5
Koro haayyu,
xeerepa perre olisa na kodhdhamanniisi hune tooxe ye gheeqasti,
2 moonu payni kuyyaqko Pogholhito qhamo kereqko awne okayi kula okaye thuusukka qhamu hasa kodhintisa aʼarankuy.
3 Koro:
“Olho kaasay nakayyhopa rakko ye qaghi” ippayana qhamo xiskatho sheeghasi qhuqhaythe ghapti kula patitte tutuppe na okayti,
moʼo kakki kodhini payyni yena pehne!
4 Naqharray koro haayyu,
hune he thukkankito kittatte qandhikka,
hussa mallay kuyyaqkusa qhamo kereqkito yehuna okayni.
5 Hune kaasay dhelle hammakitopa he kuyyaqate,
ine he awunatte taakki he thukkankito qandhikka.
6 Lammi thayrinipa he tiqthanni dhiishay qhamo korossi piʼaadha kula inna kodhdhooni.
7 Koro piʼaadhakka awne ippiʼaadhi,
he hxayyoodhakka awne ihxhxayyoodhe.
8 Naqharray ine qhoota koro hamakito kodhdhini maallay dhukkaysadhepa cʼiknoosi qhamo mahxattosi orxankito aʼeerooʼitha shapadhi kula shapanni,
kippo dhinkitoosikka qhamo okolossi apukkaqateema qadhdhadhi kula qadhdhanipa he tiqadhettay qaakni.
9 Haallikko Pogholho haani Iyyesus Kristoosettay qhama dhinko tayanaaninnu dhiishoy miiranu ye ine ooqu.
10 Kristoose olhu na maallay qhoota haani fari an qaghotay qaghnikka taakki an farinekka payni qhama Uso qale qaakananinnu.
11 Hussa maallay qhamo ahantu kotte kula ille dhiktisettay qhawho tokko ittookoosi gharisa.
Dhihamtepa Xasaththo Dhikkattatte
12 Koro haayyu,
hunena kittatte he kokisadhettay kodhmo kodhapa he makaxkko Pogholho Iyyesusettay inthawampawhe haahundhi kodhdheppa isi hune dhihamaasi qhama kaanastennu an hune waathadhani.
13 Qhoota kodhmo huusudhi maallakka cʼiknottay uuma usundhe kaanasa.
Nakayhottay ille qale qaakonkuy.
14 Koro haayyu,
olho hasa lighaasikki an hune dhihamni he ye kodhadheesi qheera,
he ghaapasi shahxumisa,
he malalaasi kʼarkʼara korussa kaasannu dhuupadha.
15 Yaxakka maghno kapa qhamu ye maghno holasninnu ihhe tiqthadhi,
laadhdhi hunekka pukkaqatte pukkaqate ikkodhdha koro pilenukka kuyyaqko kaasay olho xeesa kodhenu kokkisadha.
16 Kuyyaqko kaasay hxasodhindha!
17 Ghisoote olo hxure!
18 Olho kaasattay kalataysadha!
Haadhi olho Haallikko hune he Kristoos Iyyesuse dhukkaysadhana woʼi husiyye.
19 Kodhmo Nasso Kʼulkʼullitoosi olo patise!
20 Hxuumaasi olo dhafe,
21 naqharray olho kaasasi eemindha,
ho xeesasi na akkadha,
22 ho magha kaasasi iishindha!
23 Haallikko nakayhito Uso ihhune kʼulkʼulessa;
nasso haahundhipa napse thaahundhipa pishko haahundhi kaasay kuyyaqko Pogholho haani Iyyesus Kristoose okayni saasa qhamu meethe male kodhdhininu ippareema tiqthame.
24 Ho hune ooqi ho dhukaysathami maallay husiisi ikkonna.
25 Koro haayyu,
qhoota haani maallay ghisadha!
26 Koro haayyu kaasannu mayyitakko kʼulkʼulawittay nu xasa.
27 Taptappi an tooxi koro haayyu kaasannu qhama napapninu makaxko Pogholhottay atara an hunena payi.
28 Texakko Pogholho hani Iyyesus Kristoose ihhune kaasay qale kodhdha.