Orpossippa Qhawho 144,000
14
Xaysa tupettay Orpossi ighghupo Tʼiyyonenna shikkaranakki an hiʼi,
Uso qalekka qhawho 144,000 he miinte thuusundhisa amakaxko Huusupa ho Paappo Huusuna tooxikki qagha.
2 Kuta moonthonu ikkitto qhamo qandhe dhammapa ho ghawwaqko hereʼana kulakki an apaqhi;
ikkittusakka ho sonqho ayoqhina kulakki lighi.
3 Usundhissakka qakkattessi kaanastatte miintapa uumathassi salax qagho sheegha pana xaadhighghessi miinta qhaallitakko qhawthitto qhalladhe.
Usundhissa kappatte Haallikko na muradhi malettay,
yaxakka qhallitakkussaasi kolladhe ye alkasuy.
4 Usundhissa he xiske qale rafettay ye lokmadhonkia,
hehe tiqadhe.
Xayto orpussa ashshi kaasanna nakali ashshe,
Hallikkopa Orpussanu qhamu qharo kodhdhinennu he Haallikko korito kittatte na muradhi.
5 Aparay aayya ye qalladhonki;
meethekka yena qaghe.
Erkampatte Isex
6 Xaysa tupettay erkampatte pile the moonthoʼitha haqqakki an hiʼi.
Isisakka the warshsho kappatte qaaka kaasanuppa kaffe kaasanuppa he pakke qawni qawni qalladha kaasanuppa sanynyadhdhe kaasannu wonkele perre ye hume sheeghenna qallenu ghapatti,
7 ikkitto dhammattakka hasa payi:
“Haallikkoosi ghaapindha,
kaanaste nu teexa,
moʼo maalla payni xeere inna qhaqhitte qhaqhni idhdhaghghape,
hussa maallay hossi kappepa moonthopa paso pana qandhe qeelleete uuminu sakata.”
8 Erkampatte pilekka ikkitto dhammattay hasa payippa na kala ashshoy:
“Papilonessi dhammay warshsho kaasay qhamu qukte palakunko hiisi miira Haallikkito okaasa qukninu kodhay irranti!
Irranti!”
9 Erkampatte isxakka ikkitto dhammattay hasa payippa na kala ashshoy:
“Yaxakka ho aaghitakkosinuppa lighno huusunu sakata,
ho milikkithe thuususikka miinteema taakki xarghooma kodhdhasadhi qagha payni,
10 usussa quktessi miira Haallikkitona olho toʼokokka olo na lahxu maahxaththo miira huusuna qaghasikki qukni.
Holuppa haththepa tiinettakki erkampattadhdhe kʼulkʼullawhepa Orpossi miinta qootʼuyamni.
11 Kuute qootʼo huusundhina perre ye hume sheeghennu haaka perre ye hume sheeghe saasa ippiyyenu montho kula kuutamti.
He aaghitakkossninuppa milikkite thuusunu sakate taakki he milikite makaxkusana kodhdhasadhe kaasay awnepa kuyyaqte hxaysinko ye sheghne.”
12 Xeerisanakki kʼulkʼullawhe hayo Haallikkito tiqthadhapa,
isi Iyyesusenu dhukkaysathamettay qaaka dhuupaythettay dhikite usundhe gheeqasti.
13 Nakala ikkitto moonthikki hasa paya an apaqhi:
“Xaynu koru he Pogholho dhukkaysadheppa farronki hehe poghadhe paypa tooxoy.”
Nasso Haallikkitokka hasi payi:
“Ee!
Kodhmo huusundhi qhooti nu masakari maallay tardhinko huusundhina ihxhxaysanna.”
Xeere Ghimakkito
14 Xaysa tupettay urrathe piqakki an hiʼi,
ho uraththisanna saappeete qakkadhakka Miʼaye Qhawhitob lighi,
Usussakka kʼoope kaanasatatte awarkʼatte kodhhdhi kulaasikki pukkaqteema qadhdhadhi,
xarghitokka maacʼire foolakki sheeghi.
15 Erkampatte pile manne kʼulkʼullawhattena lighippa ikkitto dhammattay riirippa hossi urrathatte saappeete qakkadhana hasa payi:
“Xeere ghimakko kappinna qhooti dhaghghape maallay maacʼire ghapadhpa meeqay.”
16 Hussa maallay hossi urrathatte saappeete qakkadha maacʼire thuususi karo piyyatte hxurri,
kappekka meeqami.
17 Erkampatte pilekka manne kʼulkʼullawhessi moonthito qaghana lighi,
isisakka qhamossi kula maacʼire foolakki sheeghti.
18 Erkampatte pile the haththatte ghulno sheeghakki xaytossi ana teexakko itʼtʼoosina lighipa thessi maacʼire foolay ghapattina,
ikkitto dhammattay riirippa hasa na payi:
“Xurkukessi woynatte qhooti awshe maallay maacʼiressi foolaasi ghapadhpa xurkukessi woynatte kappatte qaghaasi ghimoy.”
19 Erkampattessikka maacʼire thiisisi karo kappatte hxurritipa xurkukesiisi ghimoppa maahxaththossi Haallikkito dhamma ana qukte woynatte miiray tʼiipisa yaki.
20 Woynisasikka kathamana seettottay amahxatussa kitta oghuppa tʼiipamoy,
kʼeeqhte na eltina shikkarte thiisi luukama oollitonakki hxafti,
haʼithakko sikape thiisikka kilo methire 300 kula ghaqi.