Rane Paapiloone
18
Xaysa tupettay erkampatte pile the ghulno dhamma sheeghay the moonthonu oodhdhakki an hiʼi,
kaanaste hiisi hxusana haqti kappe ihhaahti.
2 Hasakka payippa ikkitto dhammattay riiri:
“Pappiloonessi dhamma irranti!
Irranti!
Xayto nassidhdhe magha na qaake,
xayto nassidhdhe lokmadhe kaasay na tayameppa
xayto aaghe lokmadhe hoolottay haqapa he koro shikshikeesa kaasay na taymadhekki kodhdhiti.
3 Waarshidhdhe kaasay qukte paalakunko hiisinakki quke,
poghladhdhe kappatte qaaka ise qali paalakume,
nakkatadhdhe kappatte qaaka kaasay hu iseesi ghartina haqti ishshorokume.”
4 Xaysa tupettay ikkitto pile immoonthikki hasa payanakki an apaqhi:
“Waarsho hayyu,
cʼuppo hiisi qhamu huni na qale kodhintennu,
haqidhdhe iseema okaynanakka qhamu huni qhootadhintennu,
nakalla sikaapuya,
5 moʼo maalla payni cʼuppo hiisi haaki moonthito hxafni saasa illa toorami,
Haallikkokka maghno hiisisi ihhela thaayi.
6 Maghno ihhuna dhaghghaposti kula ghaqqiti nu holasa,
maghno ikkotti kaasannukka xargho lakki nu holasa,
maahxaththossi inna qhukte qawni qawni hune lahxti kapa,
hunekka xargho lakki kodhapa nu lahxonkuy.
7 Hu he kaanastipa iyye gharti payi kula ghaqqi,
hunekka qootʼopa ooye nu teexa.
Saqko hiisittakka hasi paytipa isi he paseesay:
‹Qhamo pogholtatte an qakkadhi,
ano xiskatto tʼiirakko nafari andhikka,
moʼo kakki payni anu asanni.›
8 Hussa maallay haqidhdhe hiisi kuyyaqko toʼokko inna okayne,
fartepa ooyepa laaqe na okayna,
Haallikko Pogholhossi na qhaqhitte qhaqhna ho dhikita qhooti kodhdhi maallay,
haththettakki shaʼinti.”
9 Poghladhdhessi kappatte ise qale paalakumeppa nu gharettay isi qaaka,
ise ishshaʼanna kuute na lighaasikki hiineppa ooyonkippa uuma asanokki.
10 Qootʼo hiisikki ghaapneppa sikapnooma shikkaronkippa hasa payonki:
“Atho kathamassi dhamma Paapilone akko woyyo,
akko woyyo!
Kathamassi dhikita,
qhaqhitte thaahu toʼomalekki hooma dhikkatti.”
11 Holuppa nakkattadhdhe kappatte qaakakka maahxhxi feʼaadheesi qhawho na pithmanna qhooti ye qaghi maallay,
qhoota hiisi iʼoynapa uuma asanokki,
12 Maahxhxissa iffeʼadhekka warkʼepa sipilho pirrattepa,
awrughghe kaanasameppa awrughghe uuma shooshapa laalladhdhe xaaffawhessi akkacʼcʼe thalpanna kodhdhipa laalladhdhe idhdhoomapa laalladhdhe saaqhe soporqhakko kodhdhina ayoqhipa laalladhdhe uuma idhdhoomapa kaaressi oshoqno qawni qawni sheegha kaasannapa maahxhxe aʼilghe arapkitonapa kaare shooshanapa sipilho naasattenapa sipleetepa apalthito kodhdhi kaasappa
13 kʼerfepa kʼimamadhdhepa karpepa kʼipaathadhdhepa itʼaanapa tʼayye woynattepa zaythe ekerkitopa dhaammo uuma lunkaawipa kaspopa qholepa qeemmepa oollidhdhepa kaaretadhdhepa ayladhdhe pana napsadhdhe korito.
14 Usundhisakka hasi na payne:
“Olhossi adhdharrati ihhela miinatte sikaapuyi,
shorokunkopa kaanaste haahi kaasay ippate,
laankakka ye holle.”
15 Nakkatadhdhe maahxhxissa illassettay isena kaalla ghohekka qootʼo hiisi iʼusundhe ghaapisnapa sikapnooma shikkaronkippa ooyonkippa asanonki,
16 ikkitto dhammattakka hasa payonki:
“Atho kathamassi dhamma,
laalle xaaffatte akkacʼcʼe thalpanna kodhdhipa laalle idhdha poghulahdhdhe urkuye urukesatti;
holuppa warkʼepa awrughghe kaanasameppa he shooshattay siratti;
akko woyyo!
Akko woyyo!
17 Kodhathissay kaasay toʼomalekki patti.”
Hessi markape dhaanapa hena ashshapa hena kodhadhapa he qaako huusundhi pasooma kodhe kaasay sikapnomi shikkare.
18 Kuute kathamissa ishshaʼana lighaasi ihhiʼeppa hasa payonkippa riironki:
“Ata kathama husi kula dhamma xankanakki tayamni?”
19 Piyaaththeesikka pukkaqteema hela sixonkippa isi ooyapa asanokippa hasakka payonkippa riironki:
Akko woyyo!
Akko woyyo!
“Hessi markapadhdhe pasito sheegha kaasay,
hessi kodhaththe thiisittay shorokume,
Kaththamassi dhamma toʼomaleki pati!”
20 “Atho moontho;
olhona kodhdhamadhittay hxasoodha!
Kʼulkʼullawhepa erkampawhe pana hxumampawhekka hxasoodhindha!
Moʼo maala payni rakko ihhuneema hxafastina haqati
Haallikko inna qhaqhiye.”
21 Xayesa thupettay erkampatte dhikitakki awrukko qhutʼmatte dhamma ligha akkipa pasooma kʼurippa hasa payi:
“Kaththamassi dhamma Paapiloone humna hasa lighattakki kʼuramni,
laanka ye tayamnikka.
22 Ikkitto hessi sonqho yoqhanapa hessi qhalladhana,
ikkitto hessi shubhalepa kaththako yoqhana,
laanka ye hola kittatte qhaskanni,
he hxormunko alkasa,
laanka ye hola kittatte tayamne.
Ikkitto paapuratte
laanka ye hola kittatte qhaskanni.
23 Hammakkokka lanka ye hola kitatte hammamni,
hxaso ikkitto xaantattepa ho xaantitito
laanka ye hola kittatte qhaskanni,
nakkatadhdhe haahukka he piyye qhaatʼeete arama,
waarsho kaasakki bhaasanne haahuttay dhappami.
24 “Kathamissana kittatte kʼeeqhte hxumapawhattepa the kʼulkʼullawhatte pana hessi kapatte apaaxi kaasanakki tayami.”