Kolle Qaghito
22
Xaysa tupettay erkampattessi kolle qandhe qaghitona the qhamo eemadhito wararappa isi qakkattessi kaanastatte Haallikkitopa Orpossinna lighaasikki ye hiʼasti,
2 kollissakka onkessi dhammay kathamissana kittekati elti.
Kollisana karo lakki kakkata karko qaghitoa ho liqqayo leqayooma awshapa perkito 12 isi awsho teexa qagha.
Aahxe karkusanakka he warshidhdhe dhinisa.
3 Xaynu koru qhiicʼo ye qaghni,
qakkattessi kaanastatte Haallikkitopa Orpito kathamisana kittatte qaghne,
kodhampawhe Huusukka iʼuso kaanasna;
4 Miinte Haallikkitoosikka ihhiina,
makaxko Huusukka miinttatti na qaghni.
5 Xasannu koru awune ye qaghne,
Pogholho Haallikko qhootinnu hxusni maallay hammakko taakki oqhqhaye ye usundhe gheeqasti,
perre ye hume sheeghennu haka perre ye hume sheeghe saasi poghlumne.
6 Erkampattessikka iyyela payti:
“Oli an ho qalli ho dhukkaysathamapa dhuke.
Pogholho Haallikkossi Nassottay hxumampawhenu qalladha olho xeere itʼtʼana kodhdhamannaasi qhamu kodhdhampawhe huusunu hiʼastinukki erkamapatte eraki.”
Okaye Iyesuse
7 Iyesuse hasi payi:
“Haadhi miinakalte an okayni,
qhawho kʼaalessi hxuuma matʼafinna tiqthadha ho he poghadhi.”
8 Ho oli apaqhipa hiʼa ano Yohaanise.
Xinke an oliisi apaqhipa hiʼiana erkampattessi olissa ye hiʼastinu sakatenukki an luhhe kala narani,
9 ise kapay iyyela payti:
“Hxur,
olo ye sakati;
moʼo maallay payni anokka ho qalepa koro haahu hxumampawhepa hessi kʼaali matʼafinna tiqthadha qale kodhampatteye,
Haallikkonu patta sakat!”
10 Hasakka yela payi:
“Perre dhikkattatte qhooti itʼtʼuye maalllay kʼaalessi hxuuma matʼafinna qaghaasi olo mathamattay kʼupi,
11 ho maghno kodha immaghno kodhe huusu thiyyisa,
ho lokme kodhakka illokme kodhe huusu thiyyisa,
ho pare qaghunko kodhakka ippare qaghunko koddhe huusu iththiyyisa,
ho kʼulkʼullunko kodhakka ikʼkʼulnko kodhe huusu thiyyisa.”
12 Iyesuse hasi payi:
“Haadhi Ano miinakale an okayni,
hxaayye an qhawho kaasannu qhamo kodhmo huusu kula teexnikka ye qale.
13 Ho Qharreetepa Ho Karo Miinatte,
Payyotepa Dhikkatte Ano.
14 “He karkossi qaaghitona hxafepa mankaxxadhdhettay kathamissa kula xulle qhamu nu paymintinu laalladhdhe huusundhi shoxadhe hehe poghadhe.
15 He qhamo harrete lokmadheppa bhasannolawhepa he palakumapa he koro poghghapa he killanko kaanasapa he ayya cʼikadhapa isi kodha kaasay kathamissana seetto korakki haqhne.
16 “Ano Iyyesusekka qhamu erkuusi hune qallintinukki an erkampatte thaayyuusi mannadhdhe kristana kula eraki.
Ano xissitte sanynye Taaawithennapa xuskitte pakkalhossi xayto qhayana hxusay.”
17 Nassopa xantessi:
“Okay” ki paye;
ho apaqhakka:
“Iʼokay” paya,
ho dheepodhi kaasay iʼokayapa qandhessi qaghito gheeqiisi xortho maalle hasa qukuy.
18 Qhawho kʼaali hxuumay matʼafinna qagha apaqha kaasay ihhe tiqthadhi;
yaxakakki kʼaali saama olho pile padhawna payni Haallikko haqossi matʼafissa tooxami kaasasikki na okasni.
19 Qhawho kʼaali hxuumay matʼafissa tooxamtina olho toʼokokka na qhacʼasna payni,
Haallikko farotessi amatʼafisa tooxi karko qaghitonapa kathamassi kʼulkʼullawinakki na haqhasni.
20 Iyyesusessi oli kaasasi thorruya hasi payi:
“Ee miinakale an okayni.”
Amen.
Pogholho haani Iyyesuse,
okayi!
21 Teexakko Pogholho haani Iyyesuse iwwarsho Haallikkito qale kodhdha!
Amen.