Qhaashame Maathamadhdhessi Taxanna
6
Orpossikka immaathamadhdhessi thaxanna kittatte tokoosi qhaashanakki an hiʼi,
xaysa haatupettay uumathassi salax qagho sheeghana tookko iʼikkitto ghawwaqkito kulattay “Okay” payanakki an apaqhi.
2 Anokka an eemmadhdhina oollo piqa ho shikkarasikki an hiʼi,
ho oollusana saappeete qakkadhakka kooʼitte ighghapadhi,
shillimathe kaammasikka anu teexu,
usokka tanapko kulakki kamenu lighi.
3 Orpossi immaathama lankaasi qhaashiina,
uumathassi salax qagho sheeghana ho lankay:
“Okay” payanakki an apaqhi.
4 Oollo pile ho porhxakko kula idhdha illighina hiʼa,
hossi oollussa sappa qakadhanukka qhamu piyyatte nakayho patisnipa korokka ille poghghonukki anu payipa koorate dhammakka anu teexu.
5 Orpossi immaathama isxa qhaashina,
uumathassi salax qagho sheeghana ho isxay:
“Iʼokay” payanakki an apaqhi.
Anokka an eemmadhina ho oollo kumma shikkarasikki an hiʼi,
ho oollusana sappeete qakkadhakka bhatʼolle ixargheete sheeghi.
6 Xaysay tupettay uumathissa salax qagho sheeghana kittatte,
ikkitto ho iyya:
“Kaspo apoore tootte hxaayye kuyyaqko tookonu,
poortho apoorea izexka hxaayye kuyyaqko tookitonu kodhdhe,
karkossi ana sayte kodhdhipa ho woynatteesi kapay olo kottaʼi” ki an apahi.
7 Orpossi immaathama salxaasi qhaashina,
uumathassi qagho sheegha salxay:
“Iʼokay” payanakki an apaqhi.
8 Anokka an eemmadhdhina oollo qawlakko ho shikkaarasikki an hiʼi;
ho oollussana saappeete qakkadhana makaxko huusu Farte ana payi;
Siʼoolekka nakali ashshiti.
Usundhissakka koro piyye qhaatʼete qaakana xargho salaxna tookoosi qhamu kooratepa laaqepa haqo pana aaghe qarakkitottay poghghinennukki anu ghulo teexi.
9 Immaathama hxupnay qhaashina koro qhoota kʼale Haallikkitopa qhoota misikirinkossi tiqthadhe maallay apoghghina napsadhdhe huusundhisikki an xayto ana teexakko itʼtʼosina kaalla hiʼi.
10 Usundhissakka ikkitto dhammattakki hasa payeppa isi riira:
“Hossi Olho Kaasay Rafisa Haallikko Kʼulkʼullitopa Dhukampakko,
haaka parasasakki athu qhaqhitte qhaqhinti?
Haaka para saasa haalote kʼeqhte thaninaasi koro piyyatte qaakana athu akkinti?”
11 Xaysay tupettay usundhe kaasannu laalladhdhe piqoomakki anu qhooti,
karo miinatte koro huusundhi iʼille qale kodhadhe aqhamo huusundhi paaxni illay dhihakko huusundhi haaki hoqhqhini saasa xeere qhacʼasa qhamu hxaysanennukki anu qalli.
12 Immathama thappoosi qhaashinakki an hiʼi,
titito dhikitakka kodhdhamadhu;
oqhqhayekka qhamo laalle uuma kummay kula kumi.
Leeqokka qhamo kʼeqhtatte kula iidhu.
13 Qhamossi karkko pelasatteesi uruure dhikitay illeehisti payni qarkunko na hayyi kula,
xuske monthitokka piyyeemi hayye.
14 Monthokka qhamo matʼafassi aʼilla mari kulakki maramipa lighghu,
ghuppepa kappadhdhe qandhettay qhorrame xaytu qaghe kaasanna ippate.
15 Xaysa tupettay nukusadhdhe piyyatepa rafisampawhepa inthawmpawhe qhipamahattepa shorokkepa he dhikitoomapa ayyladhdhepa heye ayyladhdhe kodhdhonki kaasay pokkepa awrughe kaanuma ghuppeete qagha kalemi bhadhdhame,
16 ghuppepa awrughessi kaanomana hasa payonki:
“Ine saappa dhoqqindha!
Hossi qakate kaanastattesa qakkadhina minattepa miira Orpossinna ine bhadhankuy,
17 moʼo maalla payni kuyyaqkossi huusundhi miira dhamma iʼokayi;
lammi yaxa na miinta shikaare alkasana?”