Aaghitakko Pasito Lighi
13
Xaysa tupettay aaghitakko tookko ho pasito lighaasikki an hiʼi.
Aaghitakussakka kaththakko 10 pa pukkaqte thaxxanki sheeghi,
kaathanisanakka kʼope kaanastatte kula lighay 10 ki sheeghi,
pukkaqaanisanakka makaxxe Haallikko dhaghghisakki na qagha.
2 Aaghitakkussakka ho sarikko ligha,
naqharray luhhe huusu he aaghitakkossi tipe ana payina kula,
pako huusukka ho karmito lighi.
Pafkossikka humna huusupa qakkaththe thuusu kaanastattepa ghulno huusu dhammasi aaghitakkossinu teexu.
3 Pukkaqaanessi aaghitakkitona toottatte payshitte uso poghe alkasna kula lighakki naqagha,
naqharray payshittessi inna dhinti;
koro piyye qhaatʼeete qaaka kaasay uuma dhahxettay uso kala holuy.
4 Pafkussa qhooti humna rafisattesi aaghitakusanu teexi maallay koro kaasay pafkussanu sakatuy.
Holuppa:
“Ho aaghitakkussa ligha yaxa?
Ho uso qale qhipame alkasna yaxa?”
payonkippa aaghitakkosinnu sakatonki.
5 Aaghitakkussanukka qallithe peeppitopa the Haallikko dhaghghissatte pakooma nu teexami,
leqqayo 42 qhamu rafisninu nu payami.
6 Lammi Haallikkopa makaxko Huusupa xaytossi inna qaaki pana uumatha monthito qaaka kaasasi dhaghghise payyu.
7 Kʼulkʼullawhe qhipepa pute qhamu alkasninu anu payu;
kaffeetepa,
sanynyadhdheetepa,
koro pakke qawni qawni qalladhapa waarshidhdhe kaasasa anu ghulno teexuy.
8 Hessi makaxxe huusundhi haaki piyye qhaatʼe uumamennu paayyatti matʼaafa qaghito Orpossi saqhamisa ye tooxamonki piyye qhaatʼeete qaaka kaasay aaghitakkosinnukki sakatne.
9 Qhawho qhaame apaqha sheegha iʼapaqha.
10 Ho poojuyame gheeqasti ippoojuyamna;
ho kooratettay fare gheeqasti kooratetakki farri;
dhupaythepa dhukkaysadhettay dhikite kʼulkʼullawhatte hu gheeqasti xeerisana.
Aaghitakko Kappatte Lighi
11 Xaysa tupettay aaghitakko pile ho kappatte ligha an hiʼi;
usokka qhamo orpito kathakko lakki sheeghi,
naqharray qhamo pafkito qallahdhi.
12 Humna aaghitakkossi paayyotatte payshitte farteema uso hxafasnanna dhinitakki olho kaasasi na miinta kodhi,
kappepa he kappatte qaaka kaasakka qhamu ususanu sakatne kodhu.
13 Haaki koro miinta moonthonu kappeema haththe oodhdhasni saasa milikkitaadhdhe kaanoma kodhuy.
14 Makaxko aaghitakossi paayyotattettay qhamu milikkitadhdhe konninu qhoota anu humna teexi maallay koro kappatte qaakasikki dhappisi,
aaghitakossi koorate paysheestipa dhinunukka qhama lighno huusu nu kodhdhinennu usundhe hayu.
15 Aaghitakkossi laankay qhamu lighno aaghitakkossi paayyotattenu nasso qaghito teexininnukki anu humna teexi,
olho ana maallay nassussa qaghito nu teexikka qhamu qalladhe alkasnipa he usoosi ye sakateesi paaxasunnu.
16 Holuppa kaanumopa he qhacʼooma,
shorokkepa teekollo,
poghladhdhepa ayladhdhe kaasay xarghooma taaki miinteema qhamu milikite thuusu ana kodhdhininukki kittessi;
17 olhu na maallay hasa kodhdhikka qhawho yaxakka ho mlikite aaghitakkusana husakka makaxkko huusu taakki dhikko makaxkkusana ye sheeghi olo pithmadhepa lasadhe qhamu ye alkasninnu.
18 Olisakka arnane ighgheeqi,
qhawho yaxakka ho kʼalpe sheegha idhdhihakkusaasi upadha,
moʼo maalla payni dhikkussa dhikko qhawhito.
Dhihakkusakka 666.