Erkampatte Thaxxanpa Haqo Thaxxan
15
Milikitte pile the dhammappa the koro dhahxhxisay an moonthito hiʼi,
erkampatte thaxan he haqossi taxxan dhikkattatteesi ghapadhe hiʼa.
Olho ana maallay he dhikkattatte payi miirassi Haallikkito hu dhikkanni usundhettay qhooti kodhdhi maallay.
2 Xaysa tupettay paso ho purcʼuko kula warara haththe lahxadhikki an hiʼi,
pasussana kaanta he aaghitakkossippa lighno huusupa dhikko makaxko husunaasi pute ishshikarana hiʼa.
Usundhekka sonqhossi Haallikko nu teexisikki ghapadheppa
3 qhallithakkossi kodhampakko Haallikkito Muuseppa ho Orpossinna hasa payonkippa qhaalladhonki:
“Hossi Olho Kaasa Alkasa Haallikko Pogholho haani,
kodhmo haahu ho dhammapa ho koro dhahxhxisa.
Pogholhossi warshiddheete,
onke thaahu pareqaghunkopa dhuke.
4 Pogholho haayyu,
ho yeho ghaapi yaxa?
Hoye makaxko haahusi kaanasi yaxa?
Atho pattakki kʼulkʼullitto;
kodhmo haahu pareqaghunkito qhooti ximpadhi maallay,
warshidhdhe kaasakki okaynapa
ho miinta sakatonki.”
5 Xaysa tupettay manne kʼulkʼullawhessi moonthito qagha,
usundhissakka tunkanassi misikirinkito ho qhaashami an hiʼi.
6 Erkampattessi thaxxan haqo thaxan ghapadhekki manne kʼulkʼullawhesinna lighi,
usundisakka laalladhdhe uuma piqoma akacʼcʼe thalpanna kodhdhiisikki urkuye,
eero ithakka sakʼkʼadhdhe awwarkʼatte kodhdhiisikki shapadhe.
7 Xaysa tupettay uumathassi qagho sheegha salaxna tookko maahxattossi quktatte awarkʼatte kodhdhi taxxan miira Haallikkossi perre ye hume sheeghennu haaka perre ye hume sheeghe saasa qaakna na hoqhqhiisikki erkampattissay thaxnannu teexi.
8 Manne Kʼulkʼullawhesissakka kaanastepa humna Haallikkitona haqti kuute na hoqhqhi;
haqossi erkampatte thaxxan ghapadhe haaki dhikkanni saasa yaxakka karo manne kʼulkʼullawhissa kula xulle ye alkasu.