Mam da' n tanya dayɔa la samanɛ la
32
1 Se'em ma'an Yuda teŋa naba Zedekia n zin'ire a na'am gɔŋɔ la zuo yuuma pia poan la' bala ma'an te Kaldea Naba Nebukadnezar nyɛ la la yuun pia, la anii a na'am gɔŋɔ poan, te Na'ayenɛ tɔgɛ bo a nɔtɔgɔha Yeremia.2 Saŋkaŋa poan la, te Kaldea pɛɛntɛɛnreba n wa'ana sogɛ gan'an gura te ba zabɛ la Yerusalem teŋa, ge te Yeremia me bɔna paka deon, Yuda naba yire gura la zenzakai. 3 Zen'an te Yuda teŋa naba Zedekia mɛŋa bahɛ te ba tare Yeremia ta pagɛ bini te bene zuo te a porɛ yeti, Na'ayenɛ yeti, N wan dekɛ teŋa wa eŋɛ Kaldea naba nu'uhen, te a zabɛ nyaŋɛ ka sɔe sɔna la, 4 te Yuda teŋa Naba Nebukadnezar kan peɛn Kaldeadoma wa nu'uhen, ge ba wan nyɔkɛ en ta ze'ele Naba Nebukadnezar nɛŋan, te ba tɔgɛ bo taaba, ge te hom naba Zedekia wan yee bɔna la Kaldea wa poan gura te mam Na'ayenɛ mɛŋa ta wa'ana kae hɔ behɛ la. Na'ayenɛ yeti, Ho wan zabɛ la Kaldeadoma wa, ge ho kan nyaŋɛ ba. 5 Ba wan nyɔkɛ Zedekia keŋɛ Kaldea poan te a ta bɔna bilam ha gura saŋsɛka te mam wan eŋɛ en mam bote se'em la bahɛ. Ya han pon zabera la Babilondoma la la se'em me, ya kan malom nyaŋɛ ba. Na'ayenɛ yele se'em n bala.
6 Te Yeremia yeti, Na'ayenɛ tɔgɛ bo mam yeti, 7 Ho tanya Salum dayɔa Hanamel wan ta wa'ana yele ho yeti, Da' mam samanɛ la n boe Anatot teŋai la, sɔna, se'ere zuo, hom dela n sɔ, a sɔɔn, ho tare sore te ho to'e n sɛla tara. Bala te mam baŋɛ te yelehom la te mam tɔgɛ la seren dela Na'ayenɛ yele se'em n bala. 8 Te mam tanya dayɔa Hananel wa, seren wa'an mam zen'an gura la zenzakai, naba yire la poan na wo Na'ayenɛ n yele se'em la yele mam yeti, da' mam samanɛ la n boe Anatot teŋa la n boe Benyamin teŋa poan la sɔna, se'ere zuo hom n dela n sɔ, ho tare sore te ho to'e n sɛla tara. Bala te mam baŋɛ te, yelehom la te mam tɔgɛ la, seren dela Na'ayenɛ yele se'em n bala. 9 Te mam da' n tanya dayɔa la samanɛ la n boe Anatot teŋa poan la, yɔ en sanlenpeelega kpila pia, la ayopɔe. 10 Mam n sakɛ te n wan da' samanɛ la, ge yɔ la, mam bahɛ te a ze'nyɛ daana n bɔna bini, te to din'inhe nu'uhe, ge te mam kaanlɛ ligiri la bo en. 11 Mam tanya dayɔa wa, la aze'elenyɛdaana la, la Yuda teŋa nɛresɛba n zin' la tɔ naba yire gura la zenzakai la saŋkaŋa poan la nɛŋan, te mam ze'ele dekɛ gɔŋɔ seko te samanɛ la da'a yɛla bɔna bini, te to din'inhe nu'uhe ko poan la, 12 bo Neria dayɔa Baruk la n de Maseiah yaaŋa la, 13 ge yele en ba nɛŋan yeti, 14 Pɛɛntɛɛnreba Na'ayenɛ la n de Israel Yenɛ la yeti, dekɛ samanɛ da'a gɔŋɔ wa, ta dekɛ tɔ eŋɛ kanleŋa poan, te to gan'arɛ yue, 15 Se'ere n sɔe la, Pɛɛntɛɛnreba Yenɛ la n de Israel la yeti, teŋa wa doma wan le koohe yiya, samana, la tiihe wɔla vatɔ teŋa wa poan tehɛ te ba da'.
16 Mam n dekɛ sanɛ da'a gɔnɔ la bo Neria dayɔa Baruk, mam po'ohɛ mɛ yele Na'ayenɛ yeti, 17 Daana Na'ayenɛ, hom n tɛɛn ho nu'o maalɛ saazuo la teŋa wa la ho mɛŋa paŋa. Sɛla ka boe kpe'em bo hom. 18 Hom n de se'em n tare zo'ohogɔ bɔ'ɔra sɛba n nɔŋɛ ho paara ba tuha tuha ha, ge me yɔɔra sɛba n ka nane hom la me be'em ta tara ba kɔma zan'an. Hom dela Yenɛ Kanrɛ, hom yu'urɛ n de Pɛɛntɛɛnreba Na'ayenɛ. 19 Ho dela kan'ana te ho tooma ka tara makerɛ. Ho nini nyɛ nɛresaala n dole sɔrɔɔ seko woo, yɔɔra nɛresaala woo tooma la a tooma la wɔla n nare se'em. 20 Hom n tom nyalema la kerehe Mizraim teŋa la Israel teŋa poan la nɛresaaleba vom poan la zina wa. Ho yu'urɛ pota ba zen'an saŋa woo. 21 Hom dekɛ la nyalematooma, la ho mɛŋa nu'o te ho zɛnkɛ tom paleŋ'ɛnka tooma tare ho nɛreba Israeldoma ze'ele Mizraim teŋa poan yehe na. 22 Ho dekɛ teŋsɛka te hom daa biŋe nɔɔrɛ la yaabdoma te ho wan dekɛ bo ba la, teŋsɛka te iilom la seerom zɔte wo ko'om la. 23 Te ba kɛn' ka poan, to'e ka sɔna. Ge ba daa ka nam hɔ bii dole ho pa'alegɔ la bii ho nɔɔrɛ la woo te ho bo la. Bala te ho namehe ba. 24 Behɛ, ba tin'iri mɛ, ge gbi'ira teŋa wa dangoone wa, te ba nyaŋɛ kɛn' na fan' ka teŋsɛka. So'a la kom la too wan bahɛ te Kaldeadoma wan zabɛ dekɛ teŋsɛka. Ho mɛŋa nini nyɛ ya, te hom n tɔgɛ te sɛla woo wan ɛnŋɛ la, n bala tona wa. 25 Ge la bala zan'an, teŋa wa n pon bɔna Kaldeadoma wa nu'uhen la, hom Daana Na'ayenɛ yeti mam mɛ te n ɛ aze'elenyɛdoma, te ba zɛ'a, ge te n da' teŋa wa, yɔ ligiri.
26 Te Na'ayenɛ tɔgɛ bo Yeremia yeti, 27 Mam n de Na'ayenɛ, Yenɛ se'ere n naam sɛla woo la. Sɛla boe mɛ kpe'em bo mam yoi? 28 Mam n yeti n wan dekɛ teŋa wa eŋɛ Kaldeadoma wa nu'uhen, Kaldea Naba Nebukadnezar nu'uhen, te a zabɛ nyaŋɛ ka. 29 Kaldeadoma sɛba n zaberɛ la teŋa wa, wan wa'ana, nyɔ' ka deto seto poan te ba kaanbera Baal bagarɛ, ge kaanbera daam bɔ'ɔra baga a se'a nyiiha mam sunsunya la, la la bugum. Sunsunya n nyie se'em. 30 Se'ere n sɔe la, Israel, la Yuda teŋadoma wa tone la be'em mam nɛŋan, pɔhɛ ba bonbilomen ha, la zina. Na'ayenɛ yeti, Israeldoma wa toonɛ dela, ba tara ba mɛŋa nu'uhe n maalɛ sɛla la nyiiha mam sunsunya. 31 Ban kɔ'ɔn mɛ teŋa wa daarɛ loa, ka nyiihe mam sunsunya la bala, tara tara la zina, te la nya paɛ te n yehe ka n nɛŋan bahɛ, 32 Israel, la Yuda teŋa nɛreba, la ba nadoma, ba kpɛ'ɛndoma, la ba malemadoma, ba nɔtɔgɔheba, la Israel, la Yuda teŋa nɛreba la zan'an be'em la te tara nyiiha mam sunsunya la zuo. 33 Ba bire la ba pɔya bahɛ mam. La mam n pon pa'ala ba saŋa woo la, ba ka kelehe, bii ba tɔ'ɔra kan'aŋɔ. 34 Ba tare la ba ganleŋɔ lɔkɔ la, ta ze'ele mam Yenɛ yire la poan, ganlom dɛ. 35 Ba mɛ' la kaanbegɔ zen'an bo Baal bagarɛ Ben Hinom Bɔn'ɔn la poan, tara ba dayɔɔhe, la ba pɔyɔɔhe kaanbera bɔ'ɔra Molek bagarɛ la, sɛla te mam ka bo ba nɔɔrɛ te ba eŋɛ, bii de pon tabelɛ wa'an mam potɛn'ɛrɛ poan na, te ba eŋɛ wo ban eŋɛ se'em bahɛ te Yuda lagom tom be'em wa.
36 Bala zuo la, Na'ayenɛ se'ere n de Israel Yenɛ la n yele teŋa wa yele teŋsɛka te ho yeti, so'a, la kom, la too n dekɛ ka eŋɛ Kaldea naba nu'uhen la yele se'em n wana. 37 Behɛ n yeti n doohe la teŋse'ehe woo te mam yeregehɛ ba bahɛ se poan la n sunsunyiim la, lagahɛ ba na la tebehom, sɛ ba ze'ele zen'kana wa poan te ba bɔna fai. 38 Ba wan dɛna mam nɛreba te mam me wan dɛna ba Yenɛ. 39 N wan bo ba potɛn'ɛrɛ deyena, la sore deyena, te ba zɔta mam, ba mɛhe, la ba kɔma n wan wa'an ba pooren na som zuo. 40 N wan biŋe nɔse'ere n ka tare ba'ahegɔ la ba, kan malom bahɛ ba kan eta som bɔ'ɔra ba, ge dekɛ n zoolom eŋɛ ba poan, te ba zɔta mam saŋa woo, kan malom bire ba poore bahɛ mam. 41 La wan dɛna nyeema bɔ'ɔra mam, la mam n eŋɛ ba som la, ge dekɛ n potɛn'ɛrɛ, la n suunre zan'an sɛ ba ze'ele teŋkana wa poan la sakerɛ sera.
42 Mam n tare sagaŋɔ kona wa wa'an nɛreba wa zuo na la dela n bahɛ te som sebo woo te n biŋera nɔɔrɛ nananawa wa'an ba zuo na. 43 Nɛreba wan le wa'ana da'ara teŋsɛka te ho yeti, Ka dela teŋbeele te nɛresaala, bii duŋa ka bɔna ka poan, te ka bɔna Kaldeadoma wa nu'uhen wa. 44 Ba wan wa'ana da' samana kalam la Benyamin teŋhe la Yerusalem kɔrom kɔrom teŋhe la Yuda teŋhe la teŋse'ehe n yage zoore zuo wa la nɛŋa bɔba zobibihe la Negev pɔgɔtia wa woo poan, yɔ ligiri, te aze'elenyɛdoma ze'ele din'inhe nu'uhe da'a gɔnɔ poan. Se'ere n sɔe n wan le bahɛ yelesoma wan lebe ba poan na. Na'ayenɛ yele se'em n bala.