9
Erkampattessi hxupnay ikkaaththakkossiisi yoqhtina,
xuskitte kuta moonthonuy piyyeema puqqiti an hiʼi,
xuskittissannukka qhashampakko hxohxnossi uuma hxahxanakkia anu teexi.
2 Xinke hxohxhxnossi uuma hxahxaasi qhaashtina kuute the haththe uuma dhammanna kulakki na lighi.
Kuute hxohxnusana lightikka oqhayepa moonthosi thukkanisi.
3 Kuutisannakka ayyakko lighuppa piyyeema oodhdhuy,
ghulno kaythito piyattena kula anu teexuy.b
4 Usundhissakka he farakko Haallikkito mintatte yena qaghisi patta qhamu kottaʼenennu dhiishoy qashko taakki dhishto kʼartaxxa takki kaaresi qhamu ye kohxnennukki anu qalli.
5 Leeqqo hxupin qhamu usundhe qootʼuynennu dhiishoy qhamu paaxnennu olo nu payu;
hu usundhe qotʼuynekka qhamo kaythakko ikkoro qhawi payni koro qhararasi kula.
6 Kuyyaqqisana koro farteesikki gheeqni naqharray ye tayni,
farreenukka iyyookna naqharray farte innaqhara ghorannay.
7 Ayyakussa oollidhdhe orxankonu gharsadhekki lighi,
kʼoopadhhdhe awwarkʼatte kodhdhi kula lighaasikki pukkateema qadhdhadhe;
miinne huusundhikka he korito illighe;
8 kasso huusundhi ho ihadheeti lighi,
ilghe huusundhikka he karmito lighe.
9 Maahxatossi orxankito asiplihito kodhdhi aʼeeroʼitha shapadhi kula lighakki sheeghe;
ikkitto hoolo husundhinakka ikkitto oollidhdhetepa ho kaaretadhdhe kisha orxankooma tuulana kulakki lighi.
10 Qhamo kaythakito siitito laahxko sheeghe;
holuppa humni liqqayo hxupin korottay qootʼuyne siitidheeti na qaghi.
11 Usundhissakka nukusi sheeghe,
nukusissakka erkampatte hxohxnossi uuma hxahxanna,
makaxko hiisikka pako Ipraystʼattettay:
“Apatoone”,
pako Krikattettay:
“Apoliyone” (hussa payyo the patisay).
12 Woyyossi paayyottatte illighghi,
nakalakka woyyo lakki okayna.
13 Erkampatte thappokka ikkaaththakkossi yoqhtina;
ikkitto kaathanessi maahxaththo teexakito awarkʼette kodhdhi Haallikkito miinatte qaghana ligha apaqha,
14 ikkkittussakka erkampattessi thappoy kaathakko ghapattina hasi na payi:
“Erkampattessi salax kollessi Efratʼeese dhammassa shapameesi ishshigha.”
15 Erkampattissay salax koro piyyatte qaghana xargho isexna tookosi qhamu paxnennu,
saathippa kuyyaqkuppa leeqquppa perkunnu gharsame i’ishighame.
16 Hessi oollidhettay qhipamana dhihakko huusundhi miiliyoone 200 qhamu kodhdhisa apaqha.
17 Oollidhdhepa hessi na sappeete qakkadha an raʼetay hiʼi hasi lighe,
mahxathossi orxankito iʼero itha shapadhe ho qhamo porhxito idhdha,
ho qhamo awrighghessi yaakinthe ana payi montho ligha kula pana ho kʼalame oypathito sheegha kulakki lighi.
Pukkaqaane ollidhissanakka he karmidheete kulakki lighe.
Pakke huusundhinakka haththepa kuute pana tiinec na ligha.
18 Haqossi isex pakke huusundhinna lighattay hisakka haththepa kuutepa tiinettay korito xargho isexna tokko farroy.
19 Moʼo maalla payni humna oollidhissana pakkitopa sitito inna qaghi,
siitidhdhe husundhikka tawwo lighe,
siitidhdhissa qhooti pukkaqane tawwito sheeghe maallay hu koro kottaʼekka hussattay.
20 He haqussa isexittay ye faronki haantukka kodhmo huusudhi magha ikkodhenna Haallikko kula ye holonki.
Nassidhdhe maghapa killankidhdhessi awrkʼattepa pirratepa sipilho shooshanapa awrighgheetepa kaarete akodhdhi ye hiʼeppa apaqheppa ye ashshe alkasennu sakate ye hxuronki.
21 Holuppa napse poghepa sokkittopa lokme palakunkito takki kerquntatte Haallikko kula ye holonki.