Farawame Qhawho 144,000na
7
Xaysa tupettay erkampatte salax he karo salaxttay shikkarakki an hiʼi,
usundhissa piyyattekka ikkodhdha pasitokka taakki kaaretekka urure qhamu ye ururintinnu ururessi xaytussa salaxna koru lighaasi kohxhxonki.
2 Erkampatte pile the maathama Haallikko qaghampakito ghapatti karo oqhaye lighanna koru okaayasikki an hiʼi,
erkampattisakka erkampatadhessi salax piyyepa pasooma anu ghulno teexina ikkito dhammatta hasi na payi:
3 “Miinte kodhampawhe Haallikko haanisa haaka farakko farawnaani saasa kappesikka ikkodhdha pasoosikka taakki kaareesi inta kotaʼonkuy.”
4 Kaffessi Israʼeelatte 12 na kittatte hessi farawamenna dhihakko huusundhi qhamu 144,000 kodhdhisa apaqha.
5 Kafko Yihutanna he farawame qhawho 12,000.
Kafko Roopelenna he farawame qhawho 12,000.
Kafko Kaatenna he farawame qhawho 12,000.
6 Kafko Aseerenna he farawame qhawho 12,000.
Kafko Nifthalemenna he farawame qhawho 12,000.
Kafko Minaasenna he farawame qhawho 12,000.
7 Kafko Simoonenna he farawame qhawho 12,000.
Kafko Lewinna he farawame qhawho 12,000.
Kafko Yisakoorenna he farawame qhawho 12,000.
8 Kafko Zaapiloonenna he farawame qhawho 12,000.
Kafko Yoosefenna he farawame qhawho 12,000.
Kafko Piniyaamenakka he farawame qhawho 12,000.
Warshidhdhe Uuma Kisha He Laalladhdhe Piqooma Urkuye
9 Xaysa tupettay waarsho uuma kisha ho olo dhihe alkasni waarshidheetepa kaffeetepa sanynyadhdheetepa koro pakke qawni qawni qalladhanakki qakkattessi kaanastattepa Orpossinna miinatte shikarapa hiʼa.
Usundhissa lalladhdhe piqoomakki urkuyeppa aahxe maytʼateesi xarghettay ghapadhonki.
10 Ikkitto dhammattay hasa payonkippa riironki:
“Dhinise the Haallikkossi haani
qakkatte kanastattesa qakadhinapa the Orpossinna.”
11 Erkampatadhdhessi kaasay qakkattessi kanastattepa xaadhighghessippa uumathassi qagho sheegha salaxsikki qhorreppa shikkaronki,
qakkattissa kanastatte miinteema ranonkkippa Haallikkonu sakatonki,
12 hasakka payonki:
“Ameen,
sakepa kaanasunte,
arnaanepa kalatha,
kaanastepa humna pana dhikitno
perre ye hume sheeghennu haaka perre ye hume sheeghe saasa Ihhaallikko haaninu kodhdhe!
Ameen.”
13 Nakala xaadhighesinna kittatte tookko hasi yela payi:
“Hisi laalladhdhe piqooma urkuye koro yaxay?
Xankannukki okaye?”
14 Anokka anna payi;
“Pogholho haayyu,
atho ara.”
Usokka iyyela payi:
“Hisi kulay he rakkossi dhikitana lighgheppa okayonki,
lalladhdhe huusundhiisi kʼeqhte Orpossinnattakki shoxadheppa piqasadhonki.
15 Hussa maallay,
qakkattessi Haallikkito kaanastatte miinta ikkodhdhineppa
awnepa kuyyaqte mannessi kʼulkʼullawenna isinnu kodhadha.
Hossi qakatte kanastattesa qakkadhikka taymadhe thuusuttakki usundhe pankanni.
16 Xaysannu koro ye pufine,
ye dheponnekka,
oqhqhaye yena hxafinti,
thorno hiisikka ye dhillini,
17 moʼo maalla payni Orpossi qakkatte kaanastattena
qagha koshshitto huusundhi kodhdhini,
karo qeelhossi qandhe qaghito kulakki nu inthawni,
Haallikko illmaame huusudhi kaasasi ehxehxeti na ooshni.”