N wan duuhe ba be'em sebo woo te ba tom bo mam la bahɛ
33
1 Se'em ma'an te ba nyɔkɛ Yeremia ta pagɛ en se'em n guruba la ayema zenzakai la, te Na'ayenɛ la yetɔgom le wa'an a zen'an sugumnɔɔren boyi' na. 2 Na'ayenɛ la, se'em n maalɛ saazuo la teŋa la se'em yu'urɛ n de Na'ayenɛ la yeti ya, 3 Yi mam ge n wan sakɛ, ge pa'alɛ hɔ yelekanra se'a n sogɛ te ho ka mina. 4 Na'ayenɛ la, se'em n de Israel Na'ayenɛ la n yele se'em n wana. La yan pon gbi teŋa la yikanra la la naba yire la te ba lebege kunkuma gu te dima la n gan' gura ya la da ta'an tole na zabɛ la ya la, bala dela yoo. 5 Kaldea pɛɛntɛɛnreba la wan sina ge nyaŋɛ ken na, n wan bahɛ te tandagena la zuto woo perɛ la nɛresɛba te ba ko. Se'ere n sɔe la mam zagahɛ ya me, mam maahom me te n sagom ya la n sunsunyiim la n taɛ dita wo bugum la ya toonbe'ero la zuo. 6 La kan eŋɛ bala, saŋa ken na te n wan bahɛ te tebegɔ sige n nɛreba wa zuo na te ba nyɛ iŋma'ahom. N wan bo ba tarega la sunma'ahom, ge gura ba. 7 N wan yehe Yuda la Yerusalem teŋa yamenɛ la poan lebena, ge malom mɛ ba ze'ele. 8 N wan duuhe ba be'em sebo woo te ba tom bo mam la bahɛ, ge di sugure bo ba ban bire poore bahɛ mam ge tom be'em sebo la woo. 9 Teŋkana wa n de teŋsɛka n wan bo mam nyeema, ge bahɛ te mam soŋa nɛɛ, ge tara na'ahegɔ teŋhe wa woo nɛŋan. Teŋhe wa woo han nyɛ toonsoma se'a te mam, tom bo n nɛreba wa, la wan pakɛ ba, te ba iŋhe gbe'era la popeelom.10 Na'ayenɛ la yeti ya, Yamam yeti zen'kana wa sagom me, te nɛresaala bii duŋa pon ka yee ka poan. Ge n yeti ya yeti Yuda teŋa wa n de daboo gan'an wa, ge te Yerusalem sɔrɔtɔ wa zuo man'ɛn gan digi digi wa, ya tɔba wan wom. 11 Nyeema, la popeelom yooma, pɔgɔdire, la se'ere ele wan le lebe se poan na. Te pɔgɔdire yooma la sɛba n ye'ehe Na'ayenɛ Yire na te ba po'ohɛ en la me yooma, te ba yoona la popeelom dɔla teŋhe wa poan, la se sɔrɔtɔ zuto. Dekɛ pɛnka bo Pɛɛntɛɛnreba Na'ayenɛ la. Se'ere n sɔe la Na'ayenɛ la ane la soŋa. N wan le bahɛ te nyɛlom la soŋa sɛka n yuum boe teŋa wa poan la, le lebe ka poan na wo lan yuum ane ka se'em la. Na'ayenɛ yele se'em n bala.
12 Pɛɛntɛɛnreba Na'ayenɛ n yeti se'ere n wana: La teŋa wa n pon lebege daboo gan'an te nɛra bii duŋa me pon ka bɔna ka poan wa, nɛreba wan le zin'ire ka poan, te ka puhe yaama te duŋkeema gu'ura ba piihe teŋa kana wa bɔn'ɔrɔ poan. 13 Ugure wan le ana soŋa teŋse'ehe n yage zoore zuo wa, la teŋse'ehe n boe Yuda teŋa zoore tilin la, la pɔgɔtia teŋhe la poan, la Benyamin teŋa poan, la teŋbibihe se'ehe woo n kae Yerusalem teŋa la, la Yuda teŋbibihe la zan'an poan. Ugure wan le lebena te ba ne yu'ɛ piihe bahɛ na te se tɔŋera bala sigera bɔn'ɔn ha. Na'ayenɛ yele se'em n bala.
14 Na'ayenɛ la yeti, Dabaherɛ kene na te n ka'ɛ en som sebo woo te n biŋe nɔɔrɛ te n wan tom bo Israel la Yuda teŋa la bahɛ ba zuo na. 15 Saŋkaŋa poan dabeha la, n wan bahɛ te yile n de tontɔɔ bule David buuri la poan yehe na. Yile la wan eta sɛla n nare ge dɛna tontɔɔ teŋa wa zuo. 16 Dabeha aŋa poan Yuda teŋa wan nyɛ faanrɛ, ge te Yerusalem teŋa me bɔna fai. Ba wan tara yu'urɛ se'ere yi'ira yile la n wana: Na'ayenɛ n de tomam yelemɛŋɛrɛ. 17 Na'ayenɛ la yeti ya, la kan malom eŋɛ te David buuri la koŋe ba mɛŋa buuri la poan nɛra te a zin'ire Israel yire na'am gɔŋɔ la zuo. 18 Bii la ta'an eŋɛ te Levidoma la koŋe ba mɛŋa buuri la poan te a dɛna mam Yenɛ yire la nɛŋadaana zɛ'a mam nɛŋa tɔ'ɔha ba nyɔ'an bo'olom, la ba ki nyɔ'an bo'olom, la ba kaanbegɔ bo'olom kaanbera bɔ'ɔra mam na.
19 Te Na'ayenɛ tɔgɛ bo Yeremia le yeti, 20 Se'em han wan nyaŋɛ bahɛ te beere kan yelegɛ, bii wontɛɛŋa kan lu, 21 ho wan nyaŋɛ kɔ' mam nɔbiŋere wa te mam biŋere la n tontona David la n malemadoma Levi yizuo la n boe mam nɛŋan tona bɔ'ɔra mam wa bahɛ, te David kan le tara te la sɔe zin'ire a na'am gɔŋɔ wa zuo. 22 Mam yeti n bahɛ te n tontona David la Levi yizuo la n boe mam nɛŋan tona bɔ'ɔra mam la wi'ɛ me, zo'e wo ŋmarebibihe n zo'e se'em saŋgbana zo'e kan tara kanlɛ la, ba wan zo'e wo kolaa tentɔnbin'ihegɔ n zo'e gan'an se'em ka ta'an va magahɛ la.
23 Te Na'ayenɛ le tɔgɛ bo Yeremia yeti ya, 24 Hom ka min te nɛreba wa yeti bɔ'ɔra ba mɛhe me te Na'ayenɛ mea n daa loe Yuda la Israel teŋhe a mɛŋa me n le zagahɛ se? Ba sen'ehe me ge yɛta yeti, Israel teŋa pon ka nara ba kanla en pa'aha teŋhe poan. 25 Na'ayenɛ la yeti ya, la han dagana la mam Na'ayenɛ n maalɛ bolika la yu'uŋɔ, ge biŋe n nɔɔrɛ la ba ban sone te ba kena se'em, la han dagana la mam, Na'ayenɛ n maalɛ saazuo la teŋa, ge biŋe n nɔɔrɛ la ba lan sone te la ana ba se'em, 26 N ye wan seren bahɛ n tontoneba Yakob, la David yaahe wa, ge pon kan loe ba dayɔa kayena me te ka sɔe zin'ire na'am gɔŋɔ la poan dɛna naba behera Abraham, Isaak, la Yakob yaahe wa. Mam yeti n zɛ ba ze'ele me, ge zɔ ba ninbɔn'ɔn.