N bia, kɛleha mam yam wa soŋa
5
1 N bia, kɛleha mam yam wa soŋa, be'e toberɛ kɛleha mam bɔkerɛ wa, 2 la ho tana ho mɛŋa tara, te ho nɔɔrɛ tɔgɔra yam yetɔgom. 3 Yiyɛa nɔɔrɛ mahe mɛ wo seerom la, ana bololo wo kaam la, 4 ge ba'ahegɔ poan, a dela yabega, ŋmata gana so'a n tare nɔya ayi'. 5 A na'ma ye la kum poan, dɔla kum sore. 6 A ka dole vom sore, a sɛla woo buti mɛ ge te a ka mina.7 N bia, kelehe soŋa da malom bahɛ mam yelehom wa. 8 Da lɛna en, da paara a zanɔɔren, 9 ge ho han eŋɛ bala, ho wan dekɛ ho paŋa la tee bo sɛba, te ho vom yuuma bɔna nɛrekɔɔra wa nu'uhen, 10 te saama sɔe di ho tarega la. Ho namehe mɛta la ayema yire, 11 te ho iŋa wa nya han ta baha yoo, ho nya kele mɛ ho ba'ahegɔ poan, 12 yeti, N daa ka kelehe kan'aŋɔ, n suunre daa wom la tanhega. 13 Mam daa ka kelehe pa'aleba, bii n tɔ'ɔha kan'aŋɔ. 14 Nananawa, mam ye' la sagaŋɔ en bala nɛreba nɛŋan.
15 Nyuura ho mɛŋa loa poan ko'om, nyuura ko' sebo n bule ho mɛŋa bulega poan. 16 Ho bote ho ko'nini yaana, te se ko'om ka'ahɛ sɔrɔtɔ zuo? 17 Bahɛ te se dɛna hom ma'an denɛ, ge dagɛ ho tara tɔnta la saama. 18 Bahɛ te ho balom gan'an baanlam, nyeena la pɔgɔsɛka en pɔhɛ ho boraanɛ la, 19 kaŋa n de ho suunre lɔkɔ nɔŋɛ ka, te ka ze'elego tegɛ ho nini, te ho sea bɔna ka poan saŋa woo, la kan nɔŋɛ ho se'em la. 20 N dayɔa, bene te ho koŋkoma'ahom wan bɔna pɔgɔsɛka poan, te ho keŋɛ ta kɔkera yiyɛa?