Eemko Yohannise
1
Eemku olhossi xeere itʼtʼana kodhdhamadhe gheeqasti Iyyesus Kristoose qhamu kodhampawhe huusunu hiʼasninu Haallikko Usoosi teexi.
Iyyesus Kristoosekka erkampatte thususikki erakipa kodhampakko huusu Yohanisenu hiʼaasu.
2 Yohaanisekka qhoota kʼaale Haallikkitopa dhukessi Iyyesus Kristoose kollisi pana olhu hiʼi kaasasikki masakari.
3 Xeere oli kaasay na kodhdhamanni iʼitʼtʼuye;
lammi ho kʼaali hxuumasi koro pilenu nappapapa he apaqhasapa isi kodhmito nakeesakka hehe poghadhe!
Xasathopa Kaanaste
4 Ho erkuusi hune tooxi ano Yohannise;
hune hessi manne kristaanay taxxan piyye Iisiyanna qaghanu,
hossi kedhdhannu qaghapa hantukka isi qagha,
holuppa isi okaynapaa nasso taxxan qakkattessi thuusu kaanastattena miinatte qagha,
5 holuppa Iyyesus Kristoosessi misikiritto dhukkaysathamapa he farrenna kittattekka haqettay qhariththo kodhdhi nukusadhdhe piyyattesakka Rafisampakko kodhdhunna teexakko Haallikkitopa nakayho ihhune kodhdha.
Hossi ine cʼikadhipa cʼuppo haanina kʼeeqhte thuusuttay ine alhessu,
6 qhama Haallikko Pappo Huusunu kodhananinnu koro ahxase thuusunapa kʼeesadhdhe ine kodhunnu perre ye hume sheeghe saasa kanastepa humna innu kodhdhe!
Amen.
7 Korunka,
Iyyesuse urrathettakki okayni,
hessi Uso dhoththe kakki ye haqhonkinna koro kaasay Iʼuso hiina,
waarsho piyyatte qaghakkab Usona paayyatti iʼoyna.
Ee!
oli dhukepa ho kodhdhamanna,c
Amen.
8 Hossi kedhdhannu qaghapa hantukka isi qaghapa holuppa isi okayna,
Haallikkossi Olho Kaasa Alkasa iʼiyyana “Payyotepa Dhikkatted Ano.”e
Kristoose Yohannisenu Armadhi
9 Ano hossi hune qale rakkopa ahxasepa dhuupaythe Iyyesuse qhoottadhdha qhawho haahundhi Yohannise,
qhoota kʼaale Haallikkitopa misikirinko Iyyesuse maallay piyyessi pasottay qhooramiti Fetʼimo ana payisa an shapami,
10 kuyyaqko Pogholhitonaf Nasso Haallikkitottakki an kodhdhipa konnaththo haayyuna koray ikkitto uuma qhasqhadha ikkitto kaathakkito kula ligha ihhasa yela payana apaqha:
11 “Matʼaafi ahhiitisi tooxapa manne kristaanay thaxxan piyye Iisiyanna qagha,
manne Efesooneppa he Semerneeseppa he Perkaamooneppa he Tiyatʼirooseppa he Serteeseppa he Filtifiya pana Lodhokʼiya kula erakay.”
12 Anokka hussi yaqalladhaasi hiʼenukki an konna konnay laaghghammina,
maahxaththo taxxan awarkʼette akodhdhi ana hammakko xawwadhi an hiʼi,
13 maahxhxisana kittatte ho Miʼaye qhawhito ligha an hiʼig Uso laalle kala luhheete nahxafakki urkuyi,
eero ithakka shapante warkʼateesikki shapadhi.
14 Kaso pukkaqte thuusuna qhamo palthitopa qhamo aspitatti piqi;
ehxhxe huusukka halapko haththatti lighe.
15 Luhhe huusukka qhamo sipilho naasatte porhxottay uuma iidhi lighe,
ikkito huusukka qhamo kolle dhamma ela kula.
16 Xarghgho miskittottay xuskitte taxxanki ghapadhi,
pako huusunakka koorate karo lakkittay foolakki na ligha,
miinte thuusukka qhamo oqhqhaye oypakito uuma hxusa kula.
17 An Uso hiʼina qhamo qhawho fari kulakki an luhhe huusu kala rani.
Usokka xarghgho miskittoosikki ye saappa ghapadhipa hasa yela payu:
“Olo ghaapi!
Paayyotepa Dhikkatte Anoye,
18 Ano qaghampakko,
An fari ahxay haadhi kapay hantu perre ye hume sheeghennu haaka perre ye hume seeghe saasa Ano qaghampakko;
qhaashampakko fartattepa ho Siʼoolatte xarghghe haayyuna.
19 Olissa hiitipa ho hantu qagha pana ho karo miinatte kodhdhamannasi tooxa.
20 Xuskittessi taxxanpa maahxaththossi taxxan awarkʼatte kodhdhipa isana hammakko xawwadha xarghgho miskitto haayuna qaghapa hiiʼanna bhadhdhamtte thuusundhi thisi:
xuskitte taxan erkampatte manne kristaanay taxxanna,
maahxaththussa taxxan awwarkʼatte kodhdhi ana hammakko xawwadhi mannessi kristaanay taxxaaniisikki hiʼaasi.