Ya ka sakɛ bahɛ ya sɔɔnrɔ sɛba n de ya yamehe la
34
1 Se'em ma'an te Kaldea Naba Nebukadnezar la a sɔ'ɔlom la nabibihe la ba nɛreba zan'an la behe taaba wa'ana zabera la Yerusalem teŋa la ka teŋbibihe la woo la, te te Na'ayenɛ la tɔgɛ bo Yeremia yeti, 2 Keŋɛ Yuda teŋa naba Zedekia zen'an la ho ta yele en yeti, Mam se'em n de Na'ayenɛ la maahom te n dekɛ Yuda teŋa wa eŋɛ la Kaldea naba la a nɛreba wa nu'uhen, te ba nyɔ' ka la bugum sagom ka bahɛ. 3 Hom, naba Zedekia kan peɛn ba wan nyɔkɛ hɔ voto bo Kaldea naba la nɛŋan te a gankɛ hɔ, ge bahɛ te ba tare ho keŋɛ Kaldea poan te ho ta dɛna yameŋa bini ha. 4 Ge la bala zan'an la, kele Na'ayenɛ n biŋere nɔse'ere la hom Yuda teŋa naba wa. Na'ayenɛ la n tɔgɛ ho yele se'em n wana. Ba kan ko hɔ. 5 Ho yeti ho ki la ho mɛŋa kum dabaherɛ. Ho wan ki te ba lagahɛ kele bo ho, ge nyɔ' bugum bo hom n daana wa wo ho sɔyaabdoma sɛba n yuum de nadoma ge ki te ba nyɔn' na'ahegɔ bugum bo ba se'em la. Mam Na'ayenɛ yele se'em n bala. 6 Te mam Yeremia ihege keŋɛ Yuda teŋa naba Zedekia zen'an ta yele en Na'ayenɛ n yele mam te n yele en sɛla la. 7 Saŋkaŋa poan la te Kaldea naba la a nɛreba pon zabɛ nyaŋɛ zen'enhe me ge gee la Lakis la Azeka la Yerusalem teŋhe ma'an, nya zegera te ba kɛn'.8 Se'em ma'an te Yuda teŋa naba Zedekia biŋe nɔɔrɛ la a teŋa nɛreba la woo te hom se'em n tare yameŋa te ka dɛna Hebru nɛra ho bahɛ en la. 9 La daa dela nɛra woo bahɛ Hebru pɔka, bii boraa han bɔna ho zen'an dɛna yameŋa. Nɛra nɛra daa ka tare sore te a kelom bobe a Yuda nɛra tadaana te a dɛna a yameŋa. 10 Bala zuo la, kpɛ'ɛndoma la, la nɛresɛba woo n daa boe nɔbiŋere dena wa poan la zan'an daa sakɛ ya te ba wan bahɛ ba sɔɔnrɔ sɛba n de pɔgɔhe la boraahe ge dɛna ba yamehe la. Ba daa sake ya, daa seren bahɛ ba, 11 ge pooren te ba le tɛn'ɛhɛ, daa le gin' ba lebe na, te ba kelom dɛna yamehe bɔ'ɔra ba.
12 Te Na'ayenɛ tɔgɛ bo Yeremia yeti, 13 Na'ayenɛ la, se'em n de Israel Na'ayenɛ la yeti, Se'em ma'an te mam yuum tare ya sɔyaabdoma ze'ele Mizraim teŋa poan yehe na la teŋsɛka poan te ba yuun dɛna yamehe la. Mam yuum yele ba yeti, 14 Ho han tara ho Hebru tadaana te a dɛna ho yameŋa, tom yuuma ayoobe bo ho, yuunse'ere n pa'ahere ayopɔe la, ho bahɛ en te a keŋɛ.a Ge ya sɔyaabdoma la yuum ka kelehe mam, bii ba to'e mam yetɔgom la. 15 Te yamam me daa tee ya potɛn'ɛre daa daarɛ wa, toon toonse'ere n ane soŋa mam nɛŋan. Ya daa soolom me bo taaba te ya bahɛ ya sɔɔnrɔ sɛba n de yamehe la. Ge daa ze'ele mam Yenɛ yire la poan pɔ' nɔɔrɛ te ya wan bahɛ ya sɔɔnrɔ sɛba n de ya yamehe la, ya daa seren bahɛ ba me. 16 Ge ya le tɛn'ɛhɛ behɛ, le lebe ta pɛnregɛ ya sɔɔnrɔ sɛba n de ya yamehe, bala la bahɛ te ya ganlom la mam yu'urɛ la.
17 Bala zuo la Na'ayenɛ la yeti, Ya ka nam mam, ya ka sakɛ bahɛ ya sɔɔnrɔ sɛba n de ya yamehe la. Bala zuo la, mam se'em n de Na'ayenɛ la yeti, so'a, la kom, la too wan sige ya zuo na te sɛla ka bɔna gu'ura. N wan diihe ya vi teŋhe wa woo nini. 18 Nɛresɛba n ganlom mam nɔbiŋere la, ka tom nɔbiŋere la n bote se'em la, n wan aanhom ya biŋe wo duŋa te ba ne aanhom biŋe se'em te ba torɛ la. 19 Yuda la Yerusalem teŋa keendoma la, la Yenɛ yire la zenzakai kpɛ'ɛndoma, la mam Yenɛ yire la keendoma la teŋa la poan nɛreba la n nya kae nɛnɔ la behɛ. 20 N wan dekɛ nɛrebana wa zan'an eŋɛ ba diŋdoma sɛba n eere ba vom la nu'uhen, te ba ko ba iŋhe lebege dia bo niihe, la mɔɔdunhe.
21 N wan dekɛ Yuda teŋa naba Zedekia la a kpɛ'ɛndoma la zan'an eŋɛ ba diŋdoma la n de Kaldea naba pɛɛntɛɛnreba la nu'uhen. Kaldea naba wa nan bahɛ teŋkana wa me, 22 ge n wan yi Kaldea pɛɛntɛɛnreba te ba lebe na zabɛ la teŋa wa, nyaŋɛ ka, ge nyɔn' ka la bugum bahɛ. N wan bahɛ te Yuda teŋhe la lebege daboo te nɛra la ayena me kan ta'an bɔna se poan.