23 Qhooti kaanaste Haallikkito nu hxusneppa Orpossikka nu hamakko kodhdhu maallay kathamisanu oqhqhaye taaki liqqayo qhamu hxusni ye gheeqasi.
24 Waarshidhdhekka hammakko kaththamasana qaghanakki lallaghamni,
nukusadhdhe kapatte qagha kaanaste thuusundhiisi kaththamissa kulakki okaasne.
25 Haaha awune qhooti ye qaghti maallay kuyyaqko hunkanakka payni mankaxadhdhe kathamisana olo kʼupi.
26 Kaanasuntepa kaanaste warshidhdheete kathamisa kulakki xulline,
27 He makaxxe huusundhi matʼafassi qaghito Orpitosa tooxame malettay he maghnopa lokme kodhapa ayyolawhe kathamissa ye xulline.