Maghno Korito
6
Koro piyyeema idhdhaladhapa isi naqana ihaadhdheesiki dhali.
2 Perisana shampidhdhe Waakito xessno ihaadhdhe koritonaki hiʼe,
hinna kittatte akkenu qholadheesi sixonki.
3 Haallikkoka hasi payi:
“Qhawho ho fara qhooti kodhdhi maallay Nasso Haayyu qhawho qale perre ye hume sheeghe ye qaakni;
xaynu koru perre korito perko 120 ikkodhdhe.”
4 Perrisanapa perrisana tupettay miʼaadhesi ihaadhe qhawhitopa shampidhdhe Waakitona dhaladhe he anna payi nifilimaadhdhea qagha,
usundhisakka koro kanoomapa perre kedhdhana he tanapunkottay arama.
5 Haallikkokka koro piyyatte qaakana maghno huusundhikka ho mala ghaqqiti qhamu kodhdhipa dhihathoote tuusundhi saqakitokka kuyyaqako kaasay maghno patta kodhdhisa ihiʼi.
6 Haallikkokka ‹qhawhossi piyyatte qaakaasi tannu an uume hxuri› ki payipa saqakottay uuma azanu.
7 Hussa maallay Haallikko ippayina:
“Sanynyessi qhawhito an uumiisi kappette an patisna.
Qhawhonu payyatti haaka qhollepa uumata eerotay piyyaʼita kuqamapa isi ashsha pana aaghe moontoʼita haqa kaasa piyyatte an pattisina!
Moʼo mallay payni qhoota an usundhe uuminu an azani.”
8 Ikkodhitama kapay qhawho ana payi Noohe Haallikkito miinatte kaanaste tayadhi.
Noohe
9 Dhalata Noohekka xayna kalakata hasi lighi.
Noohe qhawho pare qaghapa koro perre huusuna kittate qagha kaasana kaanta dhappitte yena qaghti.
Noohe onke Waakitonaki ashshi.
10 Noohe shampo isexki dhali,
makaxe huusundhikka:
Seemepa Kaame pana Yafeete ana payi.
11 Xinkisana koro piyyatte qaaka kaasay Waakito miinatte kodhmo maghatakki lokmadhi.
Piyyeka maghnotakki hoqhqhiti.
12 Waakokka piyye qhaatʼe kaasay qhamu mala ghaqqiti maghnottay lokmatisa ihhiʼi;
koro kaasay qhooti ashshanko huusu xarkiishi maallay.
13 Waakokka Noohena hasinna payi:
“Sanynye qhawhito kaasaasi patisenu an qhutʼadhi!
Piyye maghno qhawhitottay qhooti hoqhqhiti maallay koroosi piyyatte an patisna!
14 Ato kapay kaarkko xeesa ana kofareb payina markapec kodhdhi,
poorko kitteemakka konpidhdhe kisha kodhdhay,
markapisana poorkopa seetosikka tankarettay nasaalay.
15 Sikapno hiisi tʼihiile 300,
ghandhaqunte tiisi tʼihiile 50,
shikkaarte tiisikka tʼihiile 30 kodhdhi.
16 Markapisasa saappe ghutu qhadhdhummo kodhdhi,
xayto markapepa qhadhdhummo illena laaghamina kitteema tʼihiile tootte qhashshanne hxur.
Te fookʼe 3 sheegha kodhdhi ghinaqqe kaaqilakka mankaxxe na kodhdhi.
17 “Haadhi Ano uumata piyyatte qagho sheegha kaasaasi patisenu qandhe patitatesikki an okaasni,
olho piyyatte qagho sheegha kaasay ipanna.
18 Kapay ho qalema katape an xulli,
athopa dhelle haahu tʼiirattepa xiskaththo taahu pana xiske dhelle haahuna markapeema axxullinte.
19 “Qhamu qaghottay ho qalle ghayinenu uumata qagho sheegha kaasanna kittatte he ille lighooma laki lakisi,
tʼirakkopa xiskatto akkonttipa markapessi kitteema xulleesay.
20 “Iko aaghe holottay haqa kaasanapa iko aaghe luhhettay ashsha kaasanna pana he eerottay kuqama qhamu qaghottay qaaknenu iko kaasanna lakki lakki kodhdhineppa ho kula okayonki.
21 Yiʼo hoosippa usundheesi gheeqasa kaasay illeema holas.
22 Noohekka olho kaasaasi qhamosi Waako nu hayi kulaki kodhi.