16
Xaysa tupettay ikkitto dhamma ho manne kʼulkʼullawhesinna lighipa erkampattessi thaxxanna hasa payusikki an apaqhi:
“Ashshindhdha quktissay taxxan miira Haallikkitonaasi piyyeema elisanku.”
2 Erkampattessi paayyootattekka ashshoppa,
qhuktessi miira Haallikkitona piyyeema elisi,
he milikite aaghitakkossinna na qaghtipa he lighno huusunu sakatessa payshe uuma koro qootʼuya kodhdhamadhonki.
3 The lankakka qhuktesiisi pasooma elisi,
pasosikka kʼeeqhte qhawho farina kula kodhdhuppa,
olho qagho sheegha pasito kittatte qagha kaasakka farroy.
4 The isxakka quktessiisi kollepa qandhe qeelletesa elisi,
usundhekka kʼeeqhte kodhdhonki.
5 Xaysa tupettay erkampattessi qandhadhdheete ghulno sheeghay ihhasa payannakki an apaqhi:
“Hossi kedhdhannu qaghapa hantukka isa qaaghay kʼulkʼullitto,
qhoota qhaqhitte hasa ligha qhaqhti maallay
Atho ho pare qagha,
6 Qhooti kʼeeqhte kʼulkʼullawhattepa the hxuumampawhatte elise maallay,
Atho qhamu kʼeeqhte quknekka usundhe kotti;
hussakka ho usundhe gheeqasaye.”
7 Holuppa xaytossi ana teexakko itʼtʼoosina ikkitto hasa paya an apaqhi:
“Ee,
hossi Olho Kaasa Alkasa Haallikko Pogholho haani,
qhaqhitte thaahukka dhukepa the pare qaghay.”
8 Erkampattessi salxakka quktesiisi oqhqhayeemi elisti,
oqhqhayenukka qhamo haththatte koro dhillenu humna nu teexamu.
9 Usundhekka thorno dhikitattakki shaʼe,
makaxkossi Haallikkito haqusana ghulno sheeghasikki dhaghghise dhiishoy Haallikko kula ye holonkki,
yenu kaanaste teexonkikka.
10 Erkampattessi hxupnakka qhuktessiisi qakkattessi aaghitakito kaanastattesa elisi,
ahxase aaghitakkosinna tukkankottay loqhami,
korokka qootʼo husuna haqti isi hela qarrappe qhaana,
11 holuppa qootʼo huusundhipa payshe huusundhina haqti Haallikko moonthitosikki dhaghghise dhiishoy kodhmo huusundhi maghana kaalla ye holonki.
12 Erkampattessi thappokka quktessiisi kollessi dhammay Efratʼesessa elisi,
kollessikka poghladhdhessi karo oqhqhaye lighanna koru okaynanu onke qhamu ghartinuy tʼoqhi.
13 Xaysa tupettay pako pafkossinnapa ho aaghitakkito pana ho hxumampakko aayyanna nassidhdhe he maghooma isxe he mukuqqe lighooma inna lighana hiʼa.
14 Usundhekka he dhahxhxootadhdhe kodha nassidhdhe Seetʼanay,
orxanko kuyyaqkossi dhamma Haallikkossi Olho Kaasay Alkasana kodhdhamannanukki koro illa holasenu karo poghladhdhe piyye qhaatʼete qagha kaasa kula ashshine.
15 Pogholho Iyyesuse hasi payi:
“Lammi qhamo kereqkito an okayni,
qhawho qhamu ye tʼurkumpaqqe kodhdhinippa palanko na xinpadhu maallay thayripa isi urkuyte thuusu pankadha hohe poghadhi.”
16 Nassidhddhissa maghakka xayto pako ipraystʼattettay Armaketooneab ana payisa iʼilla holase.
17 Erkampattessi thaxxantokka quktesiisi hayyakkooma elisi,
qakkattessi kaanastatte manne kʼulkʼullawhattena kittatte ikkitto dhamma ho iyya:
“Idhdhikkatti!”
Qhaskadhuy.
18 Xaysa tupettay,
pirighe ghawwaqkitopa hereʼe thuusupa ghawwaqkopa titito kodhdhamadhu,
haaki qhawho kappeema uumamenu paayyatti haaka hantu saasa titito hasa ligha apari ye kodhdhamadhuy,
lellehamissakka the uuma dhikitay.
19 Kathamassi dhamma Paapiloone xayto isexsa iqhqhootami,
kathamadhdhe warshidheetekka pullamonki,
Haallikkokka kathamassi dhamma Paapiloonessi ihhela thaayipa,
maahxaththossi qukte miira huusu dhikitattay hoqhqhiisi nu teexuy.
20 Piyyadhdhe pasottay qhoorrammekka ippate,
ghuppekka ye tayamonki.
21 Aspitte kaanomay moonthonu koroma hayyi,
aspittissay hayyiti qawni qawni abhatʼa payni tootatte kilo hiisi kilo kirame 45 kula ghaqqi,
Haqussa ho uuma koro qootʼuya qhoti kodhdhe maallay koro haqo aspittissanna haqti Haallikkoosikki dhaghghisi.