Ahxasessi Perko 1000
20
Xaysa tupettay erkampatte the qhashampakko hxohxnossi uuma hxahxanapa sansalaathe dhammay xarghottay ghapatti moonthonuy oodhdhay an hiʼi.
2 Isekka tawwo paʼako pafkossiisi ghapippa perko kuma shapi,
pafkussakka Taaploose taakki Seetʼana.
3 Qhamu ye waarshoosi dhappisninnu haaki perkussa 1,000 dhikkanni saasa hxohxnossi uuma hxahxasa kʼurippa na kʼupoy,
maathamakka na shoqhi.
Hatupekki xeere qhacʼasa iʼishghamni.
4 Nakalakka qakkattaane kaanastatte an hiʼi,
qakkattaanissa kaanastaattesakka he qhaqhittenu ghulno akkadhekki na qakkadhi;
holuppa he qhoota Iyyesuse masakareppa kʼaale Haallikito maallay ana pukkaqqe qhitʼunna napsadhdhe huusundhikki an hiʼi.
Usundhissa he aaghitakkossi pana lighno huusunuy ye sakatonki,
milikite thuususi mintema taakki xarghe huusundhisa ye kodhdhadhonki,
usundhissa fartatte ihhaqeppa Kristoose qale perko 1,000 poghlumonki.
5 He haqhe kapay haaki perko 1,000 dhikkanni saasa fartatte ye haqonki.
Husi haqmakko paayyotatte.
6 He haqmakko paayyotatte taynna usundhissa hehe poghadheppa kʼulkʼullawhe.
Farte lankay usundhena ghulno ye sheeghti,
naqharray kʼeesadhdhe Haallikkitopa he Kristoosekki kodhdhine.
Uso qalekka perko 1,000 poghlumonki.
Dhikkatte Seetʼanay
7 Perko 1,000 idhdhikkadhi tupettay Seetʼana shappeete iʼishghamna.
8 Warshidhdhessi xayto salaxna koru qagha Kookepa Maakokesia dhappisepa orxankonu haqisenukki lighni,
warshidhdhissana dhihakko huusundhi qhamo thaxakko pasito hinaasete qagha kula.
9 Usundhissa karo piyye qhaatʼe kulakki pullameppa paleete kʼulkʼullawhatepa kathamassi cʼikathamiisi qhoorronki,
naqharray haththe moonthonuy oodhdhipa usundhe dhlloppa patisi.
10 Tapiloosessi usudhe dhappisikka xayto aaghitakossippa hxumapakko aayay ana kʼuri pasossi haththetepa ho tiinatesa akʼuri;
usundhekka awnepa kuyyaqte perre ye hume sheeghennu haaka perre ye hume sheeghe saasa iqotʼuyamne.
Qhaqhite Dhikkatatte
11 Xaysa tupettay qakkatte kaanastatte dhammay the piqappa ho qakkattissa kaanastattena qakkadhaasikki an hiʼi,
piyyepa moonthokka inna miinatte ghoradhe,
xaytu na bhadhdhamnekka ye tayadhonki.
12 He farre kaanomopa he qhacʼooma iqakkattessi kaanastattena miinatte shikkaranakki an hiʼi;
matʼaafadhdhekka qhaqhashamonki,
matʼafa pile ho qaghittokka qhashamuy,
hessi farre qhamo kodhmossi huusundhi ikkodhadheppa amatʼafadheema nu tooxo kula qhaqhitte akkadhonki.
13 Pasokka hessi farre nakitatte qaghasi hela lihasu,
fartepa Siʼolekka hessi farre nakitatte qaghaasi hela lihasonki,
qhawho kaasay qhamo kodhmo huusu kula qhaqhitte akkadhuy,
14 Xaysa tupettay Fartepa Siʼolekka pasossi haththattesa kʼuramonki,
pasussa haththatte fartessi laankay.
15 Qhawho makaxko huusu matʼafassi qaghitosa ye tooxamu kaasay pasossi haththatesa kʼuramu.