Manne Kristaana Kathama Efesoonenna Qaghanu
2
“Erkampattessia manne kristaanna kathama Efesoonenna qaghannu hasa paypa tooxoy:
hossi xuskitte taxxan xargho miskittottay ghapadhi,
hossi maahxaththo taxxan awarkʼette kodhdhi ana hammakko xawwadhina kitte iʼitha lallaghama hasi iyyi:
2 Kodhmo haahupa kokkisadhepa dhuupaythe thaahusi an ara.
Maghampawheesi qhamu athu kʼampayettay na lighghuppa he erkampawhe ye kodhdhonkinna ine erkampawhe payasi qhoththosadhappa aayyampawhe qhamu kodhdhe upadhassa an ara.
3 Holuppa dhupaythettay dhikitepa qhoota makaxko haayyu maallay rakko akkadhe thaahusi an ara,
hussa kaasattay athu kippo qhaqhuy.
4 Ikkodhdhitama kapay olho an hola shikki qagha,
hussaka cʼikno qharroosi ahxhxurti.
5 Lammi qhama xankanna qaghtisa he thaay,
Haallikko kula holuppa olhossi aqhqharro kottiisi kodhay,
Haallikko kulakki athu holu payni,
an okaynapa maahxhxathossi awarkʼatte kodhdhi ana hammakko xawwadhiisi hola akka.
6 Naqharray kodhmo xeesa an hottay peepi qagha,
hussakka kodhmossi Nikʼolawatteb Ano shikkiisi athokka ashshikkiti.
7 “Olho Nasso Kʼulkʼullo mannadhdhe kristaanannu qalliisi qhawho qhaame sheegha iʼapaqha,
ho putinu karkossi qaghito kenneete Haallikkitona kittatte qaghana qhamu yiinikki an konni.
Manne Kristaana Kathama Semerneesenna Qaghanu
8 “Erkampattessi manne kristaana kathama Semerneesenna qaghanu hasa paypa tooxoy:
Hossi Payyotepa Dhikkatte kodhdhi,
hossi faripa hantu kapay isi qagha hasi iyyi.
9 “Rakkopa teekunte thaahusi an ara,
ikkodhitama kapay atho shorokitto,
he Ayhudhadhdhe ye kodhdhonkinna ine Ayhudhadhdhe payapa isi hola makaxko patisaasi an ara,
usundhe waarsho Seetʼanay.
10 Rakko hooma hxafnaasi olo ghaapi,
Seetʼana hune themmenu tooke tookkesi manne shappeetesi yakni,
kuyyaqko 10 qootʼo hiʼankuy.
Haaka farte saasa ho dhukkaysathamti kodhdhi,
Anokka shillimaathessi qaghito ye patintikki Anho teexniye.
11 “Olho Nasso Kʼulkʼullo mannadhdhe kristaanannu qalliisi qhawho qhaame sheegha iʼapaqha,
ho putiisi fartte lankayc ye uso kohxinti.
Manne Kristaana Kathama Perkamoonenna Qaghanu
12 “Erkampattessi manne kristaana kathama Perkaamonenna qaghanu hasa paypa tooxoy:
hossi koorate karo lakkittay foolay sheegha hasi iyyi:
13 Kathamassi Seetʼana na poghlumina qhama qaaktisa an ara,
ikkodhdhitama kapay makaxko haayusi akkokistipa ghapadhay.
Perre qhawhossi dhukkaysathama qhoota hayyu masakkara Antʼipaaseesi kathamassa haahundhi Seetʼana na poghlumisa apoghinakakki dhukkaysadhe ayyela sheeghtiisi athu marmadhuy.
14 Ikkodhdhitama kapay olho tookko an hola shikki qagha,
hussakka koro tookko tookko ho kollinkossi waarsho Israʼeelatte qhamu yiʼo akillankonu itʼtʼoosisi yiinipa woʼo paalakunkitottay ghapamunnu Paalame Paalakʼed kollisittay ashsha hola kaanta qagha.
15 Holuppa koro kollinko Nikʼolawattettay ashsha hola kaanta qagha.
16 Hussa maallay cʼuppito karo Haallikkito hol!
Apayni hasakki athu kodhu payni,
waadhetakki an homa okayni,
kooratessi pako haayyuna lighattay usundhe orxama.
17 “Olho Nasso Kʼulkʼullo mannadhdhe kristaanannu qalliisi qhawho qhaame sheegha iʼapaqha,
ho putinu mennassi abhadhdhinakki annu teexni,
holuppa awrukko piqa ho ana makaxkko qhawthitto tooxi qhawhussa akkanna malettay yaxakka ye arisikki annu teexni.
Manne Kristaana Kathama Tiyatʼirosenna Qaghanu
18 “Erkampattessi manne kristaana kathama Tiyatʼiroosenna qaghanu hasa paypa tooxoy.
“Miʼayessi Haallikkito ehxhxe huusu qhamo halapko haththatte kula na ligheppa luhhe huusukka qhamo sipilhossi naasatte porhxhxottay uuma iidhi kula na lighe hasi iyyi,
19 Qaako haahu dhukatte,
hussakka cʼikno haahupa dhukkaysadhe thaahupa kodhmo haahupa dhuupaythettay kookkisadhe thaahuusi an ara,
holuppa kodhmo haahu aqhqharro kottina kaanta ho ahhantu kotti qhamu ghulisa an ara.
20 Ikkodhitama kapay olho an hola shikki qagha,
xiskattossi iyyay ano hxuumampatte Elsapeleesi athu qheeruy;
ise the kodhampawhe haayyu qhamu palakunko na qadhamnipa yiʼossi akillankonu itʼtʼoosisi yiʼonkinnu kollinko hiisittay dhappisay.
21 Xeere inna palakunko hiisina kaalla Haallikko kula holti annu teexi,
naqharray ise hole ye woʼukka.
22 Hussa maallay udhanko maghattakki an qafteema ise haqhasni;
hessi ise qale paalakumakka onkissa thiisina kallakki ye holonkki payni qootʼo dhikita anna okaasni.
23 Miʼaadhe hiisisikka an paaxna.
Xaysa tupettay mannadhdhe kristaana kaassay Ano qhama ho saqkopa dhihattoote korito qhoththosadha kodhdhisa iʼarra.
Hune kaasannukka qhamo kodhmo haahundhi kulakki an hune hxaaye teexni.
24 “Hune he haaha kathama Tiyatʼiroosenna qaghapa kollinko hiisittay huni ashshonku,
holuppa olhossi:
“Bhadhdhamte Seetʼana dhikitay” ana payiisi huni akkadhonkunna hasa an hunena payi;
dhooqhqho pile anu huna dhooqhasni,
25 ikkodhdhitama kapay haka an okayni saasa kollinkossi xeesa ashsheghtettay kookkisadha.
26 Qhawho putipa kodhmo Haayyusikka haaka dhikkatte saasa isi hxafasanu waarshidhdheema annu ghulno teexni,
27 thoollakko sipilhitottakki rafisni,
maahxaththo acʼoqhqhollito kodhdhi kulakki usundhe yooqhni,
hussakka qhamo ghulnossi Ano Appa haayyuna kaanta akkadhi kula,
28 Anokka xuskitte Pakkalhossi xayto qhayana hxusay annu texni.
29 “Olho Nasso Kʼulkʼullo mannaadhdhe kristaanannu qalliisi qhawho qhaame sheegha kaasay iʼapaqha.