Misikkire Lakki
11
Xaysa tupettay thollakko aʼolottay bhatʼni ho shompokʼakko ligha aye teexi,
hasakka ayela payu:
“Ashshapa Manne Kʼulkʼullawhe Haallikkitopa xaytossi ana teexakko itʼtʼoosisi bhatʼoy,
he xaytusana Haallikko kaanasasikka dhihoy.
2 Ghinteesi kapay olo bhatʼi,
moʼo maalla payni ghintissay the koro ye koro Ayhuddhatte kodhdhunnu teexamtiye;
usundhissa kathamassi kʼulkʼulawiisi liqqayo 42 aylunkottay rafisne.
3 Miskkiradhessi lakkinu ghulno annu teexni,
usundhekka lalle asanatte iʼurukuyneppa kuyaqko 1,260 hxuuma qalladhonkki.”
4 Usundhissa he Pogholhossi piyye qhaatʼe rafisa miinta shikkara ekertakko lakkipa mahxaththossi ana hammakko xawwadhi lakki.a
5 Yaxakakki usundhe kottaʼenu haqna payni,
haththe pako huusundhina lighnapa parakaradhdhe husundhiisi patisi,
ho usundhe kottaʼenu dhihadha kaasay onke hasa lighattakki panni.
6 Xinki hxuuma qalladhenna irrawo qhamu ye dhipninnu monthoosi kʼupenuppa qandhadhdhe piyyatte qagha kaasaasi karo kʼeqhtatte oohenuppa kappeesi qhamu woʼe kula haqo hunkatakka shoqhenu ghulnu sheeghe.
7 Immiskrinko huusundhi dhikkise tupettay aaghitakkossi hxohxnossi uuma hxahxana lighnakki usundhe qale qhipamnapa usundhe puthuppa paaxukka.
8 Pukkaqqe huusundhikka kathamassi dhamma lighnottay Setoome taakki Kiptʼe ana payina liqakkoomi haqhne,
kathamissakka hossi ana Pogholho huusundhiisi maskʼalaama dhisi.
9 He sanynyadhdheetepa,
kaffeetepa koro pakke qawni qawni qalladhanapa warshidhdheete okaye kaasay kuyyaqko isexpa karo saasa ippukkaqqe huusundhiisi eemneppa qhamu olo mayninukka kohxhxonki.
10 Hxumampawhissa lakki he koro kappatte qaakasi qootʼuye qhooti kodhdhe maallay koro piyyatte qaaka kaasay olho usundheema hxafittay ihxhxasonnapa isi ille teexakko tetteexa.
11 Naqharray kuyyaqkossi isexpa karo illighghi tupettay nasso qaghito Haallikkito kanta okayipa na xullu,
usundhekka haqonkippa shikkaronkki,
hessi usundhe eemakka uuma murukonki.
12 Xaysa tupettay ikkitto dhamma ho monthikki:
“Hassa kula hadhdha!”
na payakki apaqhe;
parakaradhdhe huusundhi inni usundhe eemana urathettay karo monthito hadhdhonkki.
13 Xinkisana titito dhamma kodhdhamadhi,
kathamasina xargho hudhdhanna tookko pulamuy,
hussana haqti qhawho 7,000 farroy,
he pehekka uumi ghapeppa Haallikko monthitonu kaanaste teexonki.
14 Wooyyossi laankay illighe,
haadhi wooyyo isxakki wadhettay okayna.
Kaaththako Thaxanto
15 Erkampattessi thaxanto kaaththakkoosi yoqhi,
monthikko ikkittaane kaanooma he hasa payakki qhaskadhi:
“Poghlunte piyye qhatʼeete
the Pogholho Haallikko haaninapa the Kristoosessi huusunakki kodhdhiti,
Uso perre ye hume sheeghennu haaka perre ye hume sheeghe saasa ipoghulumni.”
16 Xaadhighghessi 24 Haallikko minteema qakkataane huusundhisa qakkadhe ikkaheppa haki mintettay kappatte hxafne saasa Haallikkonu sakatonki;
17 hasakka payonki:
“Hossi kedhdhay qaghapa hantukka isi qaghay,
Hossi Olho Kaasa Alkasa,
Haallikko Pogholho haani,
an ho kalataysadhaani,
moʼo maalla payni Atho humnassi haahu dhamma aghghapatipa poghlumay.
18 Warshidhdhe ye Haallikko dhukkaysadhekka immiirodhe,
miira haahukka na okayu,
xeere he farressa anna qhqhaqhitte qhaqhintikki okayi.
Holuppa hxuumampawhe kodhampawhe haahunu,
kʼulkʼullawhepa he makaxko haahu ghaapanu,
kanumopa he qhacʼoomanu annu hxaayye huusundhi teexintikki okayi.
Holuppa xeere he piyye patisaasi anna patistikki okayi.”
19 Xaysa tupettay Manne Kʼulkʼullawhessi Haallikkito monthito qaghakki qhaashami,
taapotessi katapatte xayto kʼulkʼullawina qaghakka ximpadhi.
Ghawwaqkopa pirighe thuusupa ikkitto huusupa titito pana aspitte dhamakka kodhdhammadhi.