Manne Kristaana Kathama Serteesenna Qaghanu
3
“Erkampattessi manne kristaana kathama Serteesenna qaghanu hasa paypa tooxoy,
hossi Nassidhdhe Haallikkito taxxanpa xuskitte taxxaniisi xarghottay ghapadhi hasi iyyi,
kodhmo haahusi an ara,
makaxkonu aththo ho qagha,
naqharray affarti.
2 “Hussa maallay thayri!
Olho haahu farteema itʼtʼusikka dhikitis,
kodhmo haahu Haallikko haayyuna miinatte ye pareema gharuye.
3 Lammi olhossi aʼapaqhtipa akkadhaasi hela thaay!
Eeʼekka nu payay;
cʼuppito Haallikko kula hol.
Athu thayru payni kapay qhamo kereqkito an hooma okayni,
para qhama hooma okayni athu arinti.
4 Naqharray he saqqe huusundhiisi qhamo lallatte ye kumasonki koro takkaya kathama Serteesenna ho qale qagha.
Usundhissa lalladhdhe piqomakki urkuyneppa ye qale ashshonki;
hussa olho usundhe gheeqasa.
5 Qhawho putikka qhamo huusundhi laalle piqa iʼurkuyni,
Anokka Paappo haayyupa erkampatadhdhe huusu miinte annu masakkarri,
makaxko huususikka matʼafassi qaghitona anu patisni.
6 “Olho Nasso Kʼulkʼullo mannadhdhe kristaanannu qalliisi qhawho qhaame sheegha iʼapaqha.
Manne Kristaana Kathama Filtifiyanna Qaghanu
7 “Erkampattessi manne kristaana kathama Filtifiyanna qaghanu hasa paypa tooxoy,
hossi kʼulkʼullittopa dhukampakko kodhdhi,
hossi qhaashampakko Taawiteesikka xarghottay ghapadhi,
hossi Uso qhaashisi yaxakka kʼupe ye alkasi,
hossi Uso kʼupiisikka yaxakka qhaashe ye alkasi hasi iyyim.
8 “Kodhmo haahusi an ara.
Hussa mallay mankaxxe he qhaashame he yaxakka ye hola miinatte kʼupe alkasinikki an ho gharisi.
Humna haahu qhamu ho qhacʼa kodhdhisa an ara,
ikkodhitama kapay kʼaale thaayyusi atiqthatti,
makaxkko haayyusikka athu marmadhuy.
9 Hessi Ayhudhadhdhe ye kodhdhonkinna ine Ayhudhadhdhe payapa isi aayya qalladha,
hessi waarsho Seetʼananna kodhdhe qhamu okayneppa luhhe haahu kala sakatonkippa qhamo Ano ho cʼikadhisa aronkinukki an konni.
10 Hayossi dhuupaythettay qhama kokkisadhintinu Anho teexisi qhoota tiqthatti maallay,
Anokka themmattessi koro kappatte qaaka kaasasi theemmenu qhaatʼetema okaynanna Anho tiqanna.
11 Awwannapa okayaye shillimathessi thaahu ye patintiisi yaxakka qhamu ye hola akkininnu kokkispa ghapadhay.
12 Ho putiisi manne kʼulkʼullawhessi Haallikko haayyuna kitteema dhiptakko An uso konni,
moʼokka payni ye lighni.
Makaxkko Haallikko haayyunapa ho kathama Haallikko haayyuna hussakka makaxko Iyerusaalame qhawthittessi moonthikki Haallikko haayyuna kanta okaynanappa makaxko Haayyu qhawthito an usooma tooxni.
13 “Olho Nasso Kʼulkʼullo mannadhdhe kristaanannu qalliisi qhawho qhaame sheegha iʼapaqha.
Manne Kristaana Kathama Lodhokʼiyanna Qaghanu
14 “Erkampattessi manne kristaana kathama Lodhokʼiyanna qaghanu hasa paypa tooxoy,
hossi Amenpaa dhukampakkopa misikkiritto dhukatte kodhdhipa hossi uumatha Haallikkitonakka paayyote kodhdhi hasi iyyi:
15 Ho thora taakki ho shalala qhamu athu kodhdhussa kodhmo haahuttay an ho ara,
ho thora taakki ho shalala akkodhiti payni ahxay anho cʼikanna.
16 Lammi ho ufnuqhqha dhiisho ho thora taakki ho shalala qhoota athu kodhdhu maallay anho thufna.
17 Atho kapay aʼiyyanna ano shorokitto,
ho kodhaththe dhamma sheegha olho thoʼokokakki yeye gheeqasi,
naqhqharray atho pirte,
xiyyatakko,
taafakkopa tʼurkumpaqqe qhama kodhdhitisa athu arti.
18 Hussa maallay shorokitto kodhdhenu qhama yela warkʼe ahatheema dhilipa lighi pithmadhintipa palanko pishko haahunakka qhamu ye ximpanninnu laalle piqay urkuyappa ehxhxe haahunukka kʼorishsha piththmadhappa xayto hiʼonkkinnu anho dhihama.
19 Ano he an cʼikadhi kaasasi an qheera,
an kʼatʼtʼakka,
hussa maallay kokkisadh!
Cʼuppito kallakka ye kula holay!
20 Lammi Ano ghinteema an shikkaripa ooqama yaxakakki ikkito haayyu apaqhnapa ye mankaxxe qhashu payni,
uso kulakki an xullinipa ille qale yiʼo yiʼooni.
21 Qhamo Ano putipa Pappo haayyu qale qakatte kaanastattesa naqale qakadha kula,
qhawho putikka qhamu qakatte kaanastattesa ye qale qakkanni an konni.
22 “Olho Nasso Kʼulkʼullo mannadhdhe kristaanannu qalliisi qhawho qhaame sheegha iʼapaqha.”