Xiskatakko Aaghitakossi Saappa Qakkatti
17
Erkampattessi thaxxan mahxatto quktatte miira Haallikkitona ghapadhenna tootte iʼokaytipa hasa yela payi:
“Okay!
Qhaqhitte xiskkattossi palakunkottay aramay qandhadhdhe saappa qakkattina anho hiʼasa.
2 Poghladhdhe kappatte qagha kaasay ise qali paalakume,
koro kappatte qaaka kaasay quktessi paalakunko hiisinattakki hxayyodhi.”
3 Nakalakka erkampattessi Nasso Haallikkitottakki karo mandhito ye akkiti,
haahakka xiskatakko the aaghitakko idhdha pukkaqe thaxxanpa kaathakko 10 sheegha makaxxe Haallikko dhagghisa ana tooxisa qakkatti hiʼa.
4 Xiskattussakka laalle idhdhay the poghladhdhe urkuyekki urkesatti,
holuppa warkʼepa maahxhxe aʼawrughghe kaanasamenna kodhdhipa maahxhxe shooshakki siratti.
Xargheetekka mahxatho awwarkʼatte kodhdhi ho qhuktatte lokme palakunko hiisi koro shikshikeesa na hoqhisikki ghapatti.
5 Miinte thiisisakka makaxko qallithe bhadhdhamti sheegha ho hasa payakki ana tooxi:
“Paapilonessi dhammay yaaye koro paalakumanapa the lokme piyye qhaatʼetena.”
6 Xiskattusakka kʼeqhte kʼulkʼullawhatepa the koro qhoota Iyyesus Kristoose masakarattakki hxayyottinaki an hiʼipa uuma dhahxhxa.
7 Xaysa tupettay erkampattessi hasi yela payti:
“Moʼo malaka dhahxhxiti?
Haadhi qhoota xiskattosippa aaghitakkossi inna sappete qakkatti pukkaqte thaxxanpa kaththame 10 sheeghanaki anho qalliniye.
8 Aaghittakkussa ahhiiti xayna qharraʼitha iqqagha hanthu kapay ye qaghi,
naqharray hxohxnossi uuma hxahxanakki lighnipa karo patitte ashshoy.
Hessi kappatte qaaka piyye qhaatʼe uumamennu payatti makaxxe huusundhi Matʼafa Qaghitosa olo tooxu kaasay aaghitakussa qhamu xayna qharraʼitha qaghipa hantu isi ye qaghi naqharray qhamu holi isi okayassa ihhi’e payni idhdhahxina.
9 “Olissa kʼalpe arnaane sheeghasikki gheeqi.
Pukkaqissa thaxxan ghuppessi thaxxan xiskattussa na qakkatti,
10 usundhissakka poghladhdhe thaxxan.
Hxupin irrane,
tookko ighgheyya,
tookko haanna ye okayu,
iʼokayi payni kapay xere qhacʼa pattaki olanni.
11 Aaghitakkossi xayna qharraʼitha qaghapa haantu isi ye qaghi,
pogholho settentoy,
ususakka hessi thaxxanna tookko qhooti kodhdhi maallay karo patittatte ashshini.
12 “Kaaththanissa ahhiiti 10 poghuladhessi 10 haannay ye rafise tayadhonki,
naqharray qhamu aaghitakkossi qale xeeere qhacʼa poghlumnennukki ghulno akkanne.
13 Usundhissa qhooti dhihadhe toʼotte sheeghe maallay humnapa ghulno huusundhiisi aaghitakkossinnukki teexne.
14 Usundhissakka Orpossissa iʼorxanko haqisne,
naqharray Orpussa qhooti Pogholho poghladhdheetepa Nukusa nukusadhdheete kodhdhi maallay iʼusundhe putna,
hessi ooqameppa qholamonkippa isi dhukkaysathamakka naqali punne.”
15 Erkampaththessikka hasi yela payti:
“Qandhadhdhissa xiskattossi paalakumay na saappa qakkatti warshidhdhepa koro kishapa sanynyadhdhepa he pakke qawni qawni qalladha.
16 Aaghitakkossippa kaaththaniissa 10 ahhiiti xiskattossi paalakumaasi ishshikina,
heneqqepa tʼurkʼumpaqqe ise hxuronki,
sakanko hiisisikka iyyina;
haththettakka dhillonki.
17 Haaki Kʼaale Haallikkito dhikkanti saasa qhamu woʼo huususi dhikkisnennu,
holuppa qhamu dhihadhe toʼottettay ille gharreppa ghulno huusundhiisikka aaghitakkossinnu teexonkinnu ho dhihadhiisasikka saqqe huusundhisa xawwadhi Haallikko.
18 Xiskattussa ahhiitikka kathamassi dhamma poghladhdhe kappattesa poghlumna.”