Qandhesi Patitatte
7
Haallikko Noohena hasinna payi:
“Dhalata perrina qaghana kittatte ho pare qagha hoosi patta qhoota tayi maallay ahxke haahu manneete kaasa illay markape kitteema xulli.
2 “Aaghe teexakkonu ghara kaasanna kittatte tʼirakkopa xiskaththo taxxan taxxan he ye teexakkonu gharenna kittatteka tʼirakko tookopa xiskaththo tootte,a
3 iko aaghe hoolottay haqa kaasana kittattekka tʼiirakkopa xiskaththo taxxan taxxan sanynye qhamuna pehintinu he kula xullees.
4 Moʼo maalla payni kuyyaqako taxxan tupettay kuyyaqako 40 pa awne 40 ki an irrawwo dhipasni.
Uumata qagho sheegha an uumi kaasay piyyatte an patisna.”
5 Noohekka hayossi Haallikko nu hayi kaasasi ikkodhi.
6 Xinkessi qandhe patitatte okayenna Noohe perko 600 hxafasi.
7 Noohepa dhelle huusu tʼiirattepa xiskaththo tuusu pana xiske dhelle huusuna qandhesi patitattena pinnenu markape kitteemi xulle.
8 Aaghe teexakonu gharapa heye ghareppa aaghe hoolottay haqapa uumata eerottay piyaʼita kuqama kaasay,
9 lakki lakki,
tʼiirakkopa xiskaththo ikkodhdheppa qhamosi Waako Noohesi hayi kula markapeema yakamonki.
10 Kuyyaqako taxxan tupettay qandhesi patitatte piyyeemi okaye.
11 Xinkesi Noohe perko 600 pa leeqo lakkipa kuyyaqako 17 hxafasina qeellesi kaanooma piyyatte kalla qagha kaasay irretetakki lighe,
qandhesi moontito qaghanakka bhaaqhqhadhe qhaashamonki.
12 Irrawwokka kuyyaqako 40pa awne 40 dhipu.
13 Kuyaqakussana Noohe dhelle huusu tʼiiratte Seemepa Kaame pana Yafeete;
holuppa xiskaththo tuusupa xiske dhelle huusu izexna markapeemi xulle.
14 Aaghee qarakito iko kaasannapa he koro qale qaakanakka iko kaasannapa uumata erottay kuqamapa aaghe holottay haqanaka iko kaasakki naqale markapeema xulli.
15 Uumata nasso qaghito sheegha kaasay lakki lakki kodhdhipa onke hasa lighattay Noohe qale markapeema xullu.
16 Uumata qagho sheegha kaasay tʼiirakkopa xiskaththo ikkodhdhipa qhamossi Haallikko Noohe hayi kula markapeema xullonki,
Haallikkokka mankaxxe markapateesi ghinte kalu na kʼuppu.
17 Qandhessi patitatte kuyyaqako 40 irrrawo ye salu malekki dhipi;
qandhesi innaqepa isi hoqhqhana markapesiisi sappe kalipma haqise.
18 Qandhessi uumi padhawamappa isi hoqhqhana markapessi qandhe sapaʼiti ashshe payiti.
19 Qandhesikka qhooti uuma hoqhqhe maallay ghuppesi kaanooma kaasakki loqhe.
20 Qandhe ghuppesi kaanoomaasi illoqheppa nasappe qila tʼihiile 15 kula ghaqiti sarponki.
21 Aaghe piyyatte qagha uumata qagho sheegha kaasay,
aaghe moontitopa qholepa aaghe qarakitopa aaghe piyyaʼita eerottay kuqama pana koro kaasakki pati.
22 Uumata nasso qaghitoosi sindhettay nassadhapa isi piyye haxawtina qaaka kaasay iffarri.
23 Uumata qagho sheegha kaasay piyyatte ippati:
koropa qholepa aaghe eerottay kuqamapa aaghe hoolottay haqa kaasay piyyatte ippate.
Hessi Noohe qale markapatte kittate qagha patta pinnonghi.
24 Qandhisakka piyyesi illoqheppa kuyyaqako 150 oladhonki.