Qhashame Maathama Thaxxantonna
8
Orpossi immaathama thaxantoosi qhaashina saathatte kaaro kula ghaqqitti moonthito kʼampaye kodhdhamadhi,
2 xaysa tupettay erkampatte thaxxan he Haallikkito miintte shikkaarasikki an hiʼi,
usundhisanukka kaaththakko thaxxanki anu teexi.
3 Erkampatte pile the mahxatto awarkʼatte kodhdhi ana itʼaana kuuti ghapatti okayipa xaytossi ana teexakko itʼtʼoosi kapa shikkari;
isisanukka mahxattossi teexakkito awarkʼatte kodhdhi qakkatte kaanastattena miinte qaghasa qhamu ghissoote kʼulkʼullawhatte illay itʼtʼoostinu itʼaana kisha anu teexu.
4 Kuute itʼaanisanakka ghissoote kʼulkʼullawhatte illay xargho erkampattisana kuutamippa Haallikkito kanta hxafoy.
5 Erkampatessikka mahxattossi ana itʼaana kuuti ghapattipa porhxossi mahxatto teexakkitona qaghaasi nahoqashippa karo piyatte kʼuri;
ghawwaqakopa pirighepa hereʼe thuusu pana titito kodhdhamadhu.
Kaaththakko Taxan
6 Xaysa tupettay erkampattessi thaxxan kaaththakko thaxxanki ghapadheppa yoqhenu gharsadhonki.
7 Erkampatte paayyotatte ikkaththako hiisi yoqhtina,
aspittepa haththe he kʼeqhte lahxadhekki moonthonu kappeema kʼurami;
piyyattekka xargho isexna tookkopa kaaretekka xargho isexna tookko na shaʼoy,
qashko kʼartaxa kaasakka shaʼoy.
8 Erkampatte lankakka ikkaaththakossi yoqhtina,
olho toʼon ho ghupo dhamma ligha hathettay shaʼapa karo pasito kʼuramuy;
pasito xargho isexna tookko karo kʼeqhtatte oohamuy;
9 uumathassi qagho sheegha pasito kittatte qaakana xargho isexna tookko iffarri,
markapadhdhe pasito qaghana xargho isexna tookko ighghoghondhame.
10 Erkampatte isxakka ikkaththakkossi yoqhtina,
xuskitte dhammay the qhamo soopito sipinay kolladhdheete xargho isexna tookkomapa qandhe qeelleetesa monthonu puqqi;
11 xuskittisanna makaxko hiisi Raqno ana payi.
Qandhisanakka xargho isexna tookko ho raqa kodhdhu,
qandhissa qhooti he raqa kodhdhe maallay koro kisha farroy.
12 Erkampatte salxakka ikkaaththakkossi yoqhtina,
hammakko oqhqhayattepa ho leeqitopa ho xuskeete qhamu ye hxusnennu xargho isexna tookko thukkanu.
Qhamussa kula kuyyaqtattekka xargho isexna tookko,
awnattekka xargho isexna tookko ye hxuusuy.
13 Xaysa tupettay kawwarisso ho moonthoʼitha haqqa hiʼa,
iʼikkitto dhammattay hasa payana apaqha:
“Erkampattessi isex haqhe qhooti kaaththane yoqhne maalaay koro kappatte qaghanu Akko woyo!
Akko woyo!
Akko woyo!”