Ɛ yam la bɔkerɛ
4
1 Kɔma, kelehe ya ya sɔ kan'aŋɔ, ge be'e ya toba, la ya bɔkɛ. 2 Se'ere n sɔe la, mam pa'ale ya la som, ge da zagahɛ mam pa'alegɔ. 3 Mam yuun de bia la, ge dɛna n ma bia kayena a nu'uhen la, 4 n sɔ yuun ne pa'ala mam yeti, Bahɛ te mam n yeti ho sɛla wa dɛna ninmɔ'ɔrɛ bɔ'ɔra hɔ. Tara mam nɔɔrɛ wa, ge bala n wan bo ho vom. 5 Ɛ yam la bɔkerɛ. Da tamɛ, bii ho bire poore bahɛ mam nɔɔrɛ yelehom wa. 6 Da zagahɛ yam, te bo wan gu'ura hɔ, nɔŋɛ yam te bo wan behera hɔ. 7 Sɛla n de yiadaana dela yam, Ɛ yam, ge la ho nyɛ' bɔkerɛ. 8 Zɛnkɛ yam, te bo wan seren zɛnkɛ hɔ, ho han gin' yam, bo wan seren na'ahegɔ hɔ. 9 Yam wan bahɛ te ho tara zuo, ge ana wo nonɔm muŋa bo ho.10 N bia wa, kɛleha mam yelehom wa, ge bala n wan bahɛ te ho yuuma wɔgɛ. 11 Mam pa'alɛ ho yam sore, ge tare ho doohe tontɔɔ sore. 12 Ho han nya kena, ho na'ma ka gɛnte, ho han zɔta, ho ka le ŋmɛ'ɛra na'ma. 13 Kɛleha kan'aŋɔ, da zagaha kan'aŋɔ, tara kan'aŋɔ soŋa. Ge ho vom en bala. 14 Da kɛn'ɛra potɔpa yɛla poan, bii ho dɔla toonbe'erodoma. 15 Lɔkera ba, da dɔla ba, lɔkɛ ba tolɛ. 16 Nɛrebama han ka tom be'em, ba ka gan'ate, ba han ka bahɛ te ayema perɛ lu, ba ka gan'ate. 17 Se'ere n sɔe la putɔlɔgɔ n de ba dia la ba daam te ba nyuura.
18 Ge tontɔɔdaana vom nɛɛ mɛ wo bolika sɔɔnrom n nɛɛre se'em la, tara tara ta nyɛɛn zan'an na la. 19 Ge potɔpa vom dela lika kantɛ, ba ka mi' sɛla n bahɛ te ba serona la.
20 N bia, kɛleha mam soŋa, enŋɛ tobewoŋa bo n yelehom wa. 21 Da bahɛ te bo yehe ho zen'an, bahɛ bo ho suunre poan. 22 Bo dela sɛla n bo'ore vom, sɛba n tare bo, ge dɛna tebegɔ bo ba. 23 Lo' ho suunre la som. Se'ere n sɔe la vom kolaa ze'ete la bilam na. 24 Da bahɛ te ŋmɛlema zɛ'ɛta ho nɔɔrɛn na, ge bahɛ te ponpɔrɔŋɔ zaan la ho. 25 Bahɛ te ho nini beha ho nɛŋan, te ho limihego bɔna ho nɛŋan ma'an. 26 Bahɛ te ho na'ma kena tontɔɔ, te ho yɛ'ehego zan'an woo wan dɛna ma'an. 27 Da ŋmɛregera lɛbera zuɔ, bii gɔbega, ŋmɛregɛ ho na'ma yehe be'em poan.