Orpopa Matʼaafassi Aʼilla Mari
5
Hossi qakatte kaanastattesa qakkadhina xargho miskittito matʼaafa aʼilla mari kittepa seettottay ana tooxipa qhamu olo qhaashninnu ana maathama taxan shoqhiisikki anna hiʼi.a
2 Erkampatte dhikitay the ikkitto dhammattay hasa payappa isi saluyakki an hiʼi:
“Ho mathamadhissasi qhaashepa matʼaafisaasi pule uso gheeqasti yaxa?”
3 Naqharray moonthitokka ikkodhdha piyyattepa piyyatte kaalla ho matʼaafisaasi pullapa eeme alkasu yaxakka ye qaghi.
4 Anokka qhawho matʼaafisaasi pullapa eeme alkasu qhooti ye tayamu maallay uuma an ooyi.
5 Xaysa tupettay xaadhighghesinna tookko iyyela payi:
“Olo ooyima haadhi karmossi kafko Yihudhanna hossi Xissitteb Dhaawithenna kodhdhi ipputi.
Hussa maallay Uso matʼaafisaasi pulepa maathamissa taxaniisi qhaashe iʼalkasna.”
6 Nakalakka Orpo paathanko paarakatte ligha naqaghi ho qakkattessi kaanastattepa uumathassi qagho sheegha salaxpa ho xaadhighesinna kittatte shikaraasikki an hiʼi.
Orpusakka kathakko thaxanpa ehxte thaxanki sheeghi;
usundhissakka Nassidhessi Haallikkito thaxxan akaro piyye qhaatʼe kula eraki.
7 Usokka iʼokayipa hossi qakkatte kaanastattesa qakkadhina xargho miskittito matʼaafasiisi akku.
8 Xinkessi matʼaafissaasi akkina uumathassi qagho sheegha salaxpa xaadhighghessi 24 Orpossi miinteemi raneppa nu sakatonki;
usundhe kaasay sonqhopa itʼaanassi ghissoote kʼulkʼullawhatte kodhdhi maahxatho awarkʼatte kodhdhi kitta hoqhqhi ghapadhe.
9 Hasakka payonkippa qhallitakko qhawthitto qhalladhonki:
“Matʼafisaasi akkepa
maathamadhdheesikka qhaashe ihho gheeqasay,
moʼo maallay payni ahopoghi,
kʼeeqhte Thaahuttay kaffetepa koro pakke qawni qawni qalladha kaasanna,
sanynyadhdhe kaasannapa waarshidhdhe kaasanna murra kodhdhappa koroosi Haallikkonu holasay.
10 Haallikko haaninukka koro ahxase thuusunapa kʼeesadhdhe usundhe kodhay,
usundhisakka piyyeemi poghlumne.”
11 Xaysa tupettay ikkitto erkampattadhdhe kishanakki an apaqhi,
usundhisakka kumadhdheete ghutay he olo dhihe alkasni;
holuppa he qakkattessi kaanastattepa uumathassi qagho sheegha pana xaadhighesi qhorre hiʼa.
12 Ikkitto dhammattakka hasa payonkippa qhaaladhonki,
“Orpossi apogghi humnapa shorokunko,
arnaanepa dhikitno,
kaanastepa peepamepa kalathasikka,
akkadhe Uso gheeqasa.”
13 Xaysa tupettay uumatha monthitopa ho piyyattepa ho piyyatte kallapa ho pasito kittatte qagha kaasay hasi payipa isi qhalladhanakki an apaqhi:
“Hossi qakatte kaanastatte saappa qakkadhipa Orpusanu,
kalathapa kaanastepa peepamepa humna,
perre ye hume sheeghennu haaka perre ye hume sheeghe saasa innu kodhdhe.”
14 Uumathassi salax qagho sheeghakka “Amen” ki paye,
xaadhighghissakka haaki miintettay piyyatte hxafne saasa kahheppa nu sakatonki.