Xiskattakkopa Pafko
12
Nakalakka milikite dhammay the koro dhahxhxisakki monthito armadhi,
xiskatakko the oqhaye urkuytipa leeqqayoosikka luhhettay oghadhdhippa pukkaqeemakka kʼoope kaanastatte the xuskitte 12 naqaghe qadhdhadhikki armadhi.
2 Isisakka the sheeghay,
qhuqhayithe ise ghapippa dhalenu rakkadhipa riiri.
3 Xaysa tupettay milkite pile monthito armadhi,
pafko dhamma ho idhdha ho pukkaqte thaxanpa kathakko 10a sheegha ho pukaqisasa kʼoope kanastatte thaxxan qadhdhadhi armadhi,
4 siito huusutakka xuske moonthitona xargho isexna tookkoosi kiikuppa piyyeema hayyisuy.
Qhooti miʼayisaasi loqhe woʼi maallay xiskkatossi dhale itʼtʼuyti miinta shikkaaru.
5 Isekka shampo ho warshidhdhe kaasaasi thollakko sipilhitottay rafisna idhdhalti,
Miʼayissa kapay karo Haallikkitopa karo qakkatessi thuusu kaanastatte kulakki simidhami.
6 Xiskattussakka karo xaytossi Haallikko gharisi kuyyaqko 1,260 ana isi pankanni piyye mandhitona qhagha kula ghoradhi.
7 Xaysa tupettay moonthito orxanko haqi;
Mikaʼeelepa erkampatadhdhessi na kaalla qagha pafkosiisi qhiponki;
pafkopa erkampatadhdhessi na kaalla qaghakka inna qale qhipame. b
8 Naqharray pafkossippa hessi na kaalla qagha ipputadhe,
xaysannu koro moonthito xayto dhaponki.
9 Pafkossi dhamma tawwo paʼakkossi ikʼkʼurami.
Ususanakka Orriththo thakki Seetʼana ana payi,
uso hossi piyye qhaatʼe kaasasi dhappisa,
ususakka karo kappatte kʼurami,
erkampattadhdhe nakaalla qaghakka uso qale kʼurame.
10 Xaysa tupettay ikkitto dhamma ho moonthonu hasa paya an apaqhi:
“Haadhi dhinisepa humnapa
ahxase Haallikko haaninapa
ghulno Kristoose Husunakki okayi,
Kesashittossi awnepa kuyyaqte koro Kristoose dhukkayasadhasi
Haallikko haani miinta kasasa ikʼkʼurami.
11 Usundhekka kʼeeqhte Orposinnatappa,
kʼaalessi masakarettakki pute.
Usundhissa haaki farrine saasa
napse thusundhiisi ye qhararsadhonki.
12 Hussa maallay moonthidhdhepa
hena qaaka kaasay
hxasodhindha,
kappepa paso kapay he ooyindha,
moʼo malla payni
Orriththo qhamu xeere qhacʼa nu haqhessa iʼaripa
miira dhammattay karo hahundhi oodhdhuy.”
13 Pafkossi qhamu piyyeema kʼuramisa iʼarina,
xiskattossi shampo dhaltiisikki ghoghori,
14 naqharray iseesi karo xaytossi mandhito Haallikko nu gharisi kula qhamu haqqintinu hoolo kawwarisossi dhammana kulakki anu teexi,
hussakka qhamu tawwusana kaanta sikaapuyintipa perko isexpa karoc kulaghaqqi inna ise pankadhana oladhinnuy.
15 Pafkossikka xiskattussa qhamu shoqhshoqhakottay akkamintinukki qandhe kolle sorray kulaghaqiisi pakito thufi.
16 Kappe kapay xiskattusaasi pehisenukki illena kaala qhaashamtipa qandhessi pafko thufiisi loqhi.
17 Pafkossukka xiskattosissa immiirodhipa miʼaadhessi hiissi haqhe hayyo Haallikkito tiqthadhapa isi qhoota Iyyesuse masakarra qhipennu ashshoy.
18 Iʼashshi tupettay pasito hinaseete thaxakooma shikkaaruy.