Haallikko Kalataysadhe
19
Xaysa tupettay ikkitto dhamma ho koro kishana kula lighakki an kuta moonthito apaqhi:
“Haalle luyya!a
Dhinkopa kaanastepa humna ho Haallikko haanina,
2 qhaqhitte Thuusu dhukepa the pare qaghay qhooti kodhdhiti maallay,
xiskatto paalakessi aramay paalakunkottay piyye loktisa inna qhaqhamti,
qhoota kʼeeqhte kodhampawhe Huusu maallay haalo inna akki.”
3 Holuppa hasa payonki:
“Haalle luyya!
Perre ye hume sheeghennu haaka perre ye hume sheeghe saasa kuute na lighna.”
4 Xaadhighghessi 24 pa uumathassi salax qagho sheegha Haallikkossi qakatte kaanastattesa qakkadhi miinta raneppa nu sakatonkippa hasa payonki:
“Amen,
haalle luyya!”
Akke Pogholhito
5 Xaysa tupettay ikkitto hasa payakki qakkattessi kaanastattena qhaskadhi:
“Hune kodhampawhessi Usoosi ghaapa kaasay
kaanomopa he qhacʼoomakka
Haallikko haanisi kalataysadha!”
6 Holuppa ikkitto qhamo waarsho kishapa qhamo kolle dhammay elappa qhamo ghawwaqko dhikita hereʼana kula ligha ihhasa payanakki an apaqhi:
“Halle luyya!
Hossi Olho Kaasay Alkasa Haallikko Pogholho haani,
ippoghlumi.
7 Akke Orpossinna qhooti iʼtʼtʼuyeppa xante Thuusukka he gharisi maallay hxasonni,
hxaso dhamma iʼine dhaakadhapa kaanasnikka.
8 Xaantisannukka laalle piqay the xeesay the qhamo hammakkito haahay the akacʼcʼe thalpanna kodhdhi xaaffatte qhamu sirattinu anu teexi.”
Laalle xaaffattissay akacʼcʼe thalpanna kodhdhi kodhmo pare qaghunko kʼulkʼullawhattena.
9 Ekampattessikka iyyela payti:
“He yiʼossi akke Orpossinna kula ooqame hehe poghadhe paypa tooxoy” nakalakka iyyela payti “Hisi qallidhdhessi Haallikkito dhukatte.”
10 Anokka nu sakatenukki an luhheema na rani,
naqharray ise iyyela payti:
“Hela hxur,
olo ye sakati,
anokka qhamo haahupa korossi haahu qhoota Iyyesuuse masakara kula kodhampatteye;
Haallikkonu sakat!
Moʼo maallay payni ho qhoota Iyyesuuse masakkara Nassossi hxuumayye.”
Hossi Oollo Piqasa Qakkadhi
11 Xay tupettay moontho qhaashami an hiʼi,
moonthussa qhashaminakka oollo piqa qagha,
ho oollussana qakkadhana ho dhukkaysathamapa dhukampakko ana payi,
Usussakka dhukettakki qhaqhitte qhaqhni,
iʼorxamamakka.
12 Ehxhxe huusu halapko hathatte lighe,
pukkaqtemakka koopadhdhe kaanastatti qadhdhadhi,
makaxko Aʼusoma tooxi ho Uso male yaxakka ye arikki sheeghi.
13 Uso laalle kʼeqhtettay lahxamti urkuyi,
makaxko huusukka Kʼaale Haallikkito.
14 Serawithadhdhessi moonthito laalladhdhe akkacʼcʼe thalbhanna kodhdhi he piqoomapa he xeesomakki urkuyeppa oolladhdhe piqoomasa qakkadhonkippa isi nakala ashsha.
15 Koorate foolay thi waarshottay qhitʼni pakito na lighi,
tholakko sipilhitotakki usundhe rafisni,
holuppa uso hxohxnossi ana woyne tʼiipi miira dhikita Haallikkossi Olho Kaasa Alkasanakki oghghini.
16 Laalle thuusupa thafo huusuna makaxko ho paya Nukusa Nukusadhdheete,
Pogholho Poghladhdheete atooxikki naqagha.
17 Nakalakka erkampatte tootte moonthito oqhqhayatte kittatte xinpadhipa hiʼa,
isekka ikkitto dhammattay riirippa aaghe moonthoʼitha haqa kaasanna hasa payi “Okaya,
yiʼossi dhamma Haallikko gharisi kula illa hola!
18 Olho anna maallay illa holintekka sakanko nukusadhdheetepa ho inthawampawhe orxankitoonapa ho tannappeetepa ho oollidhdheetepa he oollidhdhe kulifsisana holuppa sakanko koro kaasanna hussakka he ayladhdhe rafsadhanapa ho ayladhdheetepa ho kaanumitopa ho he qhacʼoomana qhama yiʼintennu.”
19 Xaysa tupettay aaghitakkossippa nukusadhdhe piyyattepa qhipampawhe huusundhi he hossi oollo sappa qakkadhiisippa qhipampawhe huusu qale qhipamenu illa holekki an hiʼi.
20 Naqharray aaghitakkossi ighghapami,
hxumampakkossi aaya qhoota huusu kapa kodhdhipa dhahxhxootadhdhe kodhettay koro qhamu milikitessi aaghitakito akkannipa lighno aaghitakkossinnu sakatonkinnu kodhukka ighghapami;
usundhissa lakki inni qaghottay qaghanakki karo haththessi tiinatte qhamo pasito dhamma kitta ayaki.
21 He haqhekka koorate hossi oollo saappa qakkadhina pakeete lighattakki farre,
aaghe holottay haqakka sakanko huusundhi yiʼonkippa dhalaxonki.